കേരളത്തിലെ ആദ്യ മോട്ടോറൈസ്ഡ് ടാവി ഇംപ്ലാന്റേഷൻ കണ്ണൂർ ആസ്റ്റർ മിംസിൽ വിജയകരമായി പൂർത്തിയാക്കി

കണ്ണൂർ: (KVARTHA) ഹൃദയ വാൽവ് മാറ്റിവെക്കൽ ശസ്ത്രക്രിയയുടെ ചരിത്രത്തിൽ വലിയ മാറ്റങ്ങൾക്ക് വഴിയൊരുക്കിക്കൊണ്ട്, മോട്ടോറൈസ്ഡ് ടാവി ഇംപ്ലാന്റേഷൻ കേരളത്തിലാദ്യമായി കണ്ണൂർ ആസ്റ്റർ മിംസിൽ വിജയകരമായി പൂർത്തിയാക്കി.

കാർഡിയോളജി വിഭാഗം ഡോക്ടർമാരായ ഡോ. പ്ലാസിഡ് സെബാസ്റ്റ്യൻ, ഡോ. രാമകൃഷ്ണൻ, ഡോ. വിജയൻ ഗണേശൻ, ഡോ. അനിൽകുമാർ, ഡോ. ഉമേശൻ, ഡോ. വിനു, കാർഡിയാക് അനസ്തേഷ്യ വിഭാഗം ഡോ. ഗണേഷ് എന്നിവരടങ്ങുന്ന വിദഗ്ധ സംഘത്തിന്റെ നേതൃത്വത്തിലാണ് 69 വയസ്സുകാരനെ മൃത്യുവിൽ നിന്ന് ജീവിതത്തിലേക്ക് തിരികെയെത്തിച്ചത്.

ഹൃദയധമനികളിലെ തടസ്സവുമായി ചികിത്സ തേടിയെത്തിയ രോഗിയെ ആൻജിയോപ്ലാസ്റ്റിക്ക് മുൻപ് നടത്തിയ വിശദ പരിശോധനകളിലാണ് ഹൃദയത്തിന്റെ വാൽവ് ചുരുങ്ങിയതായി കണ്ടെത്തിയത്. വാൽവ് റീപ്ലേസ്‌മെന്റ് മാത്രമായിരുന്നു രോഗിയുടെ മുന്നിലുള്ള ഏക പ്രതിവിധി. 

എന്നാൽ, ബൈപാസ്സ് സർജറിയോടൊപ്പം തുറന്ന ശസ്ത്രക്രിയയിലൂടെ വാൽവ് റീപ്ലേസ്‌മെൻ്റ് നടത്തുന്നത് സങ്കീർണ്ണതകൾക്ക് വഴിയൊരുക്കാനുള്ള സാധ്യത കൂടുതലായിരുന്നു. ഈ സാഹചര്യത്തിലാണ് അധികൃതർ മോട്ടോറൈസ്ഡ് ടാവി റീപ്ലേസ്‌മെൻ്റിന് തീരുമാനമെടുത്തത്.

സാധാരണ ടാവി പ്രക്രിയയിൽ നേർത്ത ട്യൂബ് കാലിലെ ധമനിയിലൂടെ കൈകൊണ്ട് നിയന്ത്രിച്ച് അയോർട്ടിക്ക് വാൽവിൽ എത്തിക്കുകയാണ് പതിവ്. അതിസൂക്ഷ്മമായി കൈകൊണ്ട് നിർവ്വഹിക്കുന്ന ഈ പ്രക്രിയയിൽ ആവശ്യമായി വരുന്ന സമയത്തേക്കാൾ വളരെ വേഗത്തിൽ തന്നെ മോട്ടോറൈസ്ഡ് രീതിയിലൂടെ ടാവി നിർവ്വഹിക്കാൻ സാധിക്കുമെന്നതാണ് പ്രധാന പ്രത്യേകത. 

ഏതെങ്കിലും സാഹചര്യത്തിൽ നിശ്ചിത സ്ഥലത്ത് നിന്ന് അൽപ്പം വ്യതിയാനം സംഭവിച്ചാൽ വീണ്ടും സ്ഥാപിക്കുന്നതിന് അധിക സമയം ആവശ്യമായി വരില്ല എന്നതും ഇതിന്റെ വലിയ സവിശേഷതയാണ്. 

സാധാരണഗതിയിൽ ഇത്തരം പ്രൊസീജ്യറുകൾക്ക് അധിക സമയമെടുക്കുമ്പോൾ രോഗിക്ക് രക്തസമ്മർദ്ദം ഉയരാനും മറ്റുമുള്ള സാധ്യതകൾ കൂടുതലാണ്. 'അത്തരം സങ്കീർണ്ണതകളെ അതിജീവിക്കുവാൻ മോട്ടോറൈസ്ഡ് ടാവി ഇംപ്ലാന്റേഷൻ സഹായകരമാകും', അധികൃതർ അഭിപ്രായപ്പെട്ടു.

സാധാരണ സൂചിവെക്കുന്നത് പോലെ വളരെ നേർത്ത ഒരു ഇംപ്ലാന്റാണ് ഈ പ്രക്രിയയിൽ കടത്തി വിടുന്നത്. അതിനാൽ തന്നെ മുറിവ് സൃഷ്ടിക്കേണ്ടി വരുന്നില്ല, രക്തനഷ്ടമുണ്ടാകുന്നില്ല തുടങ്ങിയ മറ്റ് നേട്ടങ്ങളുമുണ്ട്. 

തുറന്നുള്ള ശസ്ത്രക്രിയ സാധ്യമാകാത്തവർ, പ്രായാധിക്യമുള്ളവർ, മറ്റ് അസുഖങ്ങളുള്ളവർ തുടങ്ങിയവർക്കും മോട്ടോറൈസ്ഡ് ടാവി ഇംപ്ലാന്റ് പ്രയോജനപ്പെടുത്താൻ സാധിക്കും. പ്രൊസീജ്യറിന് വിധേയനായ വ്യക്തി അതിവേഗം തന്നെ സുഖം പ്രാപിക്കുകയും തൊട്ടടുത്ത ദിവസം ടോയ്‌ലെറ്റിലേക്ക് ഉൾപ്പെടെ നടന്നുപോകുവാൻ സാധിക്കുകയും ചെയ്തു.

ഈ സുപ്രധാന വാർത്ത നിങ്ങളുടെ സുഹൃത്തുക്കളുമായി പങ്കുവെച്ച് ആരോഗ്യമേഖലയിലെ ഈ നേട്ടത്തെക്കുറിച്ച് അവരെ അറിയിക്കുക.

Article Summary: First Motorized TAVI successfully completed at Aster MIMS Kannur, setting a new benchmark in heart valve replacement surgery.

#MotorizedTAVI #AsterMIMS #KeralaHealth #HeartSurgery #TAVISuccess #Kannur