Medical | അടിവയറിലെ വേദന മലബന്ധം മൂലമോ? അപ്പന്ഡിക്സ് കാന്സറിന്റെ ലക്ഷണങ്ങള് അറിയാതെ പോകരുത്
അപ്പെൻഡിക്സ് വേദന അപ്പെൻഡിക്സ് ക്യാൻസറിന്റെ ലക്ഷണമാകാം എന്നത് പലർക്കും അറിയില്ല. പ്രത്യേകിച്ചും ചെറുപ്പക്കാർ ഇത് അവഗണിക്കാറുണ്ട്.
ന്യൂഡൽഹി: (KVARTHA) കാൻസർ എന്ന വാക്ക് കേൾക്കുമ്പോൾ പലർക്കും ഭയം തോന്നുന്നത് സ്വാഭാവികമാണ്. ദിനംപ്രതി കാൻസർ ബാധിതരുടെ എണ്ണം വർധിക്കുന്നത് ഈ ഭയത്തെ വർധിപ്പിക്കുന്നു. അതിലും അപൂർവമായി കാണപ്പെടുന്ന അപ്പെൻഡിക്സ് ക്യാൻസർ 40-60 വയസ്സുകാരിൽ കൂടുതലായി കണ്ടുവരുന്നു. എന്നാൽ ഇന്ന് യുവാക്കളിൽ പോലും ഈ അപൂർവ രോഗം വർധിക്കുന്നത് ആശങ്കയ്ക്ക് വക നൽകുന്നു. വൻകുടലിന്റെ തുടക്കത്തിൽ സ്ഥിതി ചെയ്യുന്ന ചെറിയ അവയവമായ അപ്പെൻഡിക്സിലാണ് ഈ കാൻസർ ഉണ്ടാകുന്നത്
അപ്പെൻഡിക്സ് കാൻസറിന്റെ ഒരു പ്രധാന വെല്ലുവിളി, അത് പലപ്പോഴും അപ്പെൻഡിസൈറ്റിസിന് സമാനമായ ലക്ഷണങ്ങൾ കാണിക്കുന്നു എന്നതാണ്. പ്രത്യേകിച്ചും ചെറുപ്പക്കാരായ രോഗികളിൽ, വയറുവേദന പോലുള്ള സാധാരണ ലക്ഷണങ്ങൾ കാരണം രോഗനിർണയം വൈകുകയും ചികിത്സയിൽ കാലതാമസം സംഭവിക്കുകയും ചെയ്യുന്നു. രോഗം മുന്നേറുമ്പോൾ, വിട്ടുമാറാത്ത മലബന്ധം, വിളർച്ച, ക്ഷീണം, ശരീരഭാരം കുറയൽ തുടങ്ങിയ ലക്ഷണങ്ങളും പ്രത്യക്ഷപ്പെടുന്നു.
ആൻഡ്രോമിഡ കാൻസർ ഹോസ്പിറ്റലിലെ സീനിയർ കൺസൾട്ടന്റും മെഡിക്കൽ ഓങ്കോളജിസ്റ്റുമായ ഡോ. രാമൻ സാരംഗ് പറയുന്നതനുസരിച്ച്, അപ്പെൻഡിക്സിൽ ഉണ്ടാകുന്ന കാൻസറുകൾ വ്യത്യസ്ത പ്രായക്കാരിൽ വ്യത്യസ്ത തരത്തിലാണ് കാണപ്പെടുന്നത്. പ്രായമായവരിൽ കൂടുതലായി കാണപ്പെടുന്നത് കോളനിക്-ടൈപ്പ് അഡിനോകാർസിനോമ എന്ന തരം കാൻസറാണ്. എന്നാൽ, അപ്പെൻഡിസിയൽ ന്യൂറോ എൻഡോക്രൈൻ ട്യൂമറുകൾ (NETs) എന്ന അപൂർവമായ തരം കാൻസർ പ്രധാനമായും ചെറുപ്പക്കാരിലാണ് കാണപ്പെടുന്നത്.
