മൂന്നാം തരംഗത്തില്‍ രോഗബാധിതര്‍ കൂടുന്നു; രോഗിയുമായി ബന്ധപ്പെട്ട എല്ലാവര്‍ക്കും ക്വാറന്റൈന്‍ വേണ്ട; വെള്ളിയാഴ്ചയും കോവിഡ് കേസുകള്‍ 50,000 ന് മുകളില്‍ തന്നെയെന്നും ആരോഗ്യമന്ത്രി

ഐസിയുവില്‍ 40% കോവിഡ് രോഗികളാണ് ഉള്ളത്. സ്വകാര്യ ആശുപത്രികളിലും രോഗികളുടെ എണ്ണം കുറവാണ്. ഫെബ്രവരി രണ്ടാം ആഴ്ചയോടെ കേസുകള്‍ താഴ്ന്നു തുടങ്ങുമെന്നാണ് പ്രതീക്ഷിക്കുന്നതെന്നും മന്ത്രി വിശദീകരിച്ചു. സംസ്ഥാനത്ത് കോവിഡ് കേസുകള്‍ വെള്ളിയാഴ്ചയും 50,000 ത്തിന് മുകളില്‍ തന്നെയെന്നും മന്ത്രി പറഞ്ഞു.

കോവിഡിന്റെ മൂന്നാം തരംഗത്തില്‍ പ്രതിരോധ തന്ത്രം വ്യത്യസ്തമാണെന്നും മന്ത്രി വിശദീകരിച്ചു. രോഗിയുമായി ബന്ധമുള്ള എല്ലാവര്‍ക്കും ഇനി ക്വറന്റൈന്‍ ആവശ്യമില്ല. കോവിഡ് രോഗിയെ പരിചരിക്കുന്ന ആള്‍ക്ക് മാത്രം ക്വറന്റൈന്‍ മതിയാകും. രോഗനിര്‍ണയത്തിന് ടെലി കണ്‍സള്‍ടേഷന്‍ പരമാവധി ഉപയോഗിക്കണം. വിരമിച്ച ഡോക്ടര്‍മാരുടെ സേവനം ടെലി-കണ്‍സള്‍ടേറ്റഷനു വേണ്ടി ഉപയോഗിക്കും. സന്നദ്ധ സേവനത്തിന് രണ്ടു മാസത്തേക്ക് ഡോക്ടര്‍മാരെ നിയോഗിക്കുമെന്നും മന്ത്രി പറഞ്ഞു.

മുതിര്‍ന്ന പൗരന്മാര്‍, ഒറ്റയ്ക്ക് കഴിയുന്ന കോവിഡ് ബന്ധിതരായ സ്ത്രീകള്‍ എന്നിവര്‍ക്ക് പ്രത്യേക പരിചരണത്തിന് നിര്‍ദേശം നല്‍കിയതായും മന്ത്രി വിശദീകരിച്ചു. ഗര്‍ഭിണികളുടെ പ്രത്യേക ലിസ്റ്റ് തയാറാക്കും. ആവശ്യമായവര്‍ക്ക് പ്രത്യേക പരിചരണം നല്‍കും. കണ്‍ട്രോള്‍ റൂം വെള്ളിയാഴ്ച സജ്ജമാക്കുമെന്നും മന്ത്രി വിശദീകരിച്ചു.

അതിനിടെ കേരളത്തില്‍ സമൂഹവ്യാപനം നടന്നതായുള്ള സാധ്യത തള്ളാതിരുന്ന ആരോഗ്യമന്ത്രി, ലക്ഷണമില്ലാതെ പോസിറ്റിവ് ആയ ആളുകള്‍ സമൂഹത്തില്‍ ഉണ്ടാകുമെന്നും ഫെബ്രവരി രണ്ടാം ആഴ്ചയോടെ കേസുകള്‍ താഴ്ന്നു തുടങ്ങുമെന്നും പറഞ്ഞു.