വിജയ് യേശുദാസിൻ്റെ ക്രിസ്മസ് ഗാനം തരംഗമാകുന്നു; ആസ്വാദക ഹൃദയം കവർന്ന് 'ഈ രാത്രിയിൽ'

കൊച്ചി: (KVARTHA) മലയാളികളുടെ പ്രിയ ഗായകൻ വിജയ് യേശുദാസ് ആലപിച്ച ഏറ്റവും പുതിയ ക്രിസ്മസ് ആൽബം 'ഈ രാത്രിയിൽ' സംഗീത ലോകത്ത് തരംഗമാകുന്നു. റിലീസ് ചെയ്ത ഏതാനും മണിക്കൂറുകൾക്കുള്ളിൽ തന്നെ ലക്ഷക്കണക്കിന് കാഴ്ചക്കാരെ സ്വന്തമാക്കി മികച്ച ആസ്വാദകപ്രീതിയാണ് ഗാനം നേടുന്നത്. 

ഇരുപത്തിമൂന്നോളം അന്താരാഷ്ട്ര ഡിജിറ്റൽ പ്ലാറ്റ്‌ഫോമുകളിലായി ഇതിനോടകം ഒരു മില്യണിലധികം പ്രേക്ഷകരിലേക്ക് ഗാനം എത്തിയതായാണ് കണക്കുകൾ സൂചിപ്പിക്കുന്നത്. സാധാരണയായി കേട്ടുവരുന്ന