പനിപ്പേടിയിൽ കേരളം; പ്രതിദിനം ചികിത്സ തേടുന്നത് 15,000 പേർ, ശുചീകരണ പ്രവർത്തനങ്ങളിൽ സർക്കാരിന് വീഴ്ചയെന്ന് വിമർശനം

തിരുവനന്തപുരം: (KVARTHA) സംസ്ഥാനത്ത് കാലവർഷം തുടങ്ങിയതോടെ പനിബാധിതരുടെ എണ്ണത്തിൽ വലിയ വർധന. കഴിഞ്ഞ രണ്ടാഴ്ചയ്ക്കുള്ളിൽ ഒന്നര ലക്ഷത്തോളം പേരാണ് പനി ബാധിച്ച് വിവിധ ആശുപത്രികളിൽ ചികിത്സ തേടിയത്. ഇതിൽ സാധാരണ പനിക്ക് പുറമെ ഡെങ്കിപ്പനിയും മറ്റ് ജലജന്യ രോഗങ്ങളും ഉൾപ്പെടുന്നു. ഷിഗെല്ല രോഗബാധയും മരണവും സ്ഥിരീകരിച്ച സാഹചര്യത്തിൽ ആരോഗ്യ വകുപ്പ് അതീവ ജാഗ്രതാ നിർദേശം നൽകിയിട്ടുണ്ട്.

ഇതിനോടകം 13 പേരാണ് സംസ്ഥാനത്ത് പനി ബാധിച്ച് മരിച്ചത്. പ്രതിദിനം 15,000-ത്തോളം രോഗികൾ സർക്കാർ ആശുപത്രികളിൽ മാത്രം ചികിത്സ തേടിയെത്തുന്നുണ്ട്. തദ്ദേശ സ്വയംഭരണ സ്ഥാപനങ്ങളെ ഏകോപിപ്പിക്കുന്നതിലും മഴക്കാലപൂർവ ശുചീകരണ പ്രവർത്തനങ്ങൾ കൃത്യസമയത്ത് നടപ്പിലാക്കുന്നതിലും സർക്കാരിന് സംഭവിച്ച ഗുരുതരമായ പാളിച്ചയാണ് ജനങ്ങളെ വലിയ ആരോഗ്യ പ്രതിസന്ധിയിലേക്ക് തള്ളിവിട്ടതെന്ന വിമർശനം ശക്തമാണ്. പുതിയ സർക്കാർ അധികാരമേറ്റ് ഒരു മാസം പിന്നിട്ടിട്ടും ജനങ്ങളുടെ ജീവന് ആവശ്യമായ പരിഗണന നൽകുന്നില്ലെന്ന ആക്ഷേപവും പ്രതിപക്ഷമുൾപ്പെടെ ഉന്നയിക്കുന്നുണ്ട്.

ഇതിനിടയിൽ ജനങ്ങളിൽ ഭീതി വർധിപ്പിച്ചുകൊണ്ട് ഷിഗെല്ല രോഗബാധയും മരണവും റിപ്പോർട്ട് ചെയ്തിട്ടും കാര്യക്ഷമമായ ഒരു പ്രതിരോധ യജ്ഞം പോലും പ്രഖ്യാപിക്കാൻ ആരോഗ്യ വകുപ്പ് ഇതുവരെ തയാറായിട്ടില്ല. മഴ ശക്തമാകുന്ന വരും ദിവസങ്ങളിൽ രോഗവ്യാപനം കൂടുതൽ രൂക്ഷമാകുമെന്നാണ് ആരോഗ്യ വിദഗ്ധർ നൽകുന്ന മുന്നറിയിപ്പ്.

നാട്ടിലെ വാർത്തകൾ  അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്. 

Article Summary: Kerala is facing a severe health crisis as fever cases surge with the onset of the monsoon. Over 1.5 lakh people have sought treatment in the past two weeks, and 13 deaths have been reported, prompting strong criticism against the newly formed government for failing to conduct effective pre-monsoon cleaning and disease prevention drives.

#KeralaHealth #FeverOutbreak #DengueKerala #Shigella #MonsoonDiseases #KeralaNews #AnjanaNews