വസൂരിയെയും ടിബിയെയും പോലെ ക്യാന്‍സറും പടരുന്നു

എല്ലാ അതിരുകളും ഭേദിച്ച് മുന്‍കാലങ്ങളിലെ വസൂരിയെയും ടിബിയെയും അനുസ്മരിക്കും വിധം ക്യാന്‍സര്‍ പടരുകയാണ്. തിരുവനന്തപുരം റീജിയണല്‍ ക്യാന്‍സര്‍ സെന്ററിന്റെ ഏറ്റവും പുതിയ കണക്കുപ്രകാരം കഴിഞ്ഞ മൂന്ന് ദശകങ്ങളിലെ വര്‍ദ്ധനവ് 145 ശതമാനത്തില്‍ എത്തിനില്‍ക്കുന്നു.

കഴിഞ്ഞ രണ്ട് വര്‍ഷങ്ങളിലായി 75,000 ത്തില്‍ പരം അര്‍ബുദ ബാധകള്‍ രേഖപ്പെടുത്തുകയുണ്ടായി. അര്‍ബുദം ബാധിക്കുന്ന ശരീര ഭാഗങ്ങളുടെ കൂട്ടത്തില്‍ നിന്ന് ഒന്നും ഒഴിവാക്കപ്പെടുന്നില്ല; രക്തം മുതല്‍ സകല അവയവങ്ങളെയും കീഴടക്കി ക്യാന്‍സര്‍ പല പല രൂപത്തിലും ഭാവത്തിലും പ്രത്യക്ഷപ്പെട്ടു തുടങ്ങിയിരുന്നു. സ്ത്രീകളെ അപേക്ഷിച്ച് പുരുഷന്‍മാരിലാണ് അര്‍ബുദ ബാധ കൂടുതല്‍ രേഖപ്പെടുത്തിയിരിക്കുന്നത്.
പുരുഷന്‍മാരിലുണ്ടാവുന്ന അര്‍ബുദത്തില്‍ 50 ശതമാനവും വായ, തൊണ്ട, കരള്‍ എന്നിവയെ ബാധിക്കുന്നവയാണ്. മദ്യത്തിന്റെയും പുകയില ഉല്പന്നങ്ങളുടെയും ഉപയോഗമാണ് പുരുഷന്മാരില്‍ ഇത്തരത്തിലുള്ള അര്‍ബുദത്തിന് കൂടുതലും കാരണമായി തീരുന്നത്.