റായ്പൂർ: (KVARTHA) ഛത്തീസ്ഗഡിലെ ബൽറാംപൂർ ജില്ലയിൽ 40 വയസുള്ള ഒരു വ്യക്തിക്ക് ഡിജെ സംഗീതത്തിന്റെ ഉയർന്ന ശബ്ദം കാരണം മസ്തിഷ്ക രക്തസ്രാവം സംഭവിച്ചതായി റിപ്പോർട്ട്. ഉയർന്ന രക്തസമ്മർദ്ദമോ, മറ്റ് ആരോഗ്യപ്രശ്‌നങ്ങളോ ഇല്ലാതിരുന്ന സഞ്ജയ് ജയ്‌സ്വാൾ എന്ന ഈ വ്യക്തിക്കുണ്ടായ ഈ അപൂർവ സംഭവം മെഡിക്കൽ രംഗത്തെ വിദഗ്ധരെ അമ്പരപ്പിച്ചു.

രണ്ടു ദിവസം മുമ്പ്, ജയ്‌സ്വാൾ ഡിജെ വാഹനത്തിൽ ഉപകരണങ്ങൾ കയറ്റുന്നതിനിടയിൽ പെട്ടെന്ന് തലകറക്കുമുണ്ടായെന്ന് ടൈം ഓഫ് ഇന്ത്യ റിപ്പോർട്ട് ചെയ്തു. ആദ്യം അദ്ദേഹം ഇത് അത്ര ഗൗരവമായി എടുത്തില്ല, വീട്ടിലേക്ക് പോയി. എന്നാൽ ആ വൈകുന്നേരം അവസ്ഥ വഷളായി. തുടർന്ന് അദ്ദേഹത്തിന് കഠിനമായ തലവേദനയും ഛർദ്ദിയും അനുഭവപ്പെട്ടു.

അംബികാപൂർ ഗവൺമെൻറ് മെഡിക്കൽ കോളേജിലെ ഇഎൻടി വിഭാഗം അസോസിയേറ്റ് പ്രൊഫസറായ ഡോ. ശൈലേന്ദ്ര ഗുപ്ത, രോഗി ജയ്‌സ്വാൾ അടുത്ത ദിവസം വീൽചെയറിൽ ആശുപത്രിയിൽ എത്തിയിരുന്നതായി പറഞ്ഞു. സിടി സ്കാൻ റിസൾട്ട് അനുസരിച്ച്, ജയ്‌സ്വാളിന്റെ തലച്ചോറിൻറെ പിൻഭാഗത്ത് രക്തം കട്ടപിടിച്ചതായി കണ്ടെത്തി. ഇത് ഒരു രക്തക്കുഴൽ പൊട്ടിയതാകാമെന്നാണ് ഡോക്ടർമാരുടെ അഭിപ്രായം.

സാധാരണയായി ഉയർന്ന രക്തസമ്മർദം, അപകടങ്ങൾ അല്ലെങ്കിൽ പരിക്കുകൾ എന്നിവയാണ് ഇത്തരം സംഭവങ്ങൾക്ക് കാരണം. എന്നാൽ ജയ്‌സ്വാളിന്റെ കാര്യത്തിൽ, ഇത്തരം യാതൊരു മുൻകാല രോഗലക്ഷണങ്ങളും രേഖപ്പെടുത്തിയിട്ടില്ല എന്നത് ഈ സംഭവത്തെ കൂടുതൽ നിഗൂഢമാക്കി.

'ആദ്യം, രോഗി സത്യം പറയാൻ മടിച്ചുനിന്നു. ഒരുപക്ഷേ, ഡിജെയുമായുള്ള തന്റെ ബന്ധം മറച്ചുവെക്കാൻ ആഗ്രഹിച്ചിരിക്കാം. എന്നാൽ ഞങ്ങൾ നിരന്തരം അദ്ദേഹത്തെ പ്രേരിപ്പിച്ചപ്പോൾ, ഉച്ചത്തിലുള്ള സംഗീതം കേട്ടുകൊണ്ട് താൻ ഡിജെയ്ക്ക് സമീപം ജോലി ചെയ്യുകയായിരുന്നുവെന്ന് വെളിപ്പെടുത്തി. അന്നുരാത്രിയോടെ, അദ്ദേഹത്തിന്റെ അവസ്ഥ വഷളായി', ഡോ. ഗുപ്ത പറഞ്ഞു. ഉച്ചത്തിലുള്ള ശബ്ദങ്ങൾ ചിലപ്പോൾ മസ്തിഷ്ക രക്തസ്രാവത്തിന് കാരണമാകുമെന്ന് അദ്ദേഹം കൂട്ടിച്ചേർത്തു.

ശബ്ദമലിനീകരണം നിയന്ത്രിക്കുന്നതിൽ സംസ്ഥാന സർക്കാർ പരാജയപ്പെട്ടതിന് ഛത്തീസ്ഗഡ് ഹൈക്കോടതി കഴിഞ്ഞ വർഷം സർക്കാരിനെ ശാസിച്ചിരുന്നു. പ്രത്യേകിച്ച് ഡിജെ, ആംപ്ലിഫയറുകൾ എന്നിവ ഉപയോഗിക്കുന്നതിലെ അമിത ശബ്ദം പരിഹരിക്കാൻ സ്വീകരിച്ച നടപടികളെക്കുറിച്ച് വിശദമായ സത്യവാങ്മൂലം സമർപ്പിക്കാൻ കോടതി സർക്കാരിനോട് നിർദ്ദേശിച്ചു. തുടർന്ന്, ശബ്ദനിയന്ത്രണം ലംഘിക്കുന്നവർക്കെതിരെ കർശന നടപടികൾ സ്വീകരിക്കുന്നത് സംബന്ധിച്ച്, ചീഫ് സെക്രട്ടറി ജില്ലാ കളക്ടർമാരും പോലീസ് ഉദ്യോഗസ്ഥരും തമ്മിൽ ചർച്ചകൾ നടത്തിയിരുന്നു.

ശബ്ദമലിനീകരണം ഇന്ന് നമ്മൾ നേരിടുന്ന ഏറ്റവും വലിയ പ്രശ്നങ്ങളിൽ ഒന്നാണ്. റോഡിലെ വാഹനങ്ങളുടെ ശബ്ദം, ഫാക്ടറികളിൽ നിന്നുള്ള ശബ്ദം, പാർട്ടികളിലെ ഉച്ചത്തിലുള്ള സംഗീതം ഇവയെല്ലാം നമ്മുടെ ജീവിതത്തെ ദുസ്സഹമാക്കുന്നു. എന്നാൽ ഇത് ശ്രവണശക്തിയെ മാത്രമല്ല ബാധിക്കുന്നത്, മറിച്ച് നമ്മുടെ ആരോഗ്യത്തെ മൊത്തത്തിൽ ബാധിക്കുന്നു എന്നാണ് ഈ സംഭവം ചൂണ്ടിക്കാട്ടുന്നത്.

#noisepollution #healthhazards #brainhemorrhage #djmusic #medicalnews #india