എന്താണ് അപ്പന്ഡിക്സിലെ ന്യൂറോ എന്ഡോക്രൈന് ട്യൂമറുകള്?
നമ്മുടെ ശരീരത്തിൽ നാഡികളുടെയും ഹോർമോണുകളുടെയും പ്രവർത്തനങ്ങൾ നിർവഹിക്കുന്ന ചില പ്രത്യേക കോശങ്ങളുണ്ട്. ഇവയെ ന്യൂറോ എൻഡോക്രൈൻ കോശങ്ങൾ എന്ന് വിളിക്കുന്നു. ഈ കോശങ്ങളിൽ നിന്നുണ്ടാകുന്ന അപൂർവമായ ഒരു തരം വളർച്ചയാണ് ന്യൂറോ എൻഡോക്രൈൻ ട്യൂമർ. ഇവ പലപ്പോഴും അപ്പെൻഡിക്സിൽ കാണപ്പെടുന്നതിനാൽ കാർസിനോയിഡ് ട്യൂമർ എന്നും അറിയപ്പെടുന്നു. ഈ ട്യൂമറുകൾ അപൂർവമാണെങ്കിലും, ആധുനിക മെഡിക്കൽ സാങ്കേതിക വിദ്യയുടെയും അവബോധത്തിന്റെയും വളർച്ചയോടെ ഇവയെ കൂടുതൽ കണ്ടെത്താനും ചികിത്സിക്കാനും സാധിക്കുന്നു.
എങ്ങനെ തിരിച്ചറിയാം?
ന്യൂറോ എൻഡോക്രൈൻ ട്യൂമറുകൾ കൂടുതൽ കൃത്യമായും നേരത്തേയും തിരിച്ചറിയുന്നതിന് പിന്നിൽ നിരവധി ഘടകങ്ങൾ പ്രവർത്തിക്കുന്നുണ്ട്. ആധുനിക ഇമേജിംഗ് സാങ്കേതികവിദ്യകളുടെയും പരിശോധനാ രീതികളുടെയും വികാസം ഈ ട്യൂമറുകൾ കൂടുതൽ വ്യക്തമായി ചിത്രീകരിക്കാൻ സഹായിക്കുന്നു. ഇത് ഡോക്ടർമാർക്ക് രോഗം നേരത്തെ കണ്ടെത്താനും അനുബന്ധ ചികിത്സകൾ നൽകാനും സാധ്യമാക്കുന്നു.
പൊതുജനങ്ങളും ആരോഗ്യ പ്രവർത്തകരും ന്യൂറോ എൻഡോക്രൈൻ ട്യൂമറുകളെക്കുറിച്ച് കൂടുതൽ ബോധവാന്മാരായിത്തീർന്നിട്ടുണ്ട്. ഇത് രോഗികൾ തങ്ങളിലെ ലക്ഷണങ്ങൾ തിരിച്ചറിഞ്ഞ് വൈദ്യസഹായം തേടാൻ പ്രേരിപ്പിക്കുന്നു. അതുപോലെ, ആരോഗ്യ പ്രവർത്തകർക്ക് ഈ രോഗം സംബന്ധിച്ച അറിവ് വർധിച്ചതോടെ കൂടുതൽ കൃത്യമായ രോഗനിർണയവും സാധ്യമാകുന്നു.
പരിസ്ഥിതിയിലും ജീവിതശൈലിയിലുണ്ടാകുന്ന മാറ്റങ്ങളും ന്യൂറോ എൻഡോക്രൈൻ ട്യൂമറുകളുടെ വ്യാപനത്തെ സ്വാധീനിക്കുന്നുണ്ടെന്നും പഠനങ്ങൾ സൂചിപ്പിക്കുന്നു. ഈ ഘടകങ്ങൾ രോഗത്തിന്റെ ഉത്ഭവത്തിലും വളർച്ചയിലും എങ്ങനെ പങ്കുവഹിക്കുന്നു എന്നതിനെക്കുറിച്ചുള്ള കൂടുതൽ ഗവേഷണങ്ങൾ നടന്നുവരുന്നു.
