ആരോഗ്യനില മോശമായി: സി കെ പദ്മനാഭനെ ആശുപത്രിയിലേക്ക് മാറ്റി; ശോഭാ സുരേന്ദ്രന്‍ നിരാഹാരമിരിക്കും

തിരുവനന്തപുരം: (www.kvartha.com 19.12.2018) ശബരിമല വിഷയത്തില്‍ സെക്രട്ടേറിയേറ്റിന് മുന്നില്‍ നിരാഹാര സമരം നടത്തിയിരുന്ന ബിജെപി നേതാവ് സി.കെ. പദ്മനാഭന്‍ സമരം അവസാനിപ്പിച്ചു. ആരോഗ്യ നില മോശമായതിനെ തുടര്‍ന്നാണ് അദ്ദേഹം നിരാഹാര സമരം അവസാനിപ്പിച്ചത്. പകരം ബിജെപി സംസ്ഥാന ജനറല്‍ സെക്രട്ടറിയായ ശോഭ സുരേന്ദ്രന്‍ നിരാഹാരം അനുഷ്ഠിക്കും.

സമരം നടത്തിയിരുന്ന സി.കെ. പദ്മനാഭനെ പോലീസ് സമരപ്പന്തലില്‍ നിന്ന് അറസ്റ്റ് ചെയ്ത് നീക്കി. ഇദ്ദേഹത്തെ മെഡിക്കല്‍ കോളജ് ആശുപത്രിയിലേക്ക് മാറ്റി. ഒമ്പത് ദിവസമാണ് സി.കെ. പദ്മനാഭന്‍ നിരാഹാരം കിടന്നത്. ഇദ്ദേഹത്തിന്റെ ആരോഗ്യനില മോശമാകുന്നുവെന്ന് ഡോക്ടര്‍മാര്‍ റിപ്പോര്‍ട്ട് നല്‍കിയിരുന്നു. ഇതേതുടര്‍ന്നാണ് സി.കെ. പദ്മനാഭനെ അറസ്റ്റ് ചെയ്ത് നീക്കിയത്.


പകരം ശോഭാ സുരേന്ദ്രന്‍ നിരാഹാരമിരിക്കുമെന്നാണ് ബിജെപി കോര്‍കമ്മിറ്റിയില്‍ തീരുമാനമെടുത്തത്. ശോഭ സുരേന്ദ്രന്‍ സമരപ്പന്തലിലെത്തി നിരാഹാര സമരം ആരംഭിച്ചു. ശബരിമലയിലെ നിരോധനാജ്ഞ പിന്‍വലിക്കണമെന്ന് ആവശ്യപ്പെട്ടാണു ഈ മാസം മൂന്നിന് സമരം ആരംഭിച്ചത്.

ആദ്യഘട്ടത്തില്‍ സംസ്ഥാന ജനറല്‍ സെക്രട്ടറിമാരിലൊരാളായ എ.എന്‍ രാധാകൃഷ്ന്‍ ഏഴ് ദിവസമാണ് നിരാഹാരം അനുഷ്ഠിച്ചത്. ഇദ്ദേഹത്തിന്റെ ആരോഗ്യനില മോശമായതിനെ തുടര്‍ന്ന് പോലീസ് ആശുപത്രിയിലേക്ക് മാറ്റിയിരുന്നു. ഇതിന് ശേഷമാണ് സി.കെ. പദ്മനാഭന്‍ നിരാഹാരം കിടന്നത്.

സി.കെ. പദ്മനാഭന്‍ നിരാഹാരം കിടക്കുന്ന സമയത്താണ് വേണുഗോപാലന്‍ നായര്‍ ആത്മഹത്യാ ശ്രമം നടത്തിയത്.