കോവിഡ് പ്രതിരോധപ്രവർത്തനങ്ങൾക്കിടെ ജീവൻ നഷ്ടമാകുന്ന ആരോഗ്യപ്രവർത്തകർക്കുള്ള ഇൻഷൂറൻസ് പദ്ധതി കേന്ദ്രസർകാർ നിർത്തലാക്കി

287 പേർക്കാണ് 50 ലക്ഷം രൂപയുടെ ഇൻഷൂറൻസ് ലഭിച്ചതെന്നാണ് കേന്ദ്രസർകാരിന്‍റെ ഉത്തരവിൽ പറയുന്നത്. മരിച്ച 287 പേരുടെ കുടുംബങ്ങൾക്ക് ഇൻഷൂറൻസ് തുക ഉറപ്പ് നൽകിയിട്ടുണ്ട്. സ്വകാര്യ ഏജൻസിയായ ന്യൂ ഇന്ത്യ അഷ്വറൻസുമായി ചേർന്നാണ് കേന്ദ്രസർകാർ ഈ പദ്ധതി നടപ്പാക്കിയത്.

എന്നാൽ ഫെബ്രുവരി വരെത്തന്നെ സർകാർ രേഖകൾ പരിശോധിച്ചാൽ 313 ആരോഗ്യപ്രവർത്തകരാണ് കോവിഡ് ബാധിച്ച്‌ മരിച്ചത്. 162 ഡോക്ടർമാർ, 107 നഴ്സുമാർ, 44 ആശാ പ്രവർത്തകർ എന്നിങ്ങനെയാണ് മരണസംഖ്യ.

അതേസമയം ഡോക്ടർമാർ മാത്രം 734 പേർ മരിച്ചുവെന്നാണ് ഇന്ത്യൻ മെഡികൽ അസോസിയേഷന്‍റെ കണക്ക്. സർകാർ, സ്വകാര്യ ആശുപത്രികളിലെ ആരോഗ്യപ്രവർത്തകർ, കോവിഡ് പ്രതിരോധപ്രവർത്തനങ്ങളിലേക്ക് തിരിച്ച് വന്ന വിരമിച്ച ജീവനക്കാർ, സന്നദ്ധപ്രവർത്തകർ എന്നിവർക്കായി കഴിഞ്ഞ വർഷം മാർച് 30 മുതലാണ് പ്രധാനമന്ത്രി ഗരീബ് കല്യാൺ പാകേജിൽ ഉൾപെടുത്തി ആരോഗ്യ ഇൻഷൂറൻസ് പ്രഖ്യാപിച്ചത്. പിന്നീട് സെപ്റ്റംബറിൽ കേസുകൾ കുത്തനെ കൂടിയപ്പോൾ, പദ്ധതി ഈ വർഷം മാർച് വരെയാക്കി നീട്ടിയിരുന്നു.

എന്നാൽ വാക്സീൻ വിതരണത്തിന്‍റെ ഒന്നാംഘട്ടത്തിൽ ആരോഗ്യപ്രവർത്തകർക്കെല്ലാം വാക്സീൻ നൽകിയത് പരിഗണിച്ചാണ്, പദ്ധതി നിർത്തിവച്ചതെന്നാണ് കേന്ദ്രസർകാർ വാദം. വാക്സീൻ ലഭിച്ചതിനാൽ കോവിഡ് രോഗബാധയിൽ നിന്ന് ആരോഗ്യപ്രവർത്തകർ സുരക്ഷിതരാണെന്ന കണക്കുകൂട്ടലിലാണ് നടപടി.
< !- START disable copy paste -->