ഭക്ഷ്യപാനീയ വിതരണ സ്ഥാപനങ്ങളിൽ പരക്കെ പരിശോധന; 75 കടകൾക്ക് നോട്ടീസ്, 3 കടകൾ പൂട്ടാൻ നിർദേശം

കണ്ണൂർ: (KVARTHA) ജില്ലാ ആരോഗ്യ വകുപ്പിന്റെ ആരോഗ്യ ജാഗ്രത പ്രവർത്തന പരിപാടിയുടെ ഭാഗമായി ആരോഗ്യ വകുപ്പിന്റെ നേരിട്ടുള്ള 105 പ്രത്യേക സ്ക്വാഡുകൾ ജില്ലയിലെ വിവിധ ഭക്ഷ്യ പാനീയ വിതരണ സ്ഥാപനങ്ങളിൽ വ്യാപകമായ പരിശോധന നടത്തി. ഹോട്ടലുകൾ, കൂൾബാറുകൾ, ബേക്കറികൾ, ജ്യൂസ് കടകൾ, തട്ടുകടകൾ, കരിമ്പിൻ ജ്യൂസ് കടകൾ ഉൾപ്പെടെ ആകെ 1,092 സ്ഥാപനങ്ങളിലാണ് ഒരേസമയം പരിശോധനകൾ നടന്നത്. 

പരിശോധനയിൽ വൃത്തിഹീനമായ സാഹചര്യത്തിൽ ഭക്ഷണം പാചകം ചെയ്തതായി കണ്ടെത്തിയതിനും, ശുചിത്വ കുറവ്, ജീവനക്കാരുടെ ഹെൽത്ത് കാർഡ്, പ്രവർത്തന ലൈസൻസ്, ജലഗുണനിലവാര സർട്ടിഫിക്കറ്റ് എന്നിവ കൃത്യമായി സൂക്ഷിക്കാത്തതുമായ 75 സ്ഥാപനങ്ങൾക്ക് പുതിയ പൊതുജനാരോഗ്യ നിയമം 2023 പ്രകാരം അടിയന്തര ലീഗൽ നോട്ടീസ് കൈമാറി. 

മൂന്ന് കടകൾ അടിയന്തരമായി പൂട്ടിച്ചു

ഗുരുതരമായ നിയമലംഘനങ്ങളും വൃത്തിഹീനമായ സാഹചര്യങ്ങളും തുടർച്ചയായി കണ്ടെത്തിയതിനെ തുടർന്ന് ജില്ലയിലെ പ്രമുഖ ഹോട്ടൽ, ബേക്കറി, ജ്യൂസ് കട, തട്ടുകടകൾ ഉൾപ്പെടെയുള്ള മൂന്ന് സ്ഥാപനങ്ങൾ പൂർണ്ണമായും അടച്ചുപൂട്ടാൻ ഹെൽത്ത് ഇൻസ്പെക്ടർമാരുടെ സംഘം കർശ്ശെനമായ നിർദേശം നൽകി.

ഇതിനുപുറമെ പൊതുസ്ഥലങ്ങളിലെ പുകവലി തടയുന്നതിന്റെ ഭാഗമായി കടകളിൽ പുകവലി നിരോധിത ബോർഡ് കൃത്യമായി സ്ഥാപിക്കാത്ത 121 കടകളിൽ നിന്ന് ആകെ 10,600 രൂപ നിലവിലെ പുകവലി നിരോധന നിയമ പ്രകാരം സ്പോട്ട് ഫൈനായി ഈടാക്കുകയും ചെയ്തിട്ടുണ്ട്. ഹെൽത്ത് കാർഡുകളുടെ വ്യാജ പതിപ്പുകൾ തടയുന്നതിനും ജലശുദ്ധി ഉറപ്പാക്കുന്നതിനും അതോറിറ്റി പ്രത്യേക നിർദ്ദേശങ്ങൾ നൽകി.

പരിശോധനകൾ ഇനിയും ശക്തമാക്കും

പൊതുജനങ്ങളുടെ ആരോഗ്യ സുരക്ഷ മുൻനിർത്തിയും വിപണിയിലെ ഭക്ഷ്യ ശുചിത്വം പൂർണ്ണമായി ഉറപ്പുവരുത്തുന്നതിനുമായി വരും ദിവസങ്ങളിലും പരിശോധനകൾ കൂടുതൽ രീതിയിൽ ശക്തിപ്പെടുത്തുമെന്ന് ജില്ലാ മെഡിക്കൽ ഓഫീസർ ഇൻചാർജ് ഡോ. കെ.സി. സച്ചിൻ അറിയിച്ചു.

ആരോഗ്യ വകുപ്പ് നിഷ്കർഷിച്ചിട്ടുള്ള കർശനമായ ആരോഗ്യ മാനദണ്ഡങ്ങളും ലൈസൻസ് വ്യവസ്ഥകളും കൃത്യമായി പാലിക്കാത്ത സ്ഥാപനങ്ങൾക്കെതിരെ വരും ദിവസങ്ങളിൽ ലൈസൻസ് റദ്ദാക്കൽ ഉൾപ്പെടെയുള്ള നിയമനടപടികൾ സ്വീകരിക്കുമെന്നും അദ്ദേഹം വ്യാപാരികൾക്ക് താക്കീത് നൽകി. മഴക്കാലം മുന്നിൽക്കണ്ട് പകർച്ചവ്യാധികൾ തടയുന്നതിനുള്ള പ്രതിരോധ പ്രവർത്തനങ്ങളുടെ ഭാഗമായിട്ടാണ് ഈ അടിയന്തര നടപടി.

ഹോട്ടലുകളിലെയും ജ്യൂസ് കടകളിലെയും പുതുക്കിയ പരിശോധനാ വിവരങ്ങൾ നിങ്ങളുടെ സുഹൃത്തുക്കളിലേക്കും വാട്സാപ്പ് ഗ്രൂപ്പുകളിലേക്കും ഷെയർ ചെയ്യൂ. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: The Kannur District Health Department conducted inspections across 1,092 food eateries using 105 squads, issuing legal notices to 75 shops and shutting down 3 under the Public Health Act 2026.

#KannurNews #FoodSafetyKerala #HealthDepartment #HotelInspection #PublicHealthAct #KochiBusiness #BreakingNews #2026