വെറുമൊരു പനിയാണെന്ന് കരുതി തള്ളിക്കളയരുത്! മഴക്കാലത്ത് പടരുന്ന എലിപ്പനിയെ കരുതിയിരിക്കാം, രോഗലക്ഷണങ്ങളും പ്രതിരോധ മാർഗ്ഗങ്ങളും അറിയാം

ഡോ. സ്മിത മുരളീധരൻ

തിരുവനന്തപുരം: (KVARTHA) മഴക്കാലം ശക്തി പ്രാപിച്ചുകൊണ്ടിരിക്കുന്ന ഈ സമയത്ത് സാംക്രമിക രോഗങ്ങളെക്കുറിച്ച് ജനങ്ങൾ അതീവ ജാഗ്രത പുലർത്തേണ്ടതുണ്ട്. നമ്മുടെ നാട്ടിൽ അടുത്തിടെയായി വലിയ തോതിൽ വർധിച്ചുവരുന്ന അസുഖമാണ് എലിപ്പനി. കനത്ത മഴക്കാലത്ത് കൃത്യമായി പ്രതിരോധവും മുൻകരുതലുകളും എടുത്തില്ലെങ്കിൽ എലിപ്പനി കൂടുതലായി പടരുന്നതിന് കാരണമാകാം. ചൂടും മഴയും മാറി മാറി വന്നുകൊണ്ടിരിക്കുന്ന നമ്മുടെ ഈർപ്പം കൂടിയ കാലാവസ്ഥയും വെള്ളം കെട്ടിക്കിടക്കുന്ന സാഹചര്യങ്ങൾ കൂടുതലുള്ളതും എലിപ്പനിക്ക് കാരണമാകുന്ന ബാക്ടീരിയ പെരുകുന്നതിന് വഴിവെക്കുന്നവയാണ്. പ്രത്യേകിച്ച് കാർഷിക മേഖലകളിൽ ജോലി ചെയ്യുന്നവരും ശുചീകരണ തൊഴിലാളികളുമാണ് ഇതിൻ്റെ പ്രധാന ഇരകളാകുന്നത്.

എന്താണ് എലിപ്പനി? പ്രധാന കാരണങ്ങൾ

'ലെപ്റ്റോസ്പൈറ' എന്ന ബാക്ടീരിയ ശരീരത്തിൽ പ്രവേശിക്കുന്നത് വഴിയാണ് എലിപ്പനി അഥവാ ലെപ്റ്റോസ്പിറോസിസ് ഉണ്ടാകുന്നത്. പ്രധാനമായും എലികളുടെ മൂത്രത്തിലൂടെയാണ് ഈ ബാക്ടീരിയ പുറന്തള്ളപ്പെടുന്നത്. വളരെ അപൂർവ്വമായി നായ, പൂച്ച, പശു, പന്നി തുടങ്ങിയ മറ്റ് വളർത്തുമൃഗങ്ങളിൽ നിന്നും ഇത് പകരാം. കനത്ത മഴ പെയ്യുമ്പോൾ ഇവരുടെ വിസർജ്യങ്ങൾ വെള്ളപ്പൊക്കത്തിലും കെട്ടിക്കിടക്കുന്ന വെള്ളത്തിലും മണ്ണിലും കലരുന്നു. മലിനമായ ഈ സാഹചര്യങ്ങളിൽ ബാക്ടീരിയകൾക്ക് ദീർഘകാലം ജീവിക്കാൻ സാധിക്കും. ഈ മലിനജലവുമായി സമ്പർക്കം വരുമ്പോൾ ശരീരത്തിലെ ചർമ്മത്തിലെ മുറിവുകൾ, കണ്ണ്, മൂക്ക്, വായ എന്നിവയിലൂടെ ബാക്ടീരിയ ശരീരത്തിൽ പ്രവേശിക്കാം. മലിനമായ ആഹാരത്തിലൂടെയോ വെള്ളത്തിലൂടെയോ രോഗം പകരാനുള്ള സാധ്യതയുമുണ്ട്.

ശ്രദ്ധിക്കേണ്ട രോഗലക്ഷണങ്ങൾ

പ്രാരംഭ ഘട്ടത്തിൽ ഇതൊരു സാധാരണ പനിയായി തോന്നിപ്പിക്കുമെങ്കിലും ശക്തമായ പനിയും വിറയലും, കടുത്ത തലവേദനയും പ്രകാശത്തിലേക്ക് നോക്കാൻ പ്രയാസവും അനുഭവപ്പെടാം. പേശികളിലെ അസഹനീയമായ വേദന, കണ്ണുകൾക്ക് കടുത്ത ചുവപ്പ് നിറം, ചർദി, വയറുവേദന, വയറിളക്കം, കടുത്ത ക്ഷീണം പോലുള്ള ലക്ഷണങ്ങൾ പ്രത്യേകം ശ്രദ്ധിക്കേണ്ടതാണ്. ഇതിൽ തന്നെ കാൽവണ്ണയിലെ പേശികളിലുണ്ടാകുന്ന കടുത്ത വേദന എലിപ്പനിയുടെ വളരെ പ്രധാനപ്പെട്ട ലക്ഷണങ്ങളിലൊന്നാണ്.

