കേരളത്തിന് അഭിമാന നിമിഷം: 251 ആശുപത്രികൾക്ക് ദേശീയ ഗുണനിലവാര അംഗീകാരം
 

(KVARTHA) സംസ്ഥാനത്തെ 11 ആരോഗ്യ സ്ഥാപനങ്ങൾക്ക് കൂടി ദേശീയ ഗുണനിലവാര അംഗീകാരങ്ങൾ ലഭിച്ചതായി ആരോഗ്യ വകുപ്പ് മന്ത്രി വീണാ ജോർജ് അറിയിച്ചു. ഇതോടെ സംസ്ഥാനത്ത് ആകെ 251 ആരോഗ്യ സ്ഥാപനങ്ങൾക്കാണ് നാഷണൽ ക്വാളിറ്റി അഷ്വറൻസ് സ്റ്റാൻഡേർഡ്‌സ് (എൻ.ക്യു.എ.എസ്.) അംഗീകാരം ലഭിച്ചത്. ആരോഗ്യ മേഖലയിലെ വികസന മുന്നേറ്റത്തിന്റെ നിർണായകമായ തെളിവാണിതെന്ന് മന്ത്രി പറഞ്ഞു.

സംസ്ഥാനത്തെ 8 ജില്ലാ ആശുപത്രികൾ, 6 താലൂക്ക് ആശുപത്രികൾ, 13 സാമൂഹികാരോഗ്യ കേന്ദ്രങ്ങൾ, 46 നഗര കുടുംബാരോഗ്യ കേന്ദ്രങ്ങൾ, 162 കുടുംബാരോഗ്യ കേന്ദ്രങ്ങൾ, 16 ജനകീയ ആരോഗ്യ കേന്ദ്രങ്ങൾ എന്നിവയാണ് എൻ.ക്യു.എ.എസ്. അംഗീകാരം നേടിയത്.

പുതുതായി അംഗീകാരം ലഭിച്ച ആരോഗ്യ സ്ഥാപനങ്ങളും അവ നേടിയ സ്‌കോറുകളും താഴെക്കൊടുക്കുന്നു:

● കോഴിക്കോട് ജനറൽ ആശുപത്രി (90.66%)

● മലപ്പുറം തിരൂരങ്ങാടി താലൂക്ക് ആശുപത്രി (91.84%)

● എറണാകുളം കുമ്പളങ്ങി സാമൂഹികാരോഗ്യ കേന്ദ്രം (96.90%)

● എറണാകുളം പനങ്ങാട് കുടുംബാരോഗ്യ കേന്ദ്രം (95.83%)

● കോഴിക്കോട് അരിക്കുളം കുടുംബാരോഗ്യ കേന്ദ്രം (95.58%)

● മലപ്പുറം പൂക്കോട്ടുമണ്ണ ജനകീയ ആരോഗ്യ കേന്ദ്രം (85.26%)

● മലപ്പുറം മേലങ്ങാടി ജനകീയ ആരോഗ്യ കേന്ദ്രം (82.77%)

● കോഴിക്കോട് കക്കാടംപൊയിൽ ജനകീയ ആരോഗ്യ കേന്ദ്രം (81.99%)

● കോഴിക്കോട് കൂമ്പാറ ജനകീയ ആരോഗ്യ കേന്ദ്രം (82.89%)

● കോഴിക്കോട് പൊന്നാങ്കയം ജനകീയ ആരോഗ്യ കേന്ദ്രം (94.89%)

● കണ്ണൂർ മൊറാഴ ജനകീയ ആരോഗ്യ കേന്ദ്രം (92.65%)

കോഴിക്കോട് ജനറൽ ആശുപത്രിക്ക് എൻ.ക്യു.എ.എസ്., ലക്ഷ്യ, മുസ്‌കാൻ അംഗീകാരങ്ങൾ ഒന്നിച്ച് ലഭിച്ചു. ഗർഭിണികൾക്കായുള്ള ഓപ്പറേഷൻ തീയേറ്ററിന് 90.38% സ്‌കോറും ലേബർ റൂമിന് 88.85% സ്‌കോറും ലഭിച്ചു. മുസ്‌കാൻ വിഭാഗത്തിൽ 92.07% സ്‌കോറും നേടി. തിരൂരങ്ങാടി താലൂക്ക് ആശുപത്രിയിലെ ലേബർ റൂമിന് 89% സ്‌കോറോടെ ലക്ഷ്യ സർട്ടിഫിക്കേഷനും ലഭിച്ചു.

മാതൃ-ശിശു മരണനിരക്ക് കുറയ്ക്കുന്നതിനും സർക്കാർ ആശുപത്രികളിലെ ഡെലിവറി പോയിന്റുകളിൽ ഗർഭിണികൾക്കും നവജാത ശിശുക്കൾക്കും മികച്ച പരിചരണം ഉറപ്പാക്കുന്നതിനുമുള്ള ഗുണനിലവാര മാനദണ്ഡമാണ് 'ലക്ഷ്യ' അക്രഡിറ്റേഷൻ പ്രോഗ്രാം. 

ഇതുവരെ സംസ്ഥാനത്ത് 15 ആശുപത്രികൾക്കാണ് ലക്ഷ്യ സർട്ടിഫിക്കേഷൻ ലഭിച്ചത്. ഇതിൽ 3 മെഡിക്കൽ കോളേജുകൾ, 9 ജില്ലാ ആശുപത്രികൾ, 3 താലൂക്ക് ആശുപത്രികൾ എന്നിവ ഉൾപ്പെടുന്നു.

നവജാത ശിശുക്കളുടെയും കുട്ടികളുടെയും രോഗാവസ്ഥയും മരണനിരക്കും കുറയ്ക്കുന്നതിനും ജനനം മുതൽ 12 വയസ്സ് വരെയുള്ള കുട്ടികൾക്ക് പൊതുജനാരോഗ്യ കേന്ദ്രങ്ങളിൽ മികച്ച ശിശുസൗഹൃദ സേവനങ്ങൾ ഉറപ്പാക്കുന്നതിനും ലക്ഷ്യമിടുന്ന പദ്ധതിയാണ് 'മുസ്‌കാൻ'. 

സംസ്ഥാനത്ത് ഇതുവരെ 6 ആരോഗ്യ സ്ഥാപനങ്ങൾക്ക് മുസ്‌കാൻ സർട്ടിഫിക്കേഷൻ ലഭിച്ചു. ഇതിൽ 2 മെഡിക്കൽ കോളേജുകളും 4 ജില്ലാ ആശുപത്രികളും ഉൾപ്പെടുന്നു.
 

കേരളത്തിന്റെ ആരോഗ്യമേഖലയിലെ ഈ നേട്ടത്തെക്കുറിച്ച് നിങ്ങളുടെ അഭിപ്രായം അറിയിക്കുക. ഈ വാർത്ത നിങ്ങളുടെ സുഹൃത്തുക്കളുമായി ഷെയർ ചെയ്യൂ.

Article Summary: 251 Kerala hospitals receive national quality accreditation.

#KeralaHealth #NQAS #KeralaHospitals #HealthDepartment #VeenaGeorge #QualityHealth