തളിപ്പറമ്പ്: (KVARTHA) അഭ്യസ്തവിദ്യരായ തൊഴിലന്വേഷകരെ സഹായിക്കുന്നതിനായി ആരംഭിച്ച കണക്റ്റിംഗ് തളിപ്പറമ്പ് നിയോജക മണ്ഡലം ഓഫീസ്, ബ്ലോക്ക് ജോബ് സ്റ്റേഷൻ എന്നിവയുടെ ഉദ്ഘാടനം എം വി ഗോവിന്ദൻ മാസ്റ്റർ എംഎൽഎ നിർവഹിച്ചു. തളിപ്പറമ്പിൽ നടന്ന ചടങ്ങിൽ നിരവധി പേർ പങ്കെടുത്തു.

അഭ്യസ്തവിദ്യരുടെ തൊഴിൽ സ്വപ്നങ്ങൾ യാഥാർത്ഥ്യമാക്കാൻ സഹായിക്കുക എന്നതാണ് കണക്റ്റിംഗ് തളിപ്പറമ്പ് പദ്ധതിയുടെ പ്രധാന ലക്ഷ്യമെന്ന് എം വി ഗോവിന്ദൻ മാസ്റ്റർ പറഞ്ഞു. ആഗ്രഹിക്കുന്ന ജോലി നേടാൻ ഉദ്യോഗാർത്ഥികൾക്ക് ഈ പദ്ധതിയിലൂടെ സാധിക്കും. തളിപ്പറമ്പ് ബ്ലോക്ക് പഞ്ചായത്ത് പ്രസിഡന്റ് സി എം കൃഷ്ണൻ ചടങ്ങിൽ അധ്യക്ഷത വഹിച്ചു.

കേരള നോളജ് ഇക്കണോമി മിഷന്റെ സഹകരണത്തോടെ എം വി ഗോവിന്ദൻ മാസ്റ്റർ എംഎൽഎയുടെ നേതൃത്വത്തിൽ നടപ്പിലാക്കുന്ന ഈ തൊഴിൽ സംരംഭകത്വ വികസന പദ്ധതി, മണ്ഡലത്തിലെ തൊഴിൽ ആഗ്രഹിക്കുന്ന മുഴുവൻ അഭ്യസ്തവിദ്യരെയും അവർ ആഗ്രഹിക്കുന്ന തൊഴിലിലേക്കും സംരംഭകത്വത്തിലേക്കും നയിക്കാൻ ലക്ഷ്യമിടുന്നു. ഇതിനായി കേരള ഇക്കണോമി മിഷന്റെ ഡിജിറ്റൽ വർക്ക്ഫോഴ്സ് മാനേജ്മെന്റ് സിസ്റ്റം (ഡി ഡബ്ല്യു എം എസ്) പോർട്ടലിൽ രജിസ്റ്റർ ചെയ്യാവുന്നതാണ്. ഇതിനോടകം പതിനാലായിരത്തോളം പേർ ഈ പോർട്ടലിൽ രജിസ്റ്റർ ചെയ്തിട്ടുണ്ട്.

ആദ്യഘട്ടത്തിൽ രജിസ്റ്റർ ചെയ്യുന്ന ഉദ്യോഗാർത്ഥികൾക്ക് കരിയർ കൗൺസിലിംഗ് നൽകും. തുടർന്ന്, ഉദ്യോഗാർത്ഥികൾക്ക് ആവശ്യമായ വൈദഗ്ദ്ധ്യം നൽകി അവരെ ജോലിക്ക് യോഗ്യരാക്കുകയും, പ്ലേസ്മെന്റ് ഡ്രൈവുകളും മെഗാ ജോബ് ഫെയറുകളും സംഘടിപ്പിച്ച് ഓരോരുത്തർക്കും അവർ ആഗ്രഹിക്കുന്ന ജോലി നേടാൻ സഹായിക്കുകയും ചെയ്യും. ഈ പ്രവർത്തനങ്ങൾ ഏകോപിപ്പിക്കുന്നതിനായി തളിപ്പറമ്പ് മണ്ഡലത്തിലെ ഏഴ് പഞ്ചായത്തുകളിലും രണ്ട് മുനിസിപ്പാലിറ്റികളിലുമായി ജോബ് സ്റ്റേഷനുകൾ സ്ഥാപിച്ചിട്ടുണ്ട്.

ഓരോ ഉദ്യോഗാർത്ഥിക്കും അവർ ആഗ്രഹിക്കുന്ന തൊഴിലിനെക്കുറിച്ചുള്ള എല്ലാ വിവരങ്ങളും ലഭിക്കുന്ന ഒരു വിജ്ഞാന സൗഹൃദ സേവന കേന്ദ്രമാണ് ജോബ് സ്റ്റേഷൻ. ഇതിനോടകം 37 പ്ലേസ്മെന്റ് ഡ്രൈവുകൾ നടത്തി, ഈ പദ്ധതിയിലൂടെ 1025 പേർക്ക് അവർ ആഗ്രഹിച്ച തൊഴിലിൽ പ്രവേശിക്കാൻ സാധിച്ചിട്ടുണ്ട്. ജോബ് സ്റ്റേഷനുകൾ വഴി കമ്യൂണിറ്റി കൗൺസിലർമാരുടെയും കമ്യൂണിറ്റി അംബാസഡർമാരുടെയും സേവനവും ലഭ്യമാകും.

ചടങ്ങിൽ കോ ഓർഡിനേറ്റർ കണക്റ്റിംഗ് തളിപ്പറമ്പ് കെ ലിഷ, കേരള നോളജ് ഇക്കണോമി ഡയറക്ടർ ഡോ പി എസ് ശ്രീകല, ഉദയഗിരി പഞ്ചായത്ത് പ്രസിഡന്റ് കെ എസ് ചന്ദ്രശേഖരൻ, പരിയാരം പഞ്ചായത്ത് മെമ്പർ ടി ഷീബ, കുറ്റ്യാട്ടൂർ പഞ്ചായത്ത് പ്രസിഡന്റ് പിപി റെജി, ബ്ലോക്ക് പഞ്ചായത്ത് മെമ്പർ കൊയ്യം ജനാർദ്ദനൻ, സ്റ്റേറ്റ് റിസോസ് പേഴ്സൺ കെകെ രവി, കില ബ്ലോക്ക് കോ ഓർഡിനേറ്റർ ടി മോഹനൻ തുടങ്ങിയവർ സംസാരിച്ചു.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക. 

MV Govindan Master MLA inaugurated the Connecting Taliparamba Constituency Office and Block Job Station aimed at assisting educated job seekers in Taliparamba. The initiative, in collaboration with Kerala Knowledge Economy Mission, intends to guide graduates towards desired employment and entrepreneurship through registration on the Digital Workforce Management System (D WMS) portal, career counseling, skill development, and job fairs. So far, around 14,000 people have registered, and 1025 have secured jobs through 37 placement drives.

#ConnectingTaliparamba, #EmploymentKerala, #MVGovindan, #JobOpportunities, #KeralaJobs, #KnowledgeEconomyMission