ഭാമനാവത്ത് 

(KVARTHA) ലോകാരോഗ്യ സംഘടനയുടെ ആഭിമുഖ്യത്തിൽ 2007ലാണ് ഈ ദിനാചരണത്തിന് തുടക്കമിട്ടത്. മലമ്പനിയെക്കുറിച്ചുള്ള അവബോധം പൊതുജനങ്ങളിൽ എത്തിച്ച്, രോഗത്തെ ചെറുക്കാനുള്ള ആഗോളതലത്തിലുള്ള നടപടിയുടെ ഭാഗമായാണ് ഈ ദിനം ആചരിക്കുന്നത്. മലമ്പനി മൂലമുള്ള രോഗാതുരതയും മരണവും ഇല്ലാതാക്കാൻ നൂതന സാങ്കേതികവിദ്യകൾ എങ്ങനെ പ്രയോജനപ്പെടുത്താം എന്ന കാര്യമാണ് ഈ ദിനാചരണത്തിൽ പ്രധാനമായും ചർച്ച ചെയ്യുന്നത്.

ജീവൻ നഷ്ടപ്പെടാൻ സാധ്യതയുള്ള ഒരു രോഗമാണ് മലമ്പനി അഥവാ മലേറിയ. പ്ലാസ്മോഡിയം പാരസൈറ്റുകളാണ് ഈ രോഗം പരത്തുന്നത്. ആഫ്രിക്കൻ വൻകരകളിലാണ് ലോകത്ത് ഏറ്റവും കൂടുതൽ മലേറിയ റിപ്പോർട്ട് ചെയ്യപ്പെട്ടിട്ടുള്ളത്. മനുഷ്യരിൽ മലേറിയ ബാധിക്കാൻ ഇടയാക്കുന്ന അഞ്ച് തരം പാരസൈറ്റുകളിൽ രണ്ടെണ്ണമാണ് കൂടുതൽ ഭീതി പരത്തുന്നത്.
അനോഫിലിസ് പെൺകൊതുകിന്റെ കടിയേൽക്കുന്നതിലൂടെയാണ് രോഗം പകരുന്നത്. ഇവയെ മലേറിയ വെക്റ്ററുകൾ എന്ന് വിളിക്കുന്നു. ശുദ്ധജലത്തിലാണ് ഇവ മുട്ടയിട്ട് പെരുകുന്നത്. രോഗാണു സാന്നിധ്യമുള്ള കൊതുകിന്റെ കടിയേറ്റ് രണ്ടാഴ്ചയ്ക്കും ഒരു മാസത്തിനും ഇടയിൽ രോഗലക്ഷണങ്ങൾ കണ്ടുതുടങ്ങും.
തലവേദന, ഇടവിട്ടുള്ള കടുത്ത പനി, വിറയലോടെയുള്ള പനി, പേശി വേദന, ക്ഷീണം, ഛർദ്ദി എന്നിവയാണ് പ്രധാന രോഗലക്ഷണങ്ങൾ. ഇടവിട്ടുള്ള വിറയലോടെയുള്ള പനി മലേറിയയുടെ ഒരു പ്രത്യേകതയാണ്. രോഗം മൂർച്ഛിച്ചാൽ മഞ്ഞപ്പിത്തം, മസ്തിഷ്കജ്വരം, വൃക്ക തകരാറ് എന്നിവയും ഉണ്ടാകാം.
രോഗബാധ സംശയിച്ചാൽ രക്തപരിശോധനയിലൂടെ രോഗം തിരിച്ചറിയാൻ സാധിക്കും. പെരിഫറൽ സ്മിയർ പരിശോധന എന്നാണ് ഈ പരിശോധന അറിയപ്പെടുന്നത്. രക്തത്തിൽ പ്രതിരോധ ആന്റിജൻ സാന്നിധ്യം കണ്ടെത്തിയാൽ ഉടൻ ചികിത്സ ആരംഭിക്കും.

