ഗാന്ധിനഗർ: (KVARTHA) കർണാടകയിലെ ബെംഗളൂരുവിൽ രണ്ട് ഹ്യൂമൻ മെറ്റന്യൂമോ വൈറസ് (HMPV) കേസുകൾ സ്ഥിരീകരിച്ചതിന് പിന്നാലെ ഗുജറാത്തിലെ അഹമ്മദാബാദിൽ മൂന്നാമത്തെ സംശയാസ്പദമായ കേസ് റിപ്പോർട്ട് ചെയ്തതായി പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു. ചന്ദ്ഖേഡയിലെ ഒരു സ്വകാര്യ ആശുപത്രിയിൽ രണ്ട് മാസം പ്രായമുള്ള കുട്ടിക്ക് വൈറസ് ബാധിച്ചതായി ഗുജറാത്ത് സമാചാർ റിപ്പോർട്ട് ചെയ്തു. 

നേരത്തെ, ഇന്ത്യൻ കൗൺസിൽ ഓഫ് മെഡിക്കൽ റിസർച്ച് (ICMR) ചൈനയിൽ വ്യാപകമായി പടരുന്ന രണ്ട് 
എച്ച്എംപിവി കേസുകൾ സ്ഥിരീകരിച്ചിരുന്നു. ബംഗളൂരുവിലെ ബാപ്റ്റിസ്റ്റ് ഹോസ്പിറ്റലിൽ ബ്രോങ്കോ ന്യുമോണിയ ബാധിച്ച് പ്രവേശിപ്പിക്കപ്പെട്ട മൂന്ന് മാസം പ്രായമുള്ള ഒരു പെൺകുഞ്ഞിലാണ് ആദ്യ കേസ് കണ്ടെത്തിയത്. കുട്ടി പിന്നീട് ആശുപത്രിയിൽ നിന്ന് ഡിസ്ചാർജ് ചെയ്തു. 

രണ്ടാമത്തെ കേസ് എട്ട് മാസം പ്രായമുള്ള ഒരു ആൺകുട്ടിയിലാണ്. ബ്രോങ്കോ ന്യുമോണിയ ബാധിച്ച് ബാപ്റ്റിസ്റ്റ് ഹോസ്പിറ്റലിൽ പ്രവേശിപ്പിക്കപ്പെട്ട കുട്ടിക്ക് ജനുവരി മൂന്നിന് നടത്തിയ പരിശോധനയിൽ എച്ച്എംപിവി പോസിറ്റീവ് ആയി കണ്ടെത്തുകയായിരുന്നു. കുട്ടി ഇപ്പോൾ സുഖം പ്രാപിച്ചു വരുന്നു. രോഗം ബാധിച്ച രണ്ട് കുട്ടികൾക്കും അന്താരാഷ്ട്ര യാത്രാ പശ്ചാത്തലമില്ല എന്നത് ശ്രദ്ധേയമാണ്.

സ്ഥിതിഗതികൾ നിരീക്ഷിച്ചു വരികയാണെന്ന് കേന്ദ്ര ആരോഗ്യ മന്ത്രാലയം അറിയിച്ചിട്ടുണ്ട്. ശ്വാസകോശ സംബന്ധമായ അസുഖങ്ങളിൽ ഉണ്ടാകാൻ സാധ്യതയുള്ള വർദ്ധനവ് കൈകാര്യം ചെയ്യാൻ ഇന്ത്യ സജ്ജമാണെന്നും ആശങ്കപ്പെടേണ്ട സാഹചര്യമില്ലെന്നും ജാഗ്രത പാലിക്കണമെന്നും ആരോഗ്യ മന്ത്രാലയം അറിയിച്ചു. രോഗ പ്രതിരോധ പ്രവർത്തനങ്ങൾ ശക്തമാക്കാനും വ്യക്തിഗത ശുചിത്വം പാലിക്കാനും ആരോഗ്യവകുപ്പ് നിർദേശം നൽകി.

#HMPV #VirusOutbreak #Karnataka #Gujarat #HealthAlert #India