അപകട ഘടകങ്ങള്
അപൂർവ്വമാണെങ്കിലും, അപ്പെൻഡിക്സിലെ ന്യൂറോ എൻഡോക്രൈൻ ട്യൂമറുകൾക്ക് കാരണമാകുന്ന ചില ഘടകങ്ങൾ നമുക്ക് തിരിച്ചറിയാം. ജനിതകം തന്നെ ഒരു പ്രധാന കാരണമാണ്. നിങ്ങളുടെ കുടുംബത്തിൽ നേരത്തെ ഇത്തരം ട്യൂമറുകൾ ഉണ്ടായിട്ടുണ്ടെങ്കിൽ അപകടസാധ്യത കൂടുതലാണ്. പ്രത്യേകിച്ചും അൾട്ടിപ്പിള് എൻഡോക്രൈൻ നിയോപ്ലാസിയ പോലുള്ള ജനിതക രോഗങ്ങൾ ഉള്ളവരിൽ ഇത് കൂടുതൽ സാധ്യതയുണ്ട്.
പ്രായവും ലിംഗവും ഇതിൽ നിർണായക പങ്ക് വഹിക്കുന്നു. 30-40 വയസ്സുള്ള സ്ത്രീകളിൽ ഇത് കൂടുതലായി കാണപ്പെടുന്നു. മുൻകാല രോഗങ്ങൾ ഒരു വലിയ ഘടകമാണ്. മുമ്പ് ദഹനനാളത്തിൽ മാരകരോഗങ്ങൾ ഉണ്ടായിട്ടുള്ളവർക്ക് ഇത് പിടിപെടാനുള്ള സാധ്യത കൂടുതലാണ്. വിട്ടുമാറാത്ത വീക്കം പോലുള്ള അവസ്ഥകൾ, പ്രത്യേകിച്ച് ക്രോൺസ് രോഗം പോലുള്ളവ, ഇതിനെ പ്രേരിപ്പിക്കുമെന്ന് കരുതപ്പെടുന്നു. എന്നാൽ ഇതിനെക്കുറിച്ച് കൂടുതൽ പഠനങ്ങൾ ആവശ്യമാണ്.
ന്യൂറോ എന്ഡോക്രൈന് കാന്സറിന്റെ ലക്ഷണങ്ങള്
ന്യൂറോ എൻഡോക്രൈൻ മുഴകൾ പലപ്പോഴും നിശബ്ദമായി വളരുന്ന സൂക്ഷ്മ കൊലയാളികളാണ്. ഇവ പ്രാരംഭ ഘട്ടത്തിൽ അത്ര എളുപ്പം കണ്ടെത്താനാകാത്തതിനാൽ 'നിശബ്ദ കൊലയാളി' എന്ന വിശേഷണം അന്വർഥമാണ്. പലപ്പോഴും മറ്റ് അസുഖങ്ങൾക്ക് ചികിത്സ തേടുമ്പോഴാണ് ഇവ കണ്ടെത്തപ്പെടുന്നത്.
വയറുവേദനയും അതിനോട് അനുബന്ധിച്ചുള്ള അസ്വസ്ഥതകളും ഈ മുഴകളുടെ സാധാരണ ലക്ഷണങ്ങളിൽ ഒന്നാണ്. അപ്പെൻഡിസൈറ്റിസിന് സമാനമായ വേദന അടിവയറ്റിലെ വലതുഭാഗത്ത് അനുഭവപ്പെടാം. പലപ്പോഴും അപ്പെൻഡിക്ടമിക്ക് ശേഷം നടത്തുന്ന പരിശോധനയിലാണ് ഈ മുഴകൾ കണ്ടെത്തപ്പെടുന്നത്.
