വർക്കൗട്ടിനിടെ ജീവൻ നഷ്ടപ്പെടുന്ന യുവാക്കൾ; ജിമ്മിൽ പോകുന്നതിന് മുൻപ് അറിയേണ്ട കാര്യങ്ങളും ഹൃദ്രോഗ ലക്ഷണങ്ങളും

ഗുവാഹത്തി: (KVARTHA) ജിമ്മിൽ വർക്കൗട്ട് ചെയ്യുന്നതിനിടെ ഡോക്ടർ കുഴഞ്ഞുവീണു മരിച്ചു. ഗുവാഹത്തിയിലെ നാഗോൺ മെഡിക്കൽ കോളേജ് ആൻഡ് ഹോസ്പിറ്റലിലെ അസോസിയേറ്റ് പ്രൊഫസറായ ഡോ. സഹിൻ റഹ്മാനാണ് ദാരുണാന്ത്യം സംഭവിച്ചത്. വർക്കൗട്ട് ചെയ്തുകൊണ്ടിരിക്കുന്നതിനിടെ സഹിൻ കുഴഞ്ഞുവീഴുന്നത്.

യഥാർഥ മരണകാരണം വ്യക്തമല്ലെങ്കിലും ഹൃദയാഘാതമെന്നാണ് പ്രാഥമിക നിഗമനം. കുഴഞ്ഞുവീണയുടൻ സഹിനെ ആശുപത്രിയിൽ എത്തിക്കുകയും സി.പി.ആർ. നൽകുകയും ചെയ്തെങ്കിലും ജീവൻ രക്ഷിക്കാനായില്ല.

ജിമ്മിൽ വർക്കൗട്ട് ചെയ്യുന്നതിനിടെയുള്ള കുഴഞ്ഞുവീണുമരണങ്ങൾ രാജ്യത്ത് വർധിക്കുന്നതായാണ് റിപ്പോർട്ടുകൾ സൂചിപ്പിക്കുന്നത്. അടുത്തിടെ മൊഹാലിയിൽ 23-കാരനും, കഴിഞ്ഞവർഷം കേരളത്തിലെ മുളന്തുരുത്തിയിൽ 42-കാരനും വർക്കൗട്ട് ചെയ്യുന്നതിനിടെ ഹൃദയാഘാതത്താൽ മരിച്ചിരുന്നു. 2021-ൽ കന്നഡ താരം പുനീത് രാജ്‌കുമാറും 2022-ൽ കൊമേഡിയൻ രാജു ശ്രീവാസ്തവയും സമാനമായ രീതിയിൽ വിടവാങ്ങിയിരുന്നു.

‘ശരീരത്തിന് താങ്ങാവുന്നതിലും അപ്പുറമുള്ള തീവ്രമായ വ്യായാമങ്ങളും തിരിച്ചറിയപ്പെടാതെ പോകുന്ന ഹൃദ്രോഗങ്ങളുമാണ് ഇത്തരത്തിലുള്ള മരണങ്ങൾ വർധിക്കുന്നതിന് പിന്നിലെ പ്രധാന കാരണം’. - ആരോഗ്യ വിദഗ്ധർ മുന്നറിയിപ്പ് നൽകുന്നു.

വ്യായാമം തുടങ്ങും മുൻപ് ശ്രദ്ധിക്കുക

എല്ലാവരുടേയും ശരീരം ഒരുപോലെയല്ല. അതിനാൽ ഒന്നും ചെയ്യാതെയിരുന്ന് പെട്ടന്നൊരു ദിവസം കഠിന വ്യായാമത്തിലേക്ക് കടക്കുന്നത് ഗുണത്തേക്കാളേറെ ദോഷം ചെയ്യും. ജിമ്മിൽ പോകുന്നവർ താഴെ പറയുന്ന കാര്യങ്ങൾ നിർബന്ധമായും ശ്രദ്ധിക്കുക:

