കാടിന്റെ തണലിൽ പിറന്ന കുഞ്ഞിന് തുണയായി ആരോഗ്യപ്രവർത്തകർ

വണ്ടിപ്പെരിയാർ: (KVARTHA) വനവിഭവങ്ങൾ ശേഖരിക്കുന്നതിനിടെ ആദിവാസി യുവതി കാടിനുള്ളിൽ വെച്ച് പ്രസവിച്ചു. വള്ളക്കടവ് റെയ്ഞ്ചിന് കീഴിലുള്ള വനമേഖലയിൽ വ്യാഴാഴ്ച രാവിലെ ഒമ്പതരയോടെയാണ് സംഭവം. 

വണ്ടിപ്പെരിയാർ സ്വദേശിനിയായ ബിന്ദു (24) ആണ് ഒരു പെൺകുഞ്ഞിന് ജന്മം നൽകിയത്. യുവതി ആശുപത്രിയിലേക്ക് വരാൻ കൂട്ടാക്കാത്തതിനാൽ നവജാതശിശുവിനെ മാത്രം ആശുപത്രിയിലെത്തിച്ച് ചികിത്സ നൽകി. നിലവിൽ കുഞ്ഞ് സുരക്ഷിതയാണെന്ന് അധികൃതർ അറിയിച്ചു.

ഭർത്താവ് സുരേഷിനും മറ്റ് കുടുംബാംഗങ്ങൾക്കും ഒപ്പം വനവിഭവങ്ങൾ ശേഖരിക്കുന്നതിനിടെയാണ് ബിന്ദുവിന് പ്രസവവേദന അനുഭവപ്പെട്ടത്. വള്ളക്കടവ് ചെക്ക് പോസ്റ്റിന് സമീപത്തായിരുന്നു ഇവർ. പ്രസവവേദന കലശലായതോടെ പ്രസവം കാടിനുള്ളിൽ വെച്ച് തന്നെ നടന്നു.

വിവരം ഉടൻതന്നെ ഭർത്താവ് സുരേഷ് ആരോഗ്യവകുപ്പിനെ ഫോണിൽ വിളിച്ച് അറിയിക്കുകയായിരുന്നു. തുടർന്ന് കുമളി പ്രാഥമികാരോഗ്യ കേന്ദ്രത്തിലെ ഡോക്ടർ ഷബാന ബീഗത്തിന്റെ നേതൃത്വത്തിലുള്ള ആരോഗ്യപ്രവർത്തകരും ആംബുലൻസ് ഡ്രൈവർ നൈസാമുദ്ധീനും സ്ഥലത്തെത്തി.

ആരോഗ്യപ്രവർത്തകർ യുവതിയെയും കുഞ്ഞിനെയും ആശുപത്രിയിലേക്ക് കൊണ്ടുപോകാൻ ശ്രമിച്ചെങ്കിലും ബിന്ദു ഇതിന് തയ്യാറായില്ല. പലതവണ നിർബന്ധിച്ചിട്ടും യുവതി നിലപാടിൽ ഉറച്ചുനിന്നു. 

ഇതോടെ അമ്മയെ കാട്ടിൽത്തന്നെ നിർത്തി ആരോഗ്യപ്രവർത്തകർ നവജാതശിശുവിനെ മാത്രം ആംബുലൻസിൽ വണ്ടിപ്പെരിയാർ പ്രാഥമികാരോഗ്യ കേന്ദ്രത്തിലേക്ക് കൊണ്ടുപോയി. കുട്ടി ആശുപത്രിയിൽ എത്തുന്ന വിവരം മുൻകൂട്ടി അറിയിച്ചതിനാൽ അവിടുത്തെ ജീവനക്കാർ ആവശ്യമായ സജ്ജീകരണങ്ങൾ ഒരുക്കിയിരുന്നു.

ആശുപത്രിയിൽ എത്തിച്ച ഉടൻ കുട്ടിക്ക് വിദഗ്ധ ചികിത്സ നൽകി. പ്രാഥമിക പരിശോധനയിൽ കുഞ്ഞിന് രണ്ടര കിലോഗ്രാം തൂക്കമുണ്ടെന്ന് കണ്ടെത്തി. കുട്ടിയുടെ ആരോഗ്യനില പൂർണ്ണമായും തൃപ്തികരമാണെന്ന് ഡോക്ടർമാർ അറിയിച്ചതിന് പിന്നാലെ കുഞ്ഞിനെ രക്ഷകർത്താക്കളുടെ അടുത്തേക്ക് തിരിച്ചെത്തിച്ചു.

കുഞ്ഞിന് തുടർചികിത്സ ലഭ്യമാക്കുന്നതിനായി പിന്നീട് ആരോഗ്യപ്രവർത്തകർ വീണ്ടും സമീപിച്ചെങ്കിലും ബിന്ദുവും കുടുംബാംഗങ്ങളും ആശുപത്രിയിലേക്ക് വരാൻ വിസമ്മതിച്ചു. ഇതോടെയാണ് കുടുംബശ്രീ പ്രവർത്തകരെയും പട്ടികവർഗ വകുപ്പിലെ ജീവനക്കാരെയും ഇവരുടെ പരിചരണത്തിനായി ചുമതലപ്പെടുത്തി ആരോഗ്യവകുപ്പ് സംഘം മടങ്ങിയത്. 

കുമളി ഹെൽത്ത് ഇൻസ്പെക്ടർ ബി. മാടസ്വാമി, ആരോഗ്യവകുപ്പ് ജീവനക്കാരിയായ ആര്യാമോഹൻ, വനം വകുപ്പ് ജീവനക്കാരിയായ സുബിഷ, അങ്കണവാടി ജീവനക്കാരി ശ്രീദേവി എന്നിവരും രക്ഷാപ്രവർത്തനത്തിൽ പങ്കെടുത്തു.

ഈ സാഹചര്യം കൈകാര്യം ചെയ്ത രീതിയെക്കുറിച്ച് നിങ്ങളുടെ അഭിപ്രായം എന്താണ്? മറ്റുള്ളവരുമായി ഈ വാർത്ത ഷെയർ ചെയ്യൂ.

Article Summary: Tribal woman gives birth in forest, newborn gets timely medical aid.

#HealthWorkers #Newborn #TribalHealth #Idukki #Vandiperiyar #KeralaHealth