പേരൂര്ക്കട ജില്ലാ ആശുപത്രിയില് മിന്നല് സന്ദര്ശനം നടത്തി ആരോഗ്യമന്ത്രി; എത്തിയത് ഔദ്യോഗിക വാഹനം ഉപേക്ഷിച്ച്, മടക്കം 2 മണിക്കൂറോളം ആശുപത്രിയില് ചിലവഴിച്ചശേഷം
Nov 17, 2021, 20:02 IST
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT
തിരുവനന്തപുരം: (www.kvartha.com 17.11.2021) പേരൂര്ക്കട ജില്ലാ ആശുപത്രിയില് മിന്നല് സന്ദര്ശനം നടത്തി ആരോഗ്യ മന്ത്രി വീണാ ജോര്ജ്. രാവിലെ 8.20ന് ആശുപത്രിയിലെത്തിയ മന്ത്രി രണ്ട് മണിക്കൂറോളം അവിടെ ചിലവഴിച്ചു. രാവിലെ ആയതിനാല് തിരക്കായിരുന്നു. ആദ്യം ഒ പി വിഭാഗങ്ങളിലാണ് സന്ദര്ശനം നടത്തിയത്.
ഔദ്യോഗിക വാഹനം ഉപേക്ഷിച്ച് ആരോഗ്യ വകുപ്പ് ഡയറക്ടറോടൊപ്പം അദ്ദേഹത്തിന്റെ വാഹനത്തിലാണ് മന്ത്രി ആശുപത്രിയിലെത്തിയത്. അത്യാഹിത വിഭാഗം, വിവിധ ഒ പികള്, വാര്ഡുകള്, പേ വാര്ഡുകള്, ഇ സി ജി മുറി എന്നിവ സന്ദര്ശിക്കുകയും രോഗികളുടേയും ജീവനക്കാരുടേയും പാരാതികള് കേള്ക്കുകയും ചെയ്തു.
മന്ത്രി എത്തുമ്പോള് ഒഫ്താല്മോളജി ഒ പിയും, ഡെന്റല് ഒ പിയും ഒഴികെ മറ്റ് വിഭാഗങ്ങള് പ്രവര്ത്തിച്ച് തുടങ്ങിയില്ല. ധാരാളം പേര് മെഡിസിന് ഒ പിയില് കാണിക്കാന് കാത്തിരുന്നെങ്കിലും ആ വിഭാഗത്തില് ഡോക്ടര്മാര് ആരും ഇല്ലായിരുന്നു. ഓര്തോ വിഭാഗത്തില് എത്തിയപ്പോഴും ഇതായിരുന്നു അവസ്ഥ. ഏഴ് പേരുള്ള ഗൈനകോളജി വിഭാഗത്തില് ഒ പി ഇല്ലെന്ന് ബോര്ഡ് വച്ചിരുന്നു.
തുടര്ന്ന് ഗൈനകോളജി ഓപറേഷന് തീയേറ്ററിലും പ്രസവ മുറിയിലും ഉള്ള മൂന്ന് ഗൈനകോളജിസ്റ്റുകളെ മന്ത്രി കണ്ടു. ഒ പി വിഭാഗത്തിലെ ഡോക്ടര്മാരെ അന്വേഷിച്ചപ്പോള് പലരും റൗന്ഡ്സിലാണെന്ന വിവരമാണ് ലഭിച്ചത്. ഉടന് തന്നെ മന്ത്രി വാര്ഡുകളിലെത്തി കേസ് ഷീറ്റ് പരിശോധിച്ചപ്പോള് ഡോക്ടര്മാര് അവിടെയും എത്തിയിട്ടില്ലെന്ന് ബോധ്യമായി. വാര്ഡുകളില് റൗന്ഡ്സും കൃത്യമായി നടക്കുന്നില്ലെന്നും കണ്ടെത്തി. ഡോക്ടര്മാര് ഉള്പെടെയുള്ള ജീവനക്കാരുടെ അറ്റന്റന്സ് പരിശോധിക്കുകയും കര്ശന നടപടി സ്വീകരിക്കാന് മന്ത്രി ആരോഗ്യ വകുപ്പ് ഡയറക്ടര്ക്ക് നിര്ദേശം നല്കുകയും ചെയ്തു.
ഒന്പത് മണി വരെ ഒരു ഒ പി കൗണ്ടര് മാത്രമാണ് പ്രവര്ത്തിച്ചിരുന്നത്. ഇ സി ജി മുറി അടച്ചിരിക്കുന്നു. ജീവനക്കാരുടെ കുറവ് പരിഹരിച്ച് എത്രയും വേഗം ഇവ പൂര്ണ തോതില് പ്രവര്ത്തിക്കാന് മന്ത്രി നിര്ദേശം നല്കി. അടിയന്തരമായി ഇ സി ജി ടെക്നീഷ്യനെ നിയമിക്കാനും നിര്ദേശം നല്കി.
ആശുപത്രിയിലെത്തിയ മന്ത്രി പല രോഗികളുമായും സംസാരിച്ചു. അതിലൊരു രോഗി ആശുപത്രിയില് നിന്നും ചികിത്സാ ആനുകൂല്യം ലഭിക്കുന്നില്ലെന്ന് പരാതി പറഞ്ഞു. അവരുടെ രേഖകള് പരിശോധിച്ച് അര്ഹതപ്പെട്ട ആനുകൂല്യം ലഭ്യമാക്കാന് മന്ത്രി നിര്ദേശം നല്കി. ആശുപത്രിയുടെ പ്രവര്ത്തനം സംബന്ധിച്ച് ആരോഗ്യ വകുപ്പ് ഡയറക്ടറോട് മന്ത്രി റിപോര്ട് തേടി.
അടുത്തിടെ തിരുവനന്തപുരം മെഡികല് കോളജില് മന്ത്രി മുന്നറിയിപ്പില്ലാതെ രാത്രി സന്ദര്ശനം നടത്തിയതിന് പിന്നാലെ പ്രവര്ത്തന രഹിതമായിരുന്ന അത്യാധുനിക അത്യാഹിത വിഭാഗം രണ്ടാഴ്ചയ്ക്കുള്ളില് പ്രവര്ത്തനം ആരംഭിച്ചിരുന്നു.
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
