മെഡികെല്‍ കോളജിലെ സീവേജ് ട്രീറ്റ്മെന്റ് പ്ലാന്റ്; 50 വര്‍ഷത്തെ ആവശ്യം കൂടി കണക്കിലെടുത്തുള്ളതെന്ന് മന്ത്രി എം വി ഗോവിന്ദന്‍ മാസ്റ്റര്‍

മെഡിക്കല്‍ കോളജ് ആശുപത്രിയില്‍ എത്തിച്ചേരുന്ന രോഗികള്‍, സഹായികള്‍, മറ്റ് സ്ഥാപനങ്ങള്‍ എന്നിവയില്‍ നിന്ന് പുറന്തള്ളുന്ന മാലിന്യത്തിന്റെ അളവ് നിലവിലെ മാനദണ്ഡങ്ങള്‍ അനുസരിച്ച് വിലയിരുത്തി അടുത്ത 50 വര്‍ഷത്തെ ആവശ്യം കൂടി കണക്കിലെടുത്താണ് പ്ലാന്റ് വിഭാവനം ചെയ്തിട്ടുള്ളതെന്ന് മന്ത്രി പറഞ്ഞു.

തിരുവനന്തപുരം മെഡികെല്‍ കോളജ് ക്യാംപസിലെ വിവിധ സ്ഥാപനങ്ങളില്‍ നിന്നും പുറന്തള്ളുന്ന മാലിന്യം ക്യാംപസിനുള്ളില്‍ തന്നെ സംസ്‌കരിക്കുന്നതിന് തീരുമാനിക്കുകയും അതനുസരിച്ച് കേരള വാടെര്‍ അതോറിറ്റി വിശദമായ രൂപരേഖ തയാറാക്കുകയും ചെയ്തിരുന്നു. പദ്ധതിക്ക് 2017 ഡിസംബര്‍ 23ന് 19.16 കോടി രൂപയ്ക്ക് ഭരണാനുമതി ലഭിക്കുകയും തുടര്‍ന്ന് 2018 സെപ്തംബര്‍ 25ന് സാങ്കേതിക അനുമതി ലഭിക്കുകയും ചെയ്തു. 2019 സെപ്തംബര്‍ 25ന് 'സായ്നാഥ് എന്‍വിറോടെക്' എന്ന സ്ഥാപനത്തിന് കരാര്‍ നല്‍കുകയും ചെയ്തു. പൂര്‍ത്തിയാക്കിയ പ്ലാന്റ് ദിനംപ്രതി അഞ്ച് ദശലക്ഷം ലിറ്റര്‍ സംസ്‌കരണശേഷിയുള്ളതാണെന്നും മന്ത്രി പറഞ്ഞു.

ഇന്‍ഡ്യയിലും വിദേശത്തും പ്രവര്‍ത്തനക്ഷമത തെളിയിച്ച എംബിബിആര്‍ സാങ്കേതികവിദ്യ അനുസരിച്ചാണ് പ്ലാന്റ് രൂപകല്‍പന ചെയ്തിരിക്കുന്നതെന്നും ആശുപത്രിയിലെ ലാബില്‍ നിന്നും പുറന്തള്ളുന്ന മാലിന്യം പ്ലാന്റില്‍ ലഭ്യമാക്കുന്നതിന് മുമ്പ് രാസ മാലിന്യങ്ങള്‍ നീക്കം ചെയ്യുന്നതിനുള്ള സംവിധാനം പ്ലാന്റില്‍ ഉണ്ടെന്നും മന്ത്രി വ്യക്തമാക്കി.

തിരുവനന്തപുരം നഗരസഭാ മേയര്‍ ആര്യ രാജേന്ദ്രന്‍, കടകംപള്ളി സുരേന്ദ്രന്‍ എംഎല്‍എ, അമൃത് മിഷന്‍ ഡയറക്ടര്‍ ഡോ. രേണുരാജ്, ഡെപ്യൂടി മേയര്‍ പി കെ രാജു, മരാമത്ത് കാര്യ സ്റ്റാന്‍ഡിംഗ് കമിറ്റി ചെയര്‍മാന്‍ ഡി ആര്‍ അനില്‍ തുടങ്ങിയവര്‍ ചടങ്ങില്‍ പങ്കെടുത്തു.