പ്രതിദിന കോവിഡ് കണക്കുകള്‍ സമര്‍പിക്കുന്നതില്‍ കേരളത്തിന് വീഴ്ച സംഭവിച്ചെന്ന് കേന്ദ്രം

ഇതു കേന്ദ്രത്തിന്റെ കോവിഡ് അവലോകനത്തെ ബാധിച്ചതായും കണക്കുകള്‍ സമര്‍പിക്കുന്നതില്‍ ഇടവേള വന്നതിനാല്‍ ഒറ്റദിവസം 90% കൂടുതല്‍ പുതിയ കേസുകളാണ് രാജ്യത്ത് റിപോര്‍ട് ചെയ്തതെന്നും കത്തില്‍ വ്യക്തമാക്കുന്നു. ടെസ്റ്റ് പോസിറ്റിവിറ്റി നിരക്കും 165% കൂടി. തിങ്കളാഴ്ച, 2183 പേര്‍ക്കാണ് രാജ്യത്ത് കോവിഡ് സ്ഥിരീകരിച്ചത്. ഇതില്‍ 940 കേസുകളും കേരളത്തിലാണ്.

രാജ്യത്ത് തിങ്കളാഴ്ച റിപോര്‍ടു ചെയ്ത 214 മരണങ്ങളില്‍ 213ഉം കേരളത്തിലാണ്. ഏപ്രില്‍ 14 മുതലുള്ള കണക്കുകള്‍ കേരളം ഒരുമിച്ച് സമര്‍പിക്കുകയായിരുന്നു. ഞായറാഴ്ച, 1150 പേര്‍ക്കാണ് രാജ്യത്ത് കോവിഡ് സ്ഥിരീകരിച്ചത്. തിങ്കളാഴ്ച ഇത് ഇരട്ടിയോളം ആയതിനെ തുടര്‍ന്നാണ് കേരളത്തിന്റെ വീഴ്ച ചൂണ്ടിക്കാട്ടി കേന്ദ്രം കത്തയച്ചത്.

രോഗവ്യാപനം വിലയിരുത്താനും പുതിയ വകഭേദങ്ങള്‍ സമയബന്ധിതമായി കണ്ടെത്താനും ദിവസേനയുള്ള കണക്കുകള്‍ അത്യാവശ്യമാണെന്ന് കത്തില്‍ ചൂണ്ടിക്കാട്ടുന്നു. രോഗികളെ നിരീക്ഷിക്കുന്നതിനു മാത്രമല്ല, പുതിയ തന്ത്രങ്ങളും പദ്ധതികളും ആവിഷ്‌ക്കരിക്കുന്നതിനും ഇത് ആവശ്യമാണ്. ഇക്കാരണങ്ങളാല്‍ ദിവസേനയുള്ള കണക്കുകള്‍ നല്‍കണമെന്നു കത്തില്‍ നിര്‍ദേശിക്കുന്നു.

കോവിഡ് കേസുകള്‍ കുറഞ്ഞതിനാല്‍ മാധ്യമങ്ങള്‍ക്കു കോവിഡ് കണക്കുകള്‍ നല്‍കുന്നത് സര്‍കാര്‍ അവസാനിപ്പിച്ചിരുന്നു.