Stroke Risk Factors | ഈ രക്ത ഗ്രൂപുള്ളവർക്ക് സ്ട്രോക് വരാനുള്ള സാധ്യത കൂടുതലാണെന്ന് പഠനം; ഇക്കാര്യങ്ങൾ ശ്രദ്ധിക്കുക

ന്യൂയോർക്: (www.kvartha.com) യുവാക്കളിൽ പക്ഷാഘാതം (Stroke) വരാനുള്ള സാധ്യത അതിവേഗം വർധിച്ചുകൊണ്ടിരിക്കുകയാണ്. ഒരു വ്യക്തിയുടെ തലച്ചോറിലേക്കുള്ള രക്ത വിതരണം പെട്ടെന്ന് തടസപ്പെടുന്ന അവസ്ഥയാണിത്. രക്ത വിതരണം തടസപ്പെടുമ്പോൾ മസ്തിഷ്ക കോശങ്ങൾ തകരാറിലാകുന്നു. മിക്ക കേസുകളിലും, സ്ട്രോക് കാരണം ശരീരത്തിന്റെ പകുതിയും തളർന്നുപോകുന്നു. ചില സന്ദർഭങ്ങളിൽ ഇത് വ്യക്തിയുടെ മരണത്തിലേക്ക് പോലും നയിക്കുന്നു.
                    

സ്ട്രോക് കഴിഞ്ഞ് നാല് - അഞ്ച് മണിക്കൂറിനുള്ളിൽ ചികിത്സ ആരംഭിച്ചാൽ, അത് പഴയപടിയാക്കാം. ഹൃദ്രോഗമോ പ്രമേഹമോ ഉള്ള ആളുകൾക്ക് സ്ട്രോക് വരാനുള്ള സാധ്യത കൂടുതലാണ്. ഇപ്പോഴിതാ ഒരു പുതിയ പഠനം പുറത്തുവന്നിരിക്കുന്നു, അതിൽ എ രക്തഗ്രൂപുള്ള ആളുകൾക്ക് സ്ട്രോക് വരാനുള്ള സാധ്യത കൂടുതലാണെന്ന് കണ്ടെത്തി. ആശ്ചര്യപ്പെടുത്തുന്ന പല കാര്യങ്ങളും പഠനത്തിൽ പറഞ്ഞിട്ടുണ്ട്. യൂണിവേഴ്സിറ്റി ഓഫ് മേരിലാൻഡ് സ്കൂൾ ഓഫ് മെഡിസിനിലെ (UMSOM) ഗവേഷകരാണ് പഠനത്തിന് നേതൃത്വം നൽകിയത്

മെഡിക്കൽ ന്യൂസ് ടുഡേ പറയുന്നതനുസരിച്ച്, ഒ രക്തഗ്രൂപുള്ളവരേക്കാൾ 60 വയസിന് മുമ്പ് എ രക്തഗ്രൂപുള്ള ആളുകൾക്ക് സ്ട്രോക് വരാനുള്ള സാധ്യത കൂടുതലാണെന്ന് പഠനം പറയുന്നു. എ രക്തഗ്രൂപ്പുള്ള ആളുകൾക്ക് രക്തം കട്ടപിടിക്കാനുള്ള സാധ്യത കൂടുതലാണ്, ഇത് സ്ട്രോകിനുള്ള സാധ്യത വർധിപ്പിക്കുന്നു. രക്തസമ്മർദവും ഹൃദയാരോഗ്യവും മെച്ചപ്പെടുത്തുന്നതിലൂടെ ആളുകൾക്ക് ഈ അപകടസാധ്യത കുറയ്ക്കാൻ കഴിയുമെന്നും പഠനം വ്യക്തമാക്കുന്നു. മറ്റ് രക്തഗ്രൂപുകളുള്ള ആളുകൾക്ക് സ്ട്രോക് വരില്ലെന്ന് ഇതിനർത്ഥമില്ല. ഏത് രക്തഗ്രൂപുള്ളവർക്കും ഈ പ്രശ്നം ഉണ്ടാകാം.

പഠനത്തിൽ പുറത്തുവന്ന മറ്റൊരു ആശ്ചര്യകരമായ കാര്യം, സ്ട്രോക് അനുഭവിക്കുന്നവരിൽ വലിയൊരു വിഭാഗം ബി രക്തഗ്രൂപുള്ളവരാണ് എന്നതാണ്. എന്നിരുന്നാലും, രക്തഗ്രൂപ് കാരണം ഇവർക്ക് സ്ട്രോക് ഉണ്ടായി എന്നല്ല അർഥമാക്കേണ്ടത്. ഇതിന് നിരവധി കാരണങ്ങളുണ്ടാകാം, അത് വ്യക്തിയുടെ അവസ്ഥയെ ആശ്രയിച്ചിരിക്കുന്നു. ഇവിടെയുള്ള എല്ലാ കാര്യങ്ങളും ഇസ്കെമിക് സ്ട്രോക് കേസുകൾക്ക് ബാധകമാണ് എന്നതും ശ്രദ്ധിക്കേണ്ടതാണ്. ചെറുപ്രായത്തിൽ ഉണ്ടാകുന്ന ഏറ്റവും സാധാരണമായ സ്ട്രോക് ആയി ഇത് കണക്കാക്കുന്നു.

സ്‌ട്രോകിനുള്ള സാധ്യത എങ്ങനെ കുറയ്ക്കാം

ഉയർന്ന രക്തസമ്മർദം, പ്രമേഹം, ഉയർന്ന കൊളസ്ട്രോൾ അളവ് എന്നിവ നിയന്ത്രിക്കാൻ ശ്രമിക്കുക. ഇതുകൂടാതെ, പുകവലി പൂർണമായും ഉപേക്ഷിക്കുക. പൊണ്ണത്തടി കുറയ്ക്കുന്നത് സ്‌ട്രോക് സാധ്യത കുറയ്ക്കും. ആരോഗ്യകരമായ ഭക്ഷണക്രമവും പതിവായി വ്യായാമവും ചെയ്യാം. ജീവിതശൈലിയിൽ ആവശ്യമായ മാറ്റങ്ങൾ വരുത്തുന്നതിലൂടെ ഈ അപകടസാധ്യത പലമടങ്ങ് കുറയ്ക്കാനും കഴിയും. ഏതെങ്കിലും തരത്തിലുള്ള പ്രശ്നമുണ്ടെങ്കിൽ, ഡോക്ടറെ ബന്ധപ്പെടണം. ഒരു സ്ട്രോക് കഴിഞ്ഞ് ആദ്യത്തെ ഏതാനും മണിക്കൂറുകളിൽ ചികിത്സ ലഭിച്ചാൽ, അത് പൂർണമായും മാറ്റാൻ കഴിയുമെന്ന് എല്ലായ്പ്പോഴും ഓർക്കുക.