നിലമ്പൂർ: (KVARTHA) വഴിക്കടവ് പഞ്ചായത്തിൽ മഞ്ഞപ്പിത്തം പടർന്നു പിടിക്കുന്നത് ആശങ്കയ്‌ക്ക് ഇടയാക്കുന്നു. ഈ മാസം മാത്രം 20-ലധികം പേർക്ക് രോഗം സ്ഥിരീകരിച്ചിട്ടുണ്ട്. വിദ്യാർത്ഥികൾ ഉൾപ്പെടെ നിരവധി പേർ ചികിത്സയിലാണ്.

കെട്ടുങ്ങൽ പ്രദേശം ഏറ്റവും കൂടുതൽ ബാധിതമായിട്ടുണ്ട്. ഒരേ കുടുംബത്തിൽ നിന്നു തന്നെ ഒന്നിലധികം പേർക്ക് രോഗം ബാധിച്ചതായി റിപ്പോർട്ടുകൾ പുറത്തുവന്നിട്ടുണ്ട്. സമീപ പഞ്ചായത്തുകളിലും രോഗം റിപ്പോർട്ട് ചെയ്തിട്ടുണ്ടെങ്കിലും രോഗികളുടെ എണ്ണത്തില്‍ കുറവുണ്ട്. എടക്കര പഞ്ചായത്തിലും മൂന്ന് പേർക്ക് രോഗം സ്ഥിരീകരിച്ചിട്ടുണ്ട്.

ഈ സാഹചര്യത്തിൽ, ചൊവ്വാഴ്ച വഴിക്കടവ് പഞ്ചായത്തിൽ അടിയന്തര യോഗം വിളിച്ചിട്ടുണ്ടെന്ന് കുടുംബാരോഗ്യം മെഡിക്കൽ ഓഫീസർ ഡോ. പി.എ. ചാച്ചി അറിയിച്ചു. രോഗബാധിത പ്രദേശങ്ങളിൽ പ്രതിരോധ നടപടികൾ ശക്തമാക്കിയിട്ടുണ്ടെന്നും മെഡിക്കല്‍ ഓഫിസർ അറിയിച്ചു.. വെള്ളത്തിന്റെ സാമ്പിളുകൾ പരിശോധനയ്ക്ക് അയച്ചിട്ടുണ്ട്. കിണറുകൾ ക്ലോറിനേറ്റ് ചെയ്യുകയും ജനങ്ങളെ ബോധവൽക്കരിക്കുകയും ചെയ്യുന്ന പ്രവർത്തനങ്ങൾ തുടങ്ങിയിട്ടുണ്ട്. 

അതേസമയം, പ്രതിരോധ പ്രവർത്തനങ്ങൾ പര്യാപ്തമല്ലെന്നും ആക്ഷേപം ഉയർന്നിട്ടുണ്ട്. രോഗം വ്യാപകമായിട്ടും ആവശ്യമായ നടപടികൾ സ്വീകരിക്കുന്നില്ലെന്നാണ് പ്രദേശവാസികളുടെ പരാതി.

മഞ്ഞപ്പിത്തം: അറിയേണ്ട കാര്യങ്ങൾ

മലിനമായ വെള്ളം കുടിക്കുന്നതു മൂലമാണ് സാധാരണയായി മഞ്ഞപ്പിത്തം പകരുന്നത്. പനി, ക്ഷീണം, വിശപ്പ് നഷ്ടം, ഓക്കാനം, ഛർദ്ദി, മൂത്രത്തിന്റെ നിറം മാറൽ എന്നിവയാണ് പ്രധാന ലക്ഷണങ്ങൾ. മഞ്ഞപ്പിത്തം ബാധിച്ചാൽ ഉടൻ തന്നെ ഡോക്ടറെ കാണണം.

എങ്ങനെ തടയാം?

● തിളപ്പിച്ചാറ്റിയ വെള്ളം മാത്രം കുടിക്കുക
● വ്യക്തി ശുചിത്വം പാലിക്കുക
● പഴങ്ങളും പച്ചക്കറികളും നന്നായി കഴുകി ഉപയോഗിക്കുക
● മലിനമായ സ്ഥലങ്ങളിൽ നിന്നും വെള്ളം കുടിക്കാതിരിക്കുക

ഈ വാർത്ത പ്രചരിപ്പിച്ച് ആരോഗ്യത്തെ പ്രോത്സാഹിപ്പിക്കുക. ആരോഗ്യത്തെക്കുറിച്ചുള്ള അറിവ് പങ്കിടുക.  നിങ്ങളുടെ അഭിപ്രായങ്ങൾ  ഞങ്ങൾക്ക് പ്രധാനമാണ്.

#Jaundice #Kerala #PublicHealth #CommunityAwareness #EmergencyResponse #Vazhikadavu