ക്ലോറോക്വിൻ ആണ് പ്രധാന ചികിത്സാരീതി. വിവിധ മരുന്നുകൾ ചേർത്തുള്ള കോമ്പിനേഷൻ ചികിത്സാരീതിയും നിലവിലുണ്ട്. രോഗബാധിതരെ പെട്ടെന്ന് കണ്ടെത്തി ശരിയായ ചികിത്സ നൽകുന്നതിലൂടെ രോഗവ്യാപനം തടയാൻ സാധിക്കും.
മലമ്പനിക്കെതിരായ പ്രതിരോധ വാക്സിൻ ഇതുവരെ വിജയകരമായിട്ടില്ല. അതിനാൽ രോഗബാധയ്ക്കുള്ള സാഹചര്യം ഒഴിവാക്കുക മാത്രമാണ് ഏക പോംവഴി. കൊതുകിനെ നശിപ്പിക്കുക എന്നത് തന്നെയാണ് പ്രധാന പ്രതിരോധ മാർഗ്ഗം. വീടും പരിസരവും വെള്ളം കെട്ടിനിൽക്കാത്ത രീതിയിൽ ശ്രദ്ധിക്കണം. വീടിനകത്തും സന്ധ്യാസമയങ്ങളിൽ കൊതുകുകളുടെ സാന്നിധ്യം ഇല്ലാതാക്കാനുള്ള നടപടികൾ സ്വീകരിക്കേണ്ടത് അത്യാവശ്യമാണ്.

മലമ്പനി വ്യാപനത്തിൽ ലോകത്ത് ഇന്ത്യ ആദ്യ അഞ്ച് സ്ഥാനങ്ങളിൽ ഒന്നാണ്. നിലവിലുള്ള തീവ്ര മലമ്പനി നിർമ്മാർജ്ജന പരിപാടിയിലൂടെ 2027 ഓടെ രാജ്യത്ത് നിന്ന് പൂർണ്ണമായും മലമ്പനി നിർമ്മാർജ്ജനം ചെയ്യാനുള്ള തീവ്രശ്രമത്തിലാണ് കേന്ദ്ര ആരോഗ്യവകുപ്പ് മുന്നോട്ട് പോകുന്നത്.
നിലവിൽ കേരളത്തിൽ മലമ്പനി ഭീഷണി താരതമ്യേന കുറവാണ്. എങ്കിലും ഇന്ത്യയിലെ വടക്കുകിഴക്കൻ സംസ്ഥാനങ്ങളിലും ഉത്തരേന്ത്യൻ സംസ്ഥാനങ്ങളിലും അയൽ സംസ്ഥാനങ്ങളിലും രോഗഭീഷണി കൂടുതലാണ്. അതിനാൽ അവിടങ്ങളിൽ യാത്ര ചെയ്തു വരുന്നവരും അവിടെ നിന്ന് താമസത്തിനായി എത്തിയ ഇതര സംസ്ഥാന തൊഴിലാളികളും മലേറിയ വാഹകരല്ല എന്ന് പരിശോധിച്ചു ഉറപ്പുവരുത്തുന്നതിൽ ഓരോരുത്തരും പ്രത്യേകം ശ്രദ്ധിക്കേണ്ടതാണ്.

ലോക മലേറിയ ദിനത്തിൽ ഈ രോഗത്തെക്കുറിച്ച് കൂടുതൽ പേരിലേക്ക് അവബോധം എത്തിക്കാൻ ഷെയർ ചെയ്യുക. നിങ്ങളുടെ പ്രതിരോധ മാർഗ്ഗങ്ങളും പങ്കുവെക്കുക.

Summary: World Malaria Day, observed on April 25th, aims to raise awareness about malaria, a life-threatening disease caused by Plasmodium parasites transmitted through Anopheles mosquitoes. The article discusses symptoms, treatment with chloroquine, prevention methods like mosquito control, and India's efforts to eliminate malaria by 2027.

 #WorldMalariaDay, #Malaria, #MosquitoBorneDisease, #HealthAwareness, #MalariaPrevention, #IndiaFightsMalaria