കണ്ണൂർ: (KVARTHA) പുല്ലുവെട്ടുന്ന യന്ത്രത്തിൽ കൈ കുടുങ്ങി ഗുരുതരമായി പരിക്കേറ്റ പത്തുവയസ്സുകാരന്റെ അറ്റുപോയ കൈ, കണ്ണൂർ ആസ്റ്റർ മിംസ് ആശുപത്രിയിലെ വിദഗ്ധ ഡോക്ടർമാരുടെ നേതൃത്വത്തിൽ വിജയകരമായി തുന്നിച്ചേർത്തു. ആലക്കോട് സ്വദേശിയായ ആൽബിൻ സാജുവിന്റെ വലതുകൈയാണ് ദാരുണമായി അപകടത്തിൽപ്പെട്ടത്. കൈക്കുഴയ്ക്ക് മുകളിൽ വെച്ച് രണ്ടായി മുറിഞ്ഞുപോയ കൈയുടെ ഒരു ഭാഗം സമീപത്തെ പറമ്പിലേക്കാണ് തെറിച്ചുപോയത്.

അപകടം സംഭവിച്ച ഉടൻ തന്നെ കുട്ടിയെ അടുത്തുള്ള ആശുപത്രിയിൽ എത്തിച്ച് പ്രഥമശുശ്രൂഷ നൽകി. തുടർന്ന്, മൈക്രോവാസ്‌കുലാർ സർജറി സൗകര്യമുള്ള ആസ്റ്റർ മിംസ് ആശുപത്രിയിലേക്ക് റഫർ ചെയ്യുകയായിരുന്നു. അതീവ ഗുരുതരാവസ്ഥയിലാണ് ആൽബിൻ ആശുപത്രിയിൽ എത്തിയത്. മുറിഞ്ഞുപോയ ഭാഗത്ത് മണ്ണും പുല്ലും അഴുക്കും പറ്റി അണുബാധയ്ക്ക് സാധ്യതയുള്ള അവസ്ഥയിലായിരുന്നു. ഇത് നീക്കം ചെയ്ത് വൃത്തിയാക്കുക എന്നത് ഏറെ ശ്രമകരമായിരുന്നു.

ആസ്റ്റർ മിംസിലെ ഓർത്തോപീഡിക് വിഭാഗത്തിലെ ഡോക്ടർമാരുടെ നേതൃത്വത്തിൽ പരിക്കേറ്റ കൈത്തണ്ടയിലെ രണ്ട് അസ്ഥികൾ പ്ലേറ്റ് ഉപയോഗിച്ച് ഉറപ്പിച്ചു. തുടർന്ന്, പ്ലാസ്റ്റിക് സർജറി വിഭാഗം അറ്റുപോയ ഭാഗം തുന്നിച്ചേർക്കുന്ന ശസ്ത്രക്രിയ ആരംഭിച്ചു. രണ്ട് ധമനികൾ, അഞ്ച് സിരകൾ, മൂന്ന് ഞരമ്പുകൾ, 20 സ്നായുക്കൾ എന്നിവ മൈക്രോസ്‌കോപ്പിന്റെ സഹായത്തോടെ വിജയകരമായി തുന്നിച്ചേർത്തു. ഇത്രയും സങ്കീർണമായ ശസ്ത്രക്രിയ വിജയകരമായി പൂർത്തിയാക്കുക എന്നത് അപൂർവമായ നേട്ടമാണെന്ന് പ്ലാസ്റ്റിക് സർജറി വിഭാഗം മേധാവി ഡോ. മധുചന്ദ്ര എച്ച്.എസ്. അഭിപ്രായപ്പെട്ടു.

ഡോ. മധുചന്ദ്ര എച്ച്.എസിനെ കൂടാതെ, പ്ലാസ്റ്റിക് സർജറി വിഭാഗത്തിലെ ഡോ. നിബു കുട്ടപ്പൻ, ഓർത്തോപീഡിക് വിഭാഗത്തിലെ ഡോ. നാരായണപ്രസാദ്, അനസ്തേഷ്യോളജി വിഭാഗത്തിലെ ഡോ. സുപ്രിയ രഞ്ജിത്ത്, പീഡിയാട്രിക് ഇൻ്റൻസിവിസ്റ്റ് ഡോ. സുഹാസ്, എമർജൻസി വിഭാഗത്തിലെ ഡോ. ജിനേഷ് വീട്ടിലകത്ത് എന്നിവരും ശസ്ത്രക്രിയയിൽ പങ്കാളികളായി.

ഈ വാർത്ത ഷെയർ ചെയ്യാനും അഭിപ്രായങ്ങൾ രേഖപ്പെടുത്താനും മറക്കാതിരിക്കുക.

A 10-year-old boy's severed hand was successfully reattached at Aster MIMS Hospital in Kannur after a complex microsurgical procedure.

#RareSurgery, #Microsurgery, #AsterMIMS, #Kannur, #MedicalMiracle, #Reattachment