കൊച്ചി: (KVARTHA) ഇന്ത്യയിലെ ആരോഗ്യ രംഗത്ത് ഒരു വലിയ മുന്നേറ്റമായി ആസ്റ്റർ ഡിഎം ഹെൽത്ത്‌കെയറും ക്വാളിറ്റി കെയർ ഇന്ത്യ ലിമിറ്റഡും (ക്യുസിഐഎൽ) ലയിക്കുന്നു. ബ്ലാക്ക്‌സ്റ്റോൺ, ടിപിജി എന്നീ ആഗോള നിക്ഷേപകരുടെ പിന്തുണയോടെ, പുതിയ സ്ഥാപനമായ ആസ്റ്റർ ഡിഎം ക്വാളിറ്റി കെയർ ലിമിറ്റഡ് രൂപംകൊള്ളും. ഈ ലയനത്തിലൂടെ ആസ്റ്റർ ഡിഎം, കെയർ ഹോസ്പിറ്റൽസ്, കിംഷെൽത്ത്, എവർകെയർ എന്നീ നാല് പ്രമുഖ ബ്രാൻഡുകൾ ഒന്നിക്കും. 

27 നഗരങ്ങളിലായി 38 ആശുപത്രികളും 10,150-ലധികം കിടക്കകളും ഉൾപ്പെടുന്ന വലിയ ശൃംഖലയായി ഇത് മാറും. 2027-ഓടെ 3,500 പുതിയ കിടക്കകൾ കൂടി ചേർത്ത് ഇന്ത്യയിലെ ഏറ്റവും വലിയ ആശുപത്രി ശൃംഖലകളിൽ ഒന്നാകുകയാണ് ലക്ഷ്യം. 43,000 കോടി രൂപയുടെ ഈ ലയനം ആരോഗ്യ രംഗത്തെ ഏറ്റവും വലിയ ഇടപാടുകളിലൊന്നാണ്. 14,000 കിടക്കകളോടെ ഇന്ത്യയിലെ ഏറ്റവും വലിയ ആരോഗ്യ പരിരക്ഷാ ദാതാക്കളിൽ ഒന്നാകാൻ ആസ്റ്റർ ലക്ഷ്യമിടുന്നുവെന്ന് ആസ്റ്റർ ഡിഎം ഹെൽത്ത്‌കെയർ ഡെപ്യൂട്ടി മാനേജിംഗ് ഡയറക്ടർ അലീഷ മൂപ്പൻ പറഞ്ഞു.

'ആസ്റ്റർ ചെയർമാൻ ഡോ. ആസാദ് മൂപ്പൻ ജിസിസി ബിസിനസിനെ ഇന്ത്യയിലെ ബിസിനസിൽ നിന്ന് വേർപെടുത്താൻ തീരുമാനിച്ചപ്പോൾ അദ്ദേഹത്തിന്റെ ലക്ഷ്യം ഇന്ത്യയിലും ഗൾഫിലും രണ്ട് വ്യത്യസ്ത ബിസിനസുകൾ സ്ഥാപിക്കുക എന്നതായിരുന്നു. ഗൾഫ് പ്രധാന വിപണിയായതിനാൽ അവിടെ പ്രത്യേക ശ്രദ്ധ കൊടുക്കാൻ ഇത് സഹായിക്കും.