കാര്സിനോയിഡ് സിൻഡ്രോം എന്ന അപൂർവമായ അവസ്ഥയും ഈ മുഴകളുമായി ബന്ധപ്പെട്ടിരിക്കുന്നു. ട്യൂമർ രക്തത്തിലേക്ക് ഹോർമോണുകൾ പുറപ്പെടുവിച്ചാൽ ഹൃദയമിടിപ്പ് വർദ്ധിക്കൽ, ചുവപ്പ് നിറം വരിക, വയറിളക്കം, ശ്വാസം മുട്ടൽ തുടങ്ങിയ ലക്ഷണങ്ങൾ പ്രത്യക്ഷപ്പെടാം. വലിയ മുഴകൾ കുടലിൽ തടസ്സം സൃഷ്ടിച്ച് മലബന്ധം, ഓക്കാനം, ഛർദ്ദി എന്നീ പ്രശ്നങ്ങൾക്ക് കാരണമാകാം. കാരണമില്ലാതെ ഭാരം കുറയുന്നതും ഈ മുഴകളുമായി ബന്ധപ്പെട്ട ഒരു പൊതു ലക്ഷണമാണ്.
ചികിത്സയും രോഗനിര്ണയവും
അപ്പെൻഡിസൈറ്റിസ് എന്ന സാധാരണ സംശയത്തിൽ നടത്തുന്ന അപ്പെൻഡെക്ടമി ശസ്ത്രക്രിയ, ന്യൂറോ എൻഡോക്രൈൻ ട്യൂമറുകൾക്കുള്ള പ്രധാന ചികിത്സയാണ്. ചെറുതും പരിമിതപ്പെട്ടതുമായ മുഴകൾക്ക് ഈ ശസ്ത്രക്രിയ മതിയാകും. എന്നാൽ, മുഴ വളർന്ന് വലുതായാൽ അല്ലെങ്കിൽ ശരീരത്തിന്റെ മറ്റ് ഭാഗങ്ങളിലേക്ക് പടർന്നാൽ കൂടുതൽ സങ്കീർണ്ണമായ ശസ്ത്രക്രിയകൾ ആവശ്യമായി വന്നേക്കാം. ഇതിൽ വൻകുടലിന്റെ ഒരു ഭാഗം മുഴുവൻ നീക്കം ചെയ്യുന്ന ശസ്ത്രക്രിയയും ഉൾപ്പെടാം.
രോഗം ചെറിയ മുഴകളുള്ളവർക്ക് പൊതുവെ നല്ല പ്രതീക്ഷ നൽകുന്ന ഒന്നാണ്. എന്നാൽ, മുഴ വലുതായാലോ കൂടുതൽ ആക്രമണാത്മകമായാലോ ചികിത്സ സങ്കീർണ്ണമാകുകയും കൂടുതൽ ജാഗ്രത പാലിക്കേണ്ടി വരികയും ചെയ്യും. പറഞ്ഞു വന്നത്, ന്യൂറോ എൻഡോക്രൈൻ ട്യൂമർ എന്ന രോഗത്തിന്റെ ചികിത്സ, മുഴയുടെ വലുപ്പം, പടർന്നിരിക്കുന്ന വിധം എന്നിവയെ ആശ്രയിച്ച് വ്യത്യാസപ്പെടുന്നു എന്നതാണ്.
ഈ ലക്ഷണങ്ങൾ അനുഭവപ്പെട്ടാൽ അവഗണിക്കാതെ ഉടൻ തന്നെ ഒരു ഡോക്ടറെ സമീപിക്കുന്നത് അത്യാവശ്യമാണ്. പ്രത്യേകിച്ച്, അപ്പെൻഡിക്സ് ശസ്ത്രക്രിയയ്ക്ക് ശേഷവും ലക്ഷണങ്ങൾ തുടരുകയാണെങ്കിൽ അത് ഗുരുതരമായ ഒരു അവസ്ഥയുടെ സൂചനയായിരിക്കാം. നേരത്തെ രോഗം കണ്ടെത്തിയാൽ ചികിത്സ ഫലപ്രദമായിരിക്കാനുള്ള സാധ്യത കൂടുതലാണ്.
