കണ്ണൂരില്‍ സ്ഥിതി അതീവ ഗുരുതരം; മരിച്ച എക്സൈസ് ജീവനക്കാരന്റെ സമ്പര്‍ക്ക പട്ടിക വിപുലം, വൈറസ് ബാധ സാമൂഹ്യ വ്യാപനത്തിലേക്ക് കടന്നിട്ടില്ലെന്നും മന്ത്രി ഇപി ജയരാജന്‍

വ്യാഴാഴ്ചയാണ് കണ്ണൂരിലെ എക്സൈസ് ജീവനക്കാരന്‍ കോവിഡ് ബാധിച്ച് മരിച്ചത്. സംസ്ഥാനത്ത് റിപ്പോര്‍ട്ട് ചെയ്ത മറ്റു കോവിഡ് മരണങ്ങളില്‍ രോഗിക്ക് മുമ്പേ തന്നെ മറ്റ് ആരോഗ്യ പ്രശ്നങ്ങളുണ്ടായിരുന്നു. പലപ്പോഴും കോവിഡ് ബാധയെ തുടര്‍ന്ന് ഈ രോഗങ്ങളും മുര്‍ച്ഛിക്കുന്നതാണ് മരണത്തിലേക്ക് വഴിതെളിച്ചത്. എന്നാല്‍ വ്യാഴാഴ്ച മരിച്ച കെപി സുനില്‍ എന്ന 28 കാരന്‍ പൂര്‍ണ ആരോഗ്യവാനായിരുന്നു. രോഗം സ്ഥിരീകരിച്ച് ദിവസങ്ങള്‍ക്കം തന്നെ അദ്ദേഹം മരണത്തിന് കീഴടങ്ങിയത് ആശങ്കകള്‍ സൃഷ്ടിക്കുന്നുണ്ട്.

മട്ടന്നൂര്‍ റേഞ്ച് ഓഫീസിലെ എക്സൈസ് ഉദ്യോഗസ്ഥനാണ് മരിച്ച വ്യക്തി. എക്സൈസ് വകുപ്പ് കഴിഞ്ഞ ദിവസം നടത്തിയ റെയ്ഡിലെ പ്രതിയുമായി ജൂണ്‍ മൂന്നാം തിയതി ഇദ്ദേഹം ജില്ലാ ആശുപത്രിയില്‍ പോയിരുന്നു. ഇവിടെ അന്നേ ദിവസം മറ്റൊരു വ്യക്തി കോവിഡ് ടെസ്റ്റിനായി വന്നിരുന്നു. ഇവിടെ നിന്നാകാം ഇദ്ദേഹത്തിന് രോഗം ബാധിച്ചതെന്നാണ് സൂചന.

തുടര്‍ന്ന് 12 -ാം തീയതിയാണ് ഇദ്ദേഹത്തിന് പനി അനുഭവപ്പെടുന്നത്. ജൂണ്‍ 14ാം തിയതി ഇരിക്കൂറിലെ സ്വകാര്യ ക്ലിനിക്കിലും തുടര്‍ന്ന് കണ്ണൂരിലെ സ്വകാര്യ ആശുപത്രിയിലും ചികിത്സ തേടുകയും നില വഷളായതിനെ തുടര്‍ന്ന് പിന്നീട് പരിയാരം മെഡിക്കല്‍ കോളജിലേക്ക് മാറ്റുകയുമായിരുന്നു. കടുത്ത ന്യൂമോണിയയാണ് ഇദ്ദേഹത്തെ മരണത്തിലേക്ക് നയിച്ചത്.