കരള്‍ മാറ്റ ശസ്ത്രക്രിയക്ക് പണമില്ലാതെ വിഷമിച്ച ഉജ്ജ്വലിന് സഹായഹസ്തവുമായി സര്‍ക്കാര്‍; കരള്‍ പകുത്ത് നല്‍കുന്നത് അമ്മയുടെ സഹോദരി

തിരുവനന്തപുരം: (www.kvartha.com 29.05.2019) കരള്‍ മാറ്റശസ്ത്രക്രിയക്ക് പണമില്ലാതെ വിഷമിച്ച ഉജ്ജ്വലിന് സഹായ ഹസ്തവുമായി സര്‍ക്കാര്‍. ജീവിതത്തിലേക്കു തിരിച്ചുവരാന്‍ 24 മണിക്കൂര്‍ മാത്രം ശേഷിക്കവെയാണ് സര്‍ക്കാര്‍ ഈ 16കാരന് ജീവിതം തിരിച്ചുനല്‍കിയിരിക്കുന്നത്.

കിംസ് ആശുപത്രിയിലെ വെന്റിലേറ്ററില്‍ കഴിയുന്ന തിരുവനന്തപുരം മുട്ടയ്ക്കാട് സ്വദേശി ഉജ്ജ്വലിന് സാമൂഹ്യനീതി വകുപ്പിന് കീഴിലുള്ള സാമൂഹ്യസുരക്ഷാ മിഷന്റെ വീ കെയര്‍ പദ്ധതിയില്‍ ഉള്‍പ്പെടുത്തിയാണ് പണം ലഭ്യമാക്കുന്നത്. ചികിത്സ ഏറ്റെടുത്തുകൊണ്ടുള്ള കത്ത് സാമൂഹ്യ സുരക്ഷാ മിഷന്‍ ആശുപത്രിക്ക് കൈമാറി. 20 ലക്ഷം രൂപയാണ് ശസ്ത്രക്രിയയ്ക്ക് ചെലവ് വരുന്നത്. ഇതില്‍ അഞ്ച് ലക്ഷം പന്തളത്തെ ഒരു ചാരിറ്റബിള്‍ ട്രസ്റ്റ് വാഗ്ദാനം ചെയ്തു.


മരണത്തോട് മല്ലിടുന്ന ഉജ്ജ്വലിന്റെ ശസ്ത്രക്രിയയ്ക്ക് പണം കണ്ടെത്താന്‍ കഴിയാതെ ഓട്ടോ ഡ്രൈവറായ അച്ഛന്‍ സുരേന്ദ്രനും അമ്മ അമ്മിണിയും വലയുന്ന വാര്‍ത്ത കഴിഞ്ഞദിവസമാണ് പുറത്തുവന്നത്. തുടര്‍ന്ന് ആരോഗ്യവകുപ്പ് മന്ത്രിയുടെ ഓഫീസ് ഇടപെട്ടു. പിന്നാലെ സമൂഹ്യസുരക്ഷാ മിഷന്‍ പണം അനുവദിക്കുന്നതിനുള്ള നടപടികള്‍ പൂര്‍ത്തിയാക്കി. വൈകിട്ടോടെ മന്ത്രി കെ.കെ. ശൈലജയുടെ ഓഫീസില്‍ നിന്ന് കുട്ടിയുടെ ബന്ധുക്കള്‍ക്ക് ഇതുസംബന്ധിച്ച അറിയിപ്പ് ലഭിച്ചു. ചൊവ്വാഴ്ച രാത്രിയോടെ ശസ്ത്രക്രിയ നടക്കാനാണ് സാധ്യത.