● മെഡിക്കൽ പരിശോധന: ഹൃദയത്തിന്റെയും മസ്തിഷ്കത്തിന്റെയും പ്രശ്നങ്ങൾ ലക്ഷണങ്ങളൊന്നും കാണിക്കാതെ തന്നെ നമുക്കുണ്ടായേക്കാം. അതിനാൽ ഡോക്ടറുടെയോ വിദഗ്ധ പരിശീലകരുടെയോ നിർദേശത്തോടെ മാത്രം വ്യായാമങ്ങൾ ആരംഭിക്കുക.
● പതുക്കെ തുടങ്ങാം: നടത്തം, ഓട്ടം, നീന്തൽ തുടങ്ങിയവ ഘട്ടംഘട്ടമായി ചെയ്യുക. മാംസപേശികളെയും സന്ധികളെയും ചെറിയ വ്യായാമത്തിലൂടെ ശക്തിപ്പെടുത്തിയ ശേഷം മാത്രം ട്രെഡ്മിൽ പോലുള്ളവയിലേക്ക് കടക്കുക.
● വാം അപ് പ്രധാനം: വ്യായാമത്തിന് മുൻപ് 5 മിനിറ്റ് വാം അപ് നിർബന്ധമാണ്. കൈകാലുകൾക്ക് സ്ട്രെച്ചിങ് നൽകണം.
● ഭക്ഷണം: വർക്കൗട്ടിന് മുൻപ് പ്രീ-വർക്കൗട്ട് മീൽസ് (മധുരമില്ലാത്ത പഴമോ ജ്യൂസോ) കഴിക്കാം. ക്ഷീണം തോന്നിയാൽ വിശ്രമിക്കുകയും ദാഹിക്കുമ്പോൾ ആവശ്യത്തിന് വെള്ളം കുടിക്കുകയും വേണം.
● അസുഖങ്ങളുള്ളവർ: രക്തസമ്മർദം, ഹൃദയസംബന്ധമായ പ്രശ്നങ്ങൾ, സ്ത്രീകളിൽ പി.സി.ഒ.ഡി., തൈറോയിഡ് തുടങ്ങിയ പ്രശ്നങ്ങളുള്ളവർ ഡോക്ടറോടോ ട്രെയിനറോടോ ഫിസിയോതെറാപ്പിസ്റ്റിനോടോ സംസാരിച്ചശേഷം മാത്രം അനുയോജ്യമായ വ്യായാമത്തിലേക്ക് കടക്കുക. അമിതഭാരമുള്ളവർ ഒരു പേഴ്സണൽ ട്രെയിനറുടെ സഹായം തേടുന്നത് നല്ലതാണ്.

ഹൃദ്രോഗ ലക്ഷണങ്ങൾ അവഗണിക്കരുത്

ഹൃദയധമനികളിൽ കൊഴുപ്പ് സാവധാനം അടിഞ്ഞ് ബ്ലോക്ക് ഉണ്ടാകുന്ന സ്ഥിതിയിലേക്ക് എത്തിച്ചേരുവാൻ ചിലപ്പോൾ വർഷങ്ങൾ തന്നെ എടുത്തേക്കാം. ഈ സമയത്ത് യാതൊരു രോഗലക്ഷണങ്ങളും കണ്ടെന്നുവരില്ല. അതിനാൽ ചെറിയ സൂചനകൾ പോലും തിരിച്ചറിയേണ്ടതുണ്ട്. ഭാരപ്പെട്ട ജോലികൾ ചെയ്യുമ്പോൾ നെഞ്ചിൽ പതിവായി അസ്വസ്ഥത ഉണ്ടാകുകയും വിശ്രമിക്കുമ്പോൾ വേദനയ്ക്ക് ആശ്വാസം ലഭിക്കുകയും ചെയ്യുന്നവർ തീർച്ചയായും വൈദ്യോപദേശം തേടണം. ഇതിനെ ഗ്യാസിന്റെ ബുദ്ധിമുട്ടായി അവഗണിക്കരുത്.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താനും മറക്കരുത്. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: Assam doctor dies of a heart attack during gym workout.

#GymDeath #HeartAttack #HealthNews #WorkoutSafety #GuwahatiNews #FitnessTips #CardiovascularHealth #AnjanaNews