റോബോട്ട് സഹായത്തോടെ വൃക്കമാറ്റിവെക്കൽ വിജയകരം; കണ്ണൂർ സ്വദേശിക്ക് പുതുജീവൻ

കണ്ണൂർ: (KVARTHA) ശസ്ത്രക്രിയാ രംഗത്തെ ഏറ്റവും നൂതനമായ കാൽവെപ്പായി, റോബോട്ട് ഉപയോഗിച്ചുള്ള വൃക്ക മാറ്റിവെക്കൽ ശസ്ത്രക്രിയ വിജയകരമായി പൂർത്തിയാക്കി കിംസ് ശ്രീചന്ദ് ആശുപത്രി. ഡിസംബർ 12-നാണ് ഈ റോബോട്ടിക് ശസ്ത്രക്രിയ പൂർത്തിയാക്കിയത്. 

കണ്ണൂർ കണ്ണാടിപ്പറമ്പ് സ്വദേശിയായ 36 വയസുകാരനാണ് ശസ്ത്രക്രിയക്ക് വിധേയനായത്. ഇദ്ദേഹത്തിന് ഭാര്യയാണ് വൃക്ക ദാനം ചെയ്തത്. വൃക്ക സ്വീകരിച്ച യുവാവ് പൂർണ്ണ ആരോഗ്യവാനായി വെള്ളിയാഴ്ച ആശുപത്രി വിട്ടു.

റോബോട്ട് ഉപയോഗിച്ചുള്ള ശസ്ത്രക്രിയയായതിനാൽ ചുരുങ്ങിയ ദിവസങ്ങൾ കൊണ്ട് തന്നെ രോഗി സുഖം പ്രാപിച്ചു എന്നത് പ്രത്യേകതയാണ്. സങ്കീർണ്ണമായ വൃക്കമാറ്റിവെക്കൽ ശസ്ത്രക്രിയ ഡാവിഞ്ചി റോബോട്ടിന്റെ സഹായത്തോടെ വളരെ സൂക്ഷ്മമായും കൃത്യതയോടെയും പൂർത്തിയാക്കാൻ ഡോക്ടർമാർക്ക് സാധിച്ചു. 

ദക്ഷിണേന്ത്യയിൽ റോബോട്ടിക് വൃക്ക ശസ്ത്രക്രിയയിൽ അഗ്രഗണ്യരായ ഡോ. മോഹൻ കേശവമൂർത്തിയുടെയും ഡോ. കാർത്തിക് റാവുവിന്റെയും സാന്നിധ്യമാണ് ഈ ചികിത്സാ രീതി കണ്ണൂരിൽ സാധ്യമാക്കിയത്. നെഫ്രോളജിസ്റ്റ് ഡോ. ടോം ജോസ് കാക്കനാട്ട്, യൂറോളജിസ്റ്റ് ഡോ. അമൽ ജോർജ്, ഡോ. ടി പി ദിൽഷാദ്, ഡോ. എ കെ ഫയാസ്, ഡോ. കെ അഷ്ഫൽ എന്നിവരുടെ നേതൃത്വത്തിലുള്ള വലിയ മെഡിക്കൽ ടീം ശസ്ത്രക്രിയയിൽ പങ്കാളികളായി. 

അതിനൂതനമായ ഡാവിഞ്ചി റോബോട്ടിക് സിസ്റ്റമാണ് ശസ്ത്രക്രിയക്കായി പ്രയോജനപ്പെടുത്തിയത്. ഡയാലിസിസ് രോഗികൾ ഏറെയുള്ള കണ്ണൂർ ജില്ലയിൽ ഇത്തരമൊരു സൗകര്യം ലഭ്യമാകുന്നത് രോഗികൾക്ക് വലിയ ആശ്വാസമാകും.

ചെറിയ മുറിവിലൂടെ വൃക്ക മാറ്റിവെക്കൽ നടത്താൻ കഴിയുന്നു എന്നതാണ് റോബോട്ട് ഉപയോഗിച്ചുള്ള ശസ്ത്രക്രിയയുടെ പ്രധാന ഗുണം. കൂടാതെ രക്തസ്രാവം വളരെ കുറവായിരിക്കുമെന്നതിനൊപ്പം വേദനയും അണുബാധയും കുറയ്ക്കാനും ആശുപത്രി വാസം ലഘൂകരിക്കാനും ഇതിലൂടെ സാധിക്കുന്നു.

വടക്കൻ കേരളത്തിലെ മെഡിക്കൽ രംഗത്ത് ഇതൊരു ചരിത്രപരമായ നാഴികക്കല്ലാണെന്നും, പ്രവർത്തനം തുടങ്ങി ഒരു വർഷത്തിനകം ഇത്തരമൊരു നേട്ടം കൈവരിക്കാനായത് അഭിമാനകരമാണെന്നും കേരള ക്ലസ്റ്റർ സിഇഒ ഫർഹാൻ യാസീൻ അറിയിച്ചു. 

‘അത്യാധുനിക സാങ്കേതികവിദ്യകളും അനുഭവസമ്പത്തുള്ള ഡോക്ടർമാരും നഴ്‌സിങ്, പാരാമെഡിക്കൽ ജീവനക്കാരും ഉൾപ്പെട്ട വിദഗ്ധസംഘത്തിന്റെ മികവാണ് ശസ്ത്രക്രിയ വിജയകരമായി പൂർത്തിയാക്കാൻ സഹായിച്ചത്’ എന്ന് യൂണിറ്റ് മേധാവി ഡോ. ദിൽഷാദ് പറഞ്ഞു.

വടക്കൻ കേരളത്തിന് അഭിമാനമായി മാറിയ ഈ വലിയ നേട്ടം മറ്റുള്ളവരിലേക്കും എത്തിക്കൂ. 

Article Summary: KIMS Sreechand Hospital Kannur successfully completes North Kerala's first robotic kidney transplant.

#RoboticSurgery #KidneyTransplant #KannurMedicalNews #KIMSSreechand #MedicalHistory #KeralaHealth