ബിസിനസ് വിഭജിച്ചതിന് ശേഷം മുന്നിൽ രണ്ട് വഴികൾ ഉണ്ടായിരുന്നു. ഒന്ന്, ഇന്ത്യയിൽ സ്വന്തമായി ഒരു ബിസിനസ് പടുത്തുയർത്തുക. എന്നാൽ ഇതിന് 10-20 വർഷം വരെ സമയമെടുക്കും. രണ്ടാമത്തെ വഴി, ഞങ്ങളുടെ മൂല്യങ്ങളും തത്വങ്ങളും പങ്കിടുന്ന മറ്റൊരു കമ്പനിയുമായി കൂട്ടുകൂടുക എന്നതായിരുന്നു. ഇത് വളർച്ച വേഗത്തിലാക്കുകയും ഡോക്ടർമാർക്കും രോഗികൾക്കും നിക്ഷേപകർക്കും നേട്ടം നൽകുകയും ചെയ്യും. അതുകൊണ്ട് 10 വർഷം കാത്തിരിക്കുന്നതിനു പകരം ഈ രണ്ടാമത്തെ വഴിയാണ് തിരഞ്ഞെടുത്തത്', ലയനത്തെ കുറിച്ച് അലിഷ മൂപ്പനെ ഉദ്ധരിച്ച്  ബിസിനസ് ടുഡേ റിപ്പോർട്ട് ചെയ്‌തു.

ആസ്റ്ററിൽ, ഞങ്ങളുടെ പ്രധാന ലക്ഷ്യം രോഗികൾക്ക് മികച്ച ചികിത്സ നൽകുക എന്നതാണ്. കെയർ ഹോസ്പിറ്റലുകൾക്കും ഇതേ ലക്ഷ്യമാണ്. അവർക്ക് ബ്ലാക്ക്‌സ്റ്റോൺ പോലുള്ള വലിയ കമ്പനികളുടെ സഹായവും ലഭിക്കുന്നു. ആരോഗ്യരംഗം വളരെ വേഗത്തിൽ മാറിക്കൊണ്ടിരിക്കുന്നതിനാൽ, ഈ രണ്ട് കമ്പനികൾ ഒന്നാകുന്നത് വളരെ നല്ലതാണ്. 

ആസ്റ്റർ, ഇന്ത്യയിലെ ആരോഗ്യ സംരക്ഷണ മേഖലയിൽ വലിയൊരു മുന്നേറ്റം നടത്തുകയാണ്. നേരത്തെ കേരളം, കർണാടക, ആന്ധ്രപ്രദേശ്, തെലങ്കാന എന്നീ സംസ്ഥാനങ്ങളിൽ ശ്രദ്ധ കേന്ദ്രീകരിച്ചിരുന്ന ഈ സ്ഥാപനം, പുതിയ ലയനത്തോടെ മധ്യപ്രദേശ്, ഒഡീഷ, ഛത്തീസ്ഗഡ്, തമിഴ്‌നാട് എന്നീ സംസ്ഥാനങ്ങളിലേക്ക് വ്യാപിച്ചു. ഇതോടെ ടയർ 2, ടയർ 3 നഗരങ്ങളിലെ ആളുകൾക്ക് മികച്ച ആരോഗ്യ സേവനങ്ങൾ ലഭ്യമാക്കുക എന്ന ലക്ഷ്യത്തോടെ നിരവധി പുതിയ മാർക്കറ്റുകൾ തുറന്നിരിക്കുന്നു.

ഇപ്പോൾ 10,000 കിടക്കകളുള്ള ആസ്റ്റർ, അടുത്ത മൂന്ന് വർഷത്തിനുള്ളിൽ 4,000 കിടക്കകൾ കൂടി ചേർക്കാനുള്ള പദ്ധതിയിലാണ്. ഇത് ടയർ 2, ടയർ 3 വിപണികളിലെ ആരോഗ്യ സേവനം ഗണ്യമായി വർദ്ധിപ്പിക്കാൻ സഹായിക്കും. ലയനത്തിന് ശേഷമുള്ള ഈ പുതിയഘട്ടത്തിൽ, ആസ്റ്ററിന്റെ പ്രധാന ലക്ഷ്യം ബിസിനസിനെ കൂടുതൽ ശക്തമാക്കുകയും അതിന്റെ വലിയ വ്യാപ്തി പ്രയോജനപ്പെടുത്തുകയും ചെയ്യുക എന്നതാണെന്നും അലീഷ മൂപ്പൻ കൂട്ടിച്ചേർത്തു.

#AsterHealthcare #HealthcareExpansion #BusinessMerger #IndianHealthcare #GrowthStrategy #AsterDM