ബീജിങ്: (KVARTHA) ചൈനീസ് സ്‌മാര്‍ട്ട്ഫോണ്‍ നിര്‍മാതാക്കളായ റെഡ്‌മിയുടെ നോട്ട് 14 പ്രോ സിരീസ് പുറത്തിറങ്ങി. റെഡ്‌മി നോട്ട് 14 പ്രോ, റെഡ്‌മി നോട്ട് 14 പ്രോ പ്ലസ് എന്നീ മോഡലുകളാണ് വരുന്നത്. റെഡ്മി നോട്ട് 13 പ്രോ സീരീസ് 2024 ജനുവരിയിൽ വിപണിയിൽ എത്തിയതിനാൽ, റെഡ്മി നോട്ട് 14 പ്രോ സീരീസ് ഇന്ത്യയിലും ഉടൻ തന്നെ എത്തുമെന്ന് പ്രതീക്ഷിക്കാം.

ഈ പുതിയ ഫോണുകൾ അത്യാധുനിക സാങ്കേതികവിദ്യകളോട് കൂടി വരുന്നതിനാൽ ഉപയോക്താക്കൾക്ക് മികച്ച അനുഭവം നൽകും. റെഡ്മി തങ്ങളുടെ പതിവ് പോലെ, വിലകുറഞ്ഞതും മികച്ച സവിശേഷതകളുള്ളതുമായ സ്മാർട്ട്‌ഫോണുകൾ വാഗ്ദാനം ചെയ്യുന്നു.

 സവിശേഷതകൾ

റെഡ്മി നോട്ട് 14 പ്രോയും പ്രോ പ്ലസും 6.67 ഇഞ്ച് വലിപ്പമുള്ള ഒലെഡ് ഡിസ്‌പ്ലേയാണ് ഉപയോഗിക്കുന്നത്. ഈ ഡിസ്‌പ്ലേക്ക് 2712 x 1220 പിക്‌സൽ എന്ന ഉയർന്നറെസല്യൂഷനും 120Hz റിഫ്രഷ് റേറ്റും 240Hz ടച്ച് സാംപ്ലിംഗ് റേറ്റും ഉണ്ട്. ഇത് കൊണ്ട് വീഡിയോകളും ഗെയിമുകളും കൂടുതൽ  മനോഹരമായി ആസ്വദിക്കാം. 3000 നിറ്റ്‌സ് വരെ പ്രകാശം പുറപ്പെടുവിക്കാൻ ഈ ഡിസ്‌പ്ലേക്ക് കഴിയും, അതായത് വെയിലത്തുപോലും സ്ക്രീൻ വ്യക്തമായി കാണാം. കോർണിങ് ഗൊറില്ല (Corning Gorilla Glass Victus 2) എന്ന സംരക്ഷണ പാളി ഡിസ്‌പ്ലേയെ പൊട്ടലുകളിൽ നിന്ന് സംരക്ഷിക്കുന്നു.

റെഡ്മി നോട്ട് 14 പ്രോ സീരിസ് രണ്ട് വ്യത്യസ്ത ചിപ്പുകളോടെയാണ് വരുന്നത്. പ്രോ മോഡൽ മീഡിയ ടെക് ചിപ്പും പ്രോ+ മോഡൽ സ്‌നാപ്‌ഡ്രാഗണ്‍ ചിപ്പും ഉപയോഗിക്കുന്നു. രണ്ടും 12ജിബി മുതൽ 16ജിബി വരെ റാം, 128ജിബി മുതൽ 512ജിബി വരെ സ്റ്റോറേജ് എന്നിവയോടെ ലഭ്യമാണ്. ഈ ഫോണുകളിൽ ആൻഡ്രോയ്ഡ് 14 ഓപ്പറേറ്റിങ് സിസ്റ്റവും ഷവോമി-യുടെ പുതിയ ഹൈപ്പർ ഒ എസ് ഇന്റർഫേസും ഉണ്ട്.

കാമറ 

ഫോട്ടോ എടുക്കാൻ ഇഷ്ടപ്പെടുന്നവർക്ക്, ഈ രണ്ട് ഫോണുകളും വളരെ നല്ലതാണ്. ഇവയിൽ രണ്ട് സിം കാർഡുകൾ ഒരേ സമയം ഉപയോഗിക്കാം. ഫോട്ടോയുടെ ഗുണമേന്മയും കൂടുതലാണ്. നോട്ട് 14 പ്രോയിൽ 50 മെഗാ പിക്സലിന്റെ പ്രധാന ക്യാമറ, 8എംപിയുടെ വീതിയുള്ള ക്യാമറ, 2 മെഗാ പിക്സലിന്റെ മാക്രോ ക്യാമറ എന്നിവയുണ്ട്. നോട്ട് 14 പ്രോ പ്ലസിൽ 50മെഗാ പിക്സലിന്റെ പ്രധാന ക്യാമറ (Light Fusion സാങ്കേതികവിദ്യയും OIS എന്നൊരു സവിശേഷതയുമുണ്ട്), 8മെഗാ പിക്സലിന്റെ വീതിയുള്ള ക്യാമറ, 50മെഗാ പിക്സലിന്റെ പോർട്രെയിറ്റ് ക്യാമറ എന്നിവയുണ്ട്. രണ്ട് ഫോണുകളിലും 20മെഗാ പിക്സലിന്റെ സെൽഫി ക്യാമറയുണ്ട്.

ദൈനംദിന ഉപയോഗത്തിൽ, രണ്ട് ഫോണുകളും വെള്ളവും പൊടിയും പ്രതിരോധിക്കുന്ന ഐപി 68 റേറ്റിംഗ് ഉള്ളതിനാൽ, ഏത് സാഹചര്യത്തിലും ഉപയോഗിക്കാം. രണ്ട് ഫോണുകളിലും ഫിംഗർ പ്രിന്റ് സ്കാനർ, ഡോൾബി അറ്റ്മോസ്‌ സാങ്കേതികവിദ്യയുള്ള സ്റ്റീരിയോ സ്പീക്കറുകൾ, യു എസ് ബി ടൈപ് സി ചാർജിങ്, 5ജി, വൈഫൈ 6 എന്നിവയുണ്ട്. നോട്ട് 14 പ്രോ 5500mAh ബാറ്ററിയും 45 വാട്സ് ഫാസ്റ്റ് ചാർജിംഗും നൽകുമ്പോൾ, നോട്ട് 14 പ്രോ+ 6200mAh ബാറ്ററിയും 90 വാട്സ് ഫാസ്റ്റ് ചാർജിംഗും വാഗ്ദാനം ചെയ്യുന്നു.

വില

ചൈനയിൽ പുറത്തിറങ്ങിയ റെഡ്മി നോട്ട് പ്രോ 14 സീരീസിലെ ഫോണുകൾ വിലകൊണ്ട് വ്യത്യസ്തമാണ്. റെഡ്മി നോട്ട് 14 പ്രോയ്ക്ക് 1499 യുവാൻ ആണ് (ഏകദേശം 17,870 രൂപ) വില. എന്നാൽ കൂടുതൽ ഫീച്ചറുകളുള്ള റെഡ്മി നോട്ട് 14 പ്രോ പ്ലസിന് 1999 യുവാൻ (ഏകദേശം 23,835 രൂപ) ആണ് വില. ഇന്ത്യയിൽ ഈ ഫോണുകൾക്ക് വില കുറച്ചുകൂടി കൂടുതലായിരിക്കാനാണ് സാധ്യത.

#RedmiNote14Pro, #Xiaomi, #smartphone, #launch, #China, #tech, #mobile, #gadget