പുതിയ ഹോട്ടലിൽനിന്ന് ഭക്ഷണം കഴിച്ചതിന് പിന്നാലെ നിരവധി പേർക്ക് മഞ്ഞപ്പിത്തം; ഒരാൾ മരിച്ചു, ഭക്ഷണശാലകളിൽ കർശന പരിശോധനയുമായി അധികൃതർ

മലപ്പുറം: (KasargodVartha) വണ്ടൂർ ടൗണിൽ മഞ്ചേരി റോഡിൽ പുതുതായി ആരംഭിച്ച ഹോട്ടലിൽനിന്ന് ഭക്ഷണം കഴിച്ച നൂറ് പേർക്ക് മഞ്ഞപ്പിത്ത ബാധ (Hepatitis A) കണ്ടെത്തിയതിനെ തുടർന്ന് പ്രതിരോധ പ്രവർത്തനങ്ങൾ ഊർജിതമാക്കി ആരോഗ്യവകുപ്പ്. രോഗബാധയെ തുടർന്ന് ചികിത്സയിൽ കഴിഞ്ഞിരുന്ന കാളികാവ് സ്വദേശി കഴിഞ്ഞ ദിവസം മരിച്ചിരുന്നു.

നിലവിൽ 18 പേരാണ് വിവിധയിടങ്ങളിലായി ചികിത്സയിലുള്ളത്. ഇതിൽ കോഴിക്കോട് ആശുപത്രിയിൽ കഴിയുന്ന ഒരാളുടെ നില ഗുരുതരമാണെന്നാണ് വിവരം.

ആദ്യം രോഗം ബാധിച്ചത് ജീവനക്കാർക്ക്

ഒക്ടോബർ 3 മുതൽ കഴിഞ്ഞ ദിവസം വരെ ഈ പുതിയ ഹോട്ടലിൽനിന്നും ഭക്ഷണം കഴിച്ചവരിലാണ് പ്രധാനമായും രോഗം കണ്ടെത്തിയത്. 2026 ഒക്ടോബർ 11-ന് ഹോട്ടൽ ജീവനക്കാർക്കാണ് ആദ്യം രോഗം സ്ഥിരീകരിച്ചത്. വണ്ടൂർ, തിരുവാലി, കാളികാവ് പഞ്ചായത്തിലുള്ളവർക്കാണ് വ്യാപകമായി മഞ്ഞപ്പിത്തം സ്ഥിരീകരിച്ചിട്ടുള്ളത്.

പ്രതിരോധ പ്രവർത്തനങ്ങൾക്കായി പ്രത്യേക സ്ക്വാഡുകളെ ഉപയോഗിച്ച് പഞ്ചായത്തുകൾ വീടുകൾ തോറും കയറിയിറങ്ങി ബോധവൽക്കരണവും പരിശോധനയും തുടങ്ങി. തട്ടുകടകൾ ഉൾപ്പെടെയുള്ള ഭക്ഷണശാലകളിൽ ഉപയോഗിക്കുന്ന വെള്ളത്തിൻ്റെ ശുചിത്വം ഉറപ്പാക്കാനും ആരോഗ്യവകുപ്പ് അടിയന്തര നടപടി സ്വീകരിച്ചിട്ടുണ്ട്.

നഗരസഭയുടെ വ്യാപക പരിശോധന

അതേസമയം പകർച്ചവ്യാധി പ്രതിരോധത്തിൻ്റെ ഭാഗമായി വണ്ടൂർ നഗരത്തിലെ റെസ്റ്റോറൻ്റുകൾ, കൂൾബാർ, കാൻ്റീൻ എന്നിവിടങ്ങളിൽ ആരോഗ്യ വിഭാഗം പരിശോധന നടത്തി. നഗരസഭയുടെ സമീപ പ്രദേശങ്ങളിൽ മഞ്ഞപ്പിത്തം വ്യാപിക്കുന്ന സാഹചര്യത്തിലായിരുന്നു പരിശോധന. നിയമലംഘനങ്ങളും വൃത്തിഹീനമായ സാഹചര്യവും കണ്ടെത്തിയ ഏതാനും സ്ഥാപനങ്ങൾക്ക് നഗരസഭ കർശന നോട്ടിസ് നൽകി.

നഗരസഭ ക്ലീൻ സിറ്റി മാനേജർ ജെ എ നുജൂമിൻ്റെ നേതൃത്വത്തിൽ രണ്ട് സ്ക്വാഡുകളാണ് പരിശോധനയ്ക്ക് നേതൃത്വം നൽകിയത്. വരും ദിവസങ്ങളിലും നഗരത്തിൽ പരിശോധന കർശനമായി തുടരുമെന്ന് നഗരസഭാ സെക്രട്ടറി വൈ പി മുഹമ്മദ് അശ്റഫ് അറിയിച്ചു.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: Jaundice outbreak in Malappuram Wandoor hotel leaves one dead, 100 infected.

#Kvartha #WandoorNews #MalappuramNews #JaundiceOutbreak #HealthDepartmentKerala #FoodSafetyKerala #HepatitisA #MalayalamNews #SobhaNews