രാജ്യത്ത് രണ്ടാംഘട്ട കോവിഡ് വ്യാപനം ഏറ്റവും കൂടുതലുണ്ടായത് ഗ്രാമീണ മേഖലയില്‍; രോഗികള്‍ക്ക് നിര്‍ദേശം നല്‍കാന്‍ വിക്ടേഴ്സ് ചാനല്‍ വഴിയും സ്വകാര്യ ചാനലുകള്‍ വഴിയും സൗകര്യമൊരുക്കും, രോഗവ്യാപനം കൂടിയാല്‍ സംസ്ഥാനത്തെ ആരോഗ്യമേഖലയ്ക്ക് വലിയ വെല്ലുവിളിയാണെന്നും മുഖ്യമന്ത്രി

തിരുവനന്തപുരം: (www.kvartha.com 04.05.2021) രാജ്യത്ത് രണ്ടാംഘട്ട കോവിഡ് വ്യാപനം ഏറ്റവും കൂടുതലുണ്ടായത് ഗ്രാമീണ മേഖലയിലാണെന്ന് മുഖ്യമന്ത്രി പിണറായി വിജയന്‍. കേരളത്തിലും ഗ്രാമീണ മേഖലകളില്‍ കോവിഡ് വ്യാപനം കൂടുന്നുണ്ട്. റിട്ടേണിങ് ഓഫിസര്‍മാരെയും കോവിഡ് ഡ്യൂടിക്ക് നിയോഗിക്കും. സംസ്ഥാനത്ത് കോവിഡ് വ്യാപനം ഇിയും കൂടിയേക്കുമെന്നും പിണറായി പറഞ്ഞു.

സംസ്ഥാനത്തെ ഗ്രാമങ്ങളില്‍ ശക്തമായ കോവിഡ് നിയന്ത്രണങ്ങള്‍ നടപ്പാക്കുമെന്നും മുഖ്യമന്ത്രി അറിയിച്ചു. രോഗികള്‍ക്ക് നിര്‍ദേശം നല്‍കാന്‍ വിക്ടേഴ്സ് ചാനല്‍ വഴിയും സ്വകാര്യ ചാനലുകള്‍ വഴിയും സൗകര്യമൊരുക്കുമെന്നും രോഗവ്യാപനം കൂടിയാല്‍ സംസ്ഥാനത്തെ ആരോഗ്യമേഖലയ്ക്ക് അത് വലിയ വെല്ലുവിളിയാണെന്നും മുഖ്യമന്ത്രി അറിയിച്ചു.

മറ്റ് വീടുകളില്‍ സന്ദര്‍ശനം കഴിവതും ഒഴിവാക്കണം. വീടുകളില്‍ പേടിച്ച് വാതിലും ജനലും അടച്ചിടരുത്. വീടുകളില്‍ നല്ല വായുസഞ്ചാരം ഉണ്ടാകണം. സംസ്ഥാനത്ത് കിടക്കകളുടെ എണ്ണം കൂട്ടാന്‍ കെ ടി ഡി സിയുടെ സഹായം തേടും. വാക്സിന്‍ ദൗര്‍ലഭ്യം നികത്താന്‍ കേന്ദ്ര സര്‍കാരിനോട് ആവശ്യപ്പെട്ടതായി മുഖ്യമന്ത്രി അറിയിച്ചു.

കേന്ദ്ര സര്‍കാര്‍ ഇക്കാര്യത്തില്‍ ഉത്തരവാദിത്വത്തില്‍ നിന്ന് ഒഴിഞ്ഞുമാറുന്നത് ശരിയല്ല. ഓക്സിജന്‍ സുഗമമായി ലഭിക്കുന്നെന്ന് ഉറപ്പിക്കാന്‍ ഉദ്യോഗസ്ഥതല കമിറ്റികള്‍ രൂപീകരിക്കും. സ്വകാര്യ ആശുപത്രികളില്‍ 50 ശതമാനം കിടക്കകള്‍ കോവിഡ് രോഗികള്‍ക്ക് ഒഴിച്ചുവയ്ക്കണം. ഇല്ലാത്തവര്‍ക്കെതിരെ നടപടിയെടുക്കും. തിരുവനന്തപുരത്ത് മെഡിക്കല്‍ ഓക്സിജന്‍ സംഭരണം തുടങ്ങി. വ്യായാമത്തിനും പ്രഭാത നടത്തത്തിനും പൊതുഇടങ്ങള്‍ ഉപയോഗിക്കരുതെന്നും മുഖ്യമന്ത്രി അറിയിച്ചു.