നീതി തേടി നീതു: കൊഴുപ്പ് നീക്കൽ ശസ്ത്രക്രിയയിലെ പിഴവ് ജീവിതം മാറ്റിമറിച്ചു

തിരുവനന്തപുരം: (KVARTHA) കഴക്കൂട്ടത്തെ ഒരു കോസ്മെറ്റിക് ക്ലിനിക്കിൽ നടത്തിയ കൊഴുപ്പ് നീക്കൽ ശസ്ത്രക്രിയയെ തുടർന്ന് കൈകളിലെയും കാലുകളിലെയും വിരലുകൾ നഷ്ടപ്പെട്ടതായി ഒരു യുവതി പരാതിപ്പെട്ടു. 

കഴക്കൂട്ടം കോസ്മെറ്റിക് ഹോസ്പിറ്റലിൽ ചികിത്സ തേടിയ എം.എസ്. നീതുവാണ് ക്ലിനിക്കിന്റെ ഭാഗത്ത് നിന്ന് ഗുരുതരമായ പിഴവുണ്ടായെന്ന് ആരോപിക്കുന്നത്. ശസ്ത്രക്രിയയ്ക്ക് ശേഷം മതിയായ പരിചരണം ലഭിക്കാത്തതാണ് തന്റെ അവസ്ഥയ്ക്ക് കാരണമെന്ന് നീതു പറയുന്നു.

കഴിഞ്ഞ ഫെബ്രുവരി 22-നാണ് നീതു കൊഴുപ്പ് നീക്കൽ ശസ്ത്രക്രിയയ്ക്ക് വിധേയയായത്. ശസ്ത്രക്രിയ കഴിഞ്ഞ് 24 മണിക്കൂർ പോലും നിരീക്ഷണത്തിൽ നിർത്താതെ വീട്ടിലേക്ക് വിട്ടയച്ചുവെന്ന് അവർ ആരോപിക്കുന്നു. വീട്ടിലെത്തിയ ശേഷം ഭക്ഷണം കഴിച്ചപ്പോൾ ഛർദ്ദിലുണ്ടായതിനെ തുടർന്ന് ആശുപത്രി അധികൃതരെ വിവരമറിയിച്ചെങ്കിലും ഞായറാഴ്ചയായതിനാൽ ആശുപത്രിയില്ലെന്നും, നന്നായി ഭക്ഷണം കഴിച്ച് ഉറങ്ങിയാൽ ക്ഷീണം മാറുമെന്നുമാണ് മറുപടി ലഭിച്ചതെന്നും നീതു പറയുന്നു. 

ക്ഷീണം വർദ്ധിച്ചപ്പോൾ മറ്റൊരു ആശുപത്രിയിൽ കാണിക്കട്ടെയെന്ന് ചോദിച്ചപ്പോൾ അതിന്റെ ആവശ്യമില്ലെന്നും ശസ്ത്രക്രിയയുടെ ക്ഷീണമാണെന്നും ബിപിയിൽ വ്യത്യാസം വരുന്നത് സാധാരണമാണെന്നും നന്നായി നിരീക്ഷിക്കാനുമായിരുന്നു ആശുപത്രിയിൽ നിന്ന് ലഭിച്ച നിർദേശം..

പിന്നീട് ശാരീരിക ബുദ്ധിമുട്ടുകൾ വർദ്ധിച്ചതിനെ തുടർന്ന് പിറ്റേ ദിവസം വീണ്ടും ക്ലിനിക്കിൽ പോയപ്പോൾ ഒരു ട്രിപ്പ് ഇട്ടാൽ പ്രശ്നം തീരുമെന്ന് അധികൃതർ പറഞ്ഞതായും എന്നാൽ ക്ഷീണത്തിന് മാറ്റം വരാത്തതിനാൽ രക്തം കയറ്റണമെന്ന് നിർദ്ദേശിച്ചതായും നീതു വ്യക്തമാക്കി. 

രക്തം കയറ്റിയിട്ടും ആരോഗ്യനില വഷളായതോടെ രാത്രി എട്ട് മണിയോടെ തിരുവനന്തപുരത്തെ അനന്തപുരി ആശുപത്രിയിലേക്ക് മാറ്റുകയായിരുന്നു. ആശുപത്രിയിലെത്തുന്നതിന് തൊട്ടുമുമ്പ് തനിക്ക് ഹൃദയാഘാതമുണ്ടായെന്നും നീതു പറഞ്ഞു. ക്ലിനിക്കിന്റെ ഭാഗത്തുനിന്നുണ്ടായ ഗുരുതരമായ അനാസ്ഥയാണ് തന്റെ ഒമ്പത് വിരലുകൾ നഷ്ടപ്പെടാൻ കാരണമെന്നും, കൃത്യസമയത്ത് വിദഗ്ധ ചികിത്സ ലഭിച്ചിരുന്നെങ്കിൽ ഈ അവസ്ഥ ഒഴിവാക്കാമായിരുന്നുവെന്നും നീതു ആരോപിക്കുന്നു. ശസ്ത്രക്രിയയ്ക്കും തുടർചികിത്സയ്ക്കുമായി 30 ലക്ഷം രൂപയോളം ചെലവായതായും അവർ കൂട്ടിച്ചേർത്തു.

സംഭവത്തിൽ വിശദമായ അന്വേഷണം നടത്തി കുറ്റക്കാർക്കെതിരെ നടപടിയെടുക്കണമെന്നാണ് നീതുവിന്റെ ആവശ്യം. അതേസമയം, ശസ്ത്രക്രിയ നടത്തിയ കഴക്കൂട്ടത്തെ കോസ്മെറ്റിക് ക്ലിനിക്കിന്റെ ക്ലിനിക്കൽ രജിസ്ട്രേഷൻ ലൈസൻസിന് വിരുദ്ധമായി പ്രവർത്തിച്ചതിന് നേരത്തെ റദ്ദാക്കിയിരുന്നതായി അധികൃതർ അറിയിച്ചു. 

എന്നാൽ ക്ലിനിക്ക് ഇപ്പോഴും പ്രവർത്തിക്കുന്നുണ്ടെന്ന് നീതു ചൂണ്ടിക്കാട്ടി. ഈ വിഷയത്തിൽ അധികാരികളുടെ ഭാഗത്തുനിന്ന് കൂടുതൽ വ്യക്തത വരുത്തേണ്ടതുണ്ടെന്നും ശക്തമായ നടപടികൾ സ്വീകരിക്കണമെന്നുമാണ് നീതുവിന്റെയും കുടുംബത്തിന്റെയും ആവശ്യം.

നീതുവിന് നീതി ലഭിക്കുമോ? ഇത്തരം ക്ലിനിക്കുകൾക്കെതിരെ എന്ത് നടപടിയാണ് വേണ്ടത്? നിങ്ങളുടെ അഭിപ്രായം പങ്കുവെക്കുക.

Article Summary: Woman loses fingers after botched fat removal surgery; seeks justice.

#MedicalNegligence #FatRemoval #CosmeticSurgery #KeralaNews #JusticeForNeethu #Thiruvananthapuram