ചിലരിൽ പനി കുറഞ്ഞതിനു ശേഷം രോഗം കൂടുതൽ ഗുരുതരമായ രണ്ടാം ഘട്ടത്തിലേക്ക് കടക്കാം. ഈ ഘട്ടത്തിൽ കണ്ണ്, ചർമ്മം എന്നിവ മഞ്ഞനിറമാവുക, മൂത്രത്തിൻ്റെ അളവ് കുറയാം, കറുത്ത നിറത്തിൽ മലം പോവുകയോ രക്തം ചർദിക്കുകയോ ചെയ്യുക, ശ്വാസതടസ്സം എന്നിവ ഉണ്ടാകാം. ഇത് വൃക്ക, കരൾ എന്നിവയുടെ പ്രവർത്തനത്തെ ബാധിച്ച് മരണത്തിന് വരെ കാരണമായേക്കാം.

പ്രതിരോധ മാർഗ്ഗങ്ങളും മുൻകരുതലുകളും

കൃത്യമായ ശുചിത്വ ശീലങ്ങളിലൂടെയും മുൻകരുതലുകളിലൂടെയും എലിപ്പനിയെ പൂർണ്ണമായും പ്രതിരോധിക്കാൻ സാധിക്കും. കെട്ടിക്കിടക്കുന്ന വെള്ളത്തിലോ ചെളിയിലോ ഇറങ്ങാതിരിക്കാൻ പരമാവധി ശ്രദ്ധിക്കണം. ജോലി ആവശ്യങ്ങൾക്കായി നിർബന്ധമായും ഇറങ്ങേണ്ടി വരുന്നവർ ഗംബൂട്ട്, ഗ്ലൗസ് എന്നിവ കൃത്യമായി ധരിക്കുക. ശരീരത്തിൽ എന്തെങ്കിലും മുറിവുകളുണ്ടെങ്കിൽ വാട്ടർപ്രൂഫ് പ്ലാസ്റ്റർ ഉപയോഗിച്ച് പൂർണ്ണമായും മൂടേണ്ടതാണ്. മലിനജലവുമായി സമ്പർക്കം ഉണ്ടായാൽ ഉടൻ തന്നെ സോപ്പും വൃത്തിയുള്ള വെള്ളവും ഉപയോഗിച്ച് ശരീരം കഴുകണം.

തിളപ്പിച്ചാറ്റിയ വെള്ളം മാത്രം കുടിക്കാൻ ഉപയോഗിക്കുകയും ആഹാരസാധനങ്ങൾ എപ്പോഴും അടച്ചു മൂടിവെക്കുകയും ചെയ്യുക. കിണറുകൾ ക്ലോറിനേഷൻ നടത്തി ശുദ്ധീകരിക്കേണ്ടത് അനിവാര്യമാണ്. എലി നശീകരണത്തിന് മുൻഗണന നൽകുകയും വീടും പരിസരവും എപ്പോഴും വൃത്തിയായി സൂക്ഷിക്കുകയും ചെയ്യുക. മാലിന്യങ്ങൾ അലക്ഷ്യമായി വലിച്ചെറിയുന്നത് എലികൾ പെരുകാൻ കാരണമാകുന്നതിനാൽ വീടുകളിലും പൊതുസ്ഥലങ്ങളിലും ശാസ്ത്രീയമായ മാലിന്യ സംസ്കരണം ഉറപ്പാക്കണം. മലിനജലവുമായി സമ്പർക്കത്തിൽ ഏർപ്പെടുന്നവർ ഡോക്ടറുടെ നിർദേശപ്രകാരം 'ഡോക്സിസൈക്ലിൻ' എന്ന പ്രതിരോധ ഗുളിക നിർബന്ധമായും കഴിക്കേണ്ടതാണ്.

തുടക്കത്തിലേ കണ്ടെത്തിയാൽ ആൻ്റിബയോട്ടിക്കുകൾ ഉപയോഗിച്ച് എലിപ്പനി പൂർണ്ണമായും ഭേദമാക്കാൻ കഴിയും. അതിനാൽ ഈ മഴക്കാലത്ത് പനി വന്നാൽ സ്വയംചികിത്സ പൂർണ്ണമായും ഒഴിവാക്കി, ഉടൻ തന്നെ അടുത്തുള്ള ആരോഗ്യ കേന്ദ്രത്തിൽ എത്തി ഡോക്ടറുടെ സേവനം തേടാൻ മടിക്കരുത്.

കൊച്ചി ആസ്റ്റർ മെഡ്‌സിറ്റിയിലെ ഇന്റേണൽ മെഡിസിൻ വിഭാഗത്തിലെ സീനിയർ കൺസൾട്ടന്റ് ആണ് ലേഖിക 

ഈ ആരോഗ്യവിവരം നിങ്ങളുടെ സുഹൃത്തുക്കൾക്കും പങ്കുവെക്കുക. പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: The article explains the causes, symptoms, and preventive measures for Leptospirosis (Rat fever) during the monsoon season, urging people to maintain hygiene, use protective gear, take Doxycycline if exposed, and seek immediate medical help instead of self-medication.

#Leptospirosis #KeralaHealth #MonsoonDiseases #RatFever #Doxycycline #HealthTips #AmmuNews