Outbreak | പാകിസ്‌താനിൽ ആദ്യമായി മങ്കിപോക്സ് റിപ്പോർട്ട് ചെയ്തു; ഇന്ത്യയിലും ജാഗ്രത 

ഇസ്ലാമാബാദ്: (KVARTHA) പാകിസ്‌താനിൽ ആദ്യമായി മങ്കിപോക്സ് അണുബാധ റിപ്പോർട്ട് ചെയ്തു. ഗൾഫ് രാജ്യങ്ങളിൽ നിന്ന് മടങ്ങിയെത്തിയ ഖൈബർ-പഖ്തൂൺഖ്വയിലെ മൂന്ന് പേർക്ക് രോഗം ബാധിച്ചതായാണ് സ്ഥിരീകരിച്ചത്. രോഗബാധിതർ ആരുമായി സമ്പർക്കം പുലർത്തിയെന്ന് പരിശോധിച്ചുവരികയാണെന്നും ആളുകളുടെ സാമ്പിളുകൾ ശേഖരിച്ച് വരികയാണെന്നും ആരോഗ്യ മന്ത്രാലയ വക്താവ് പറഞ്ഞു. വൈറസ് കൂടുതൽ പടരാതിരിക്കാൻ ഇവർ മൂന്ന് പേരും ഇപ്പോൾ ക്വാറൻ്റൈനിൽ കഴിയുകയാണ്. 

ആഫ്രിക്കൻ രാജ്യമായ ഡിമോക്രാറ്റിക് റിപ്പബ്ലിക് ഓഫ് കോംഗോയിൽ 2023 ജനുവരി മുതൽ രോഗം പടർന്നുപിടിച്ചതിനു ശേഷം 27,000 കേസുകളും 1100-ലധികം മരണങ്ങളും റിപ്പോർട്ട് ചെയ്തതോടെ മങ്കിപോക്സ് കേസുകളുടെ വ്യാപനത്തെ തുടർന്ന് ലോകാരോഗ്യ സംഘടന ഈ രോഗത്തെ കഴിഞ്ഞദിവസം ആരോഗ്യ അടിയന്തരാവസ്ഥയായി പ്രഖ്യാപിച്ചിരുന്നു. ബാധിതരിൽ ഭൂരിഭാഗവും കുട്ടികളാണ്. നേരത്തെ ആഫ്രിക്കയ്ക്ക് പുറത്ത് ആദ്യത്തെ മങ്കി കേസ് സ്വീഡനിൽ റിപ്പോർട്ട് ചെയ്തിരുന്നു. ഇതിന് പിന്നാലെയാണ് പാകിസ്താനിലും സ്ഥിരീകരിച്ചിരിക്കുന്നത്.

ലക്ഷണങ്ങൾ

അണുബാധിതമായ മൃഗങ്ങളിൽ നിന്ന് മനുഷ്യരിലേക്ക് പകരുന്ന ഒരു രോഗമാണിത്, എന്നാൽ അടുത്ത ശാരീരിക സമ്പർക്കത്തിലൂടെ മനുഷ്യനിൽ നിന്ന് മനുഷ്യനിലേക്കും പകരാം. ഈ രോഗം പനി, പേശി വേദന, ശരീരത്തില്‍ കുമിളകള്‍ പൊന്തുക എന്നിവയ്ക്ക് കാരണമാകുന്നു. അപൂർവമായ സന്ദർഭങ്ങളിൽ രോഗം മാരകമായേക്കാം. സാധാരണയായി 21 ദിവസത്തിനുള്ളിൽ സാധാരണയായി ലക്ഷണങ്ങൾ ആരംഭിക്കുന്നു.  

ഇന്ത്യയിലെ സാധ്യമായ പ്രത്യാഘാതം

2022 ലെ മധ്യത്തിൽ രോഗം ആദ്യമായി കണ്ടെത്തിയതിനു ശേഷം ഇന്ത്യയിൽ ഏകദേശം 27 മങ്കിപോക്സ്‌  കേസുകൾ റിപ്പോർട്ട് ചെയ്തതിനാൽ പുതിയ സംഭവവികാസം ഇന്ത്യയ്ക്ക് പ്രാധാന്യമർഹിക്കുന്നു. കേസുകളുടെ എണ്ണം താരതമ്യേന കുറവാണെങ്കിലും പുതിയ വൈറസ് വകഭേദങ്ങൾ ആശങ്ക പടർത്തുന്നുണ്ട്. എന്നിരുന്നാലും ഇന്ത്യൻ സർക്കാർ മങ്കിപോക്സിനെതിരെ നിരവധി നടപടികൾ സ്വീകരിച്ചിട്ടുണ്ട്. ഇതിൽ നിരീക്ഷണം, പൊതുജനാരോഗ്യ ഉപദേശങ്ങൾ എന്നിവ ഉൾപ്പെടുന്നു.

#Monkeypox #Pakistan #India #WHO #health #emergency #outbreak #virus #disease #healthalert