നിപ ഭീതി ഒഴിയുന്നു: പാലക്കാട് സാധാരണ നിലയിലേക്ക്, മാസ്ക് നിർബന്ധം
 

പാലക്കാട്‌: (KVARTHA) നിപ വൈറസ് ഭീഷണിയെത്തുടർന്ന് പാലക്കാട് ജില്ലയിൽ ഏർപ്പെടുത്തിയിരുന്ന നിയന്ത്രണങ്ങൾ പൂർണ്ണമായും നീക്കി. പുതിയ നിപ കേസുകളോ രോഗലക്ഷണങ്ങളോ റിപ്പോർട്ട് ചെയ്യാത്ത സാഹചര്യത്തിലാണ് ജില്ലാ ഭരണകൂടം ഈ തീരുമാനം കൈക്കൊണ്ടത്.

കണ്ടെയ്ൻമെന്റ് സോണുകളായി പ്രഖ്യാപിച്ചിരുന്ന 18 വാർഡുകളിലും കുമരംപുത്തൂർ, കാരാക്കുറുശ്ശി, കരിമ്പുഴ, മണ്ണാർക്കാട് മുനിസിപ്പാലിറ്റി എന്നിവിടങ്ങളിലും ഏർപ്പെടുത്തിയിരുന്ന നിയന്ത്രണങ്ങളാണ് ഇപ്പോൾ പിൻവലിച്ചിരിക്കുന്നത്.

കുമരംപുത്തൂർ ചെങ്ങലീരി സ്വദേശിക്ക് നിപ ബാധിച്ച് മരണപ്പെട്ടതിനെ തുടർന്നായിരുന്നു ജില്ലയിൽ കർശന നിയന്ത്രണങ്ങൾ ഏർപ്പെടുത്തിയിരുന്നത്. എന്നാൽ, നിലവിൽ പുതിയ കേസുകളൊന്നും റിപ്പോർട്ട് ചെയ്യപ്പെടാത്തതും രോഗവ്യാപനം തടയാൻ കഴിഞ്ഞതും ആശ്വാസകരമായ സാഹചര്യമാണ് ഒരുക്കിയിരിക്കുന്നത്.

നിയന്ത്രണങ്ങൾ നീക്കിയെങ്കിലും മുൻകരുതലിന്റെ ഭാഗമായി പൊതുവിടങ്ങളിൽ മാസ്ക് ധരിക്കുന്നത് നിർബന്ധമാണെന്ന് ജില്ലാ കളക്ടർ അറിയിച്ചു. അനാവശ്യമായി കൂട്ടംകൂടുന്നത് ഒഴിവാക്കാനും നിർദ്ദേശമുണ്ട്.

നിലവിൽ, നിപ ബാധിതരുമായി സമ്പർക്കത്തിൽ വന്ന 418 പേർ ക്വാറന്റീനിൽ തുടരുകയാണ്. ഐസൊലേഷനിലുണ്ടായിരുന്ന രണ്ടുപേരെ നിരീക്ഷണത്തിൽ നിന്ന് ഒഴിവാക്കിയിട്ടുണ്ട്. ഒരാൾ ഇപ്പോഴും ഐസൊലേഷനിൽ കഴിയുന്നുണ്ട്. 

അതേസമയം, ജില്ലയിൽ ആദ്യമായി നിപ സ്ഥിരീകരിച്ച തച്ചനാട്ടുകര സ്വദേശിനി കോഴിക്കോട് മെഡിക്കൽ കോളേജിൽ ചികിത്സയിൽ തുടരുകയാണ്. ആരോഗ്യവകുപ്പിന്റെയും ജില്ലാ ഭരണകൂടത്തിന്റെയും ജാഗ്രതാനിർദ്ദേശങ്ങൾ പാലിക്കണമെന്ന് അധികൃതർ അഭ്യർത്ഥിച്ചു.

പാലക്കാട്ടെ നിപ നിയന്ത്രണങ്ങൾ നീക്കിയതിനെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Nipah restrictions lifted in Palakkad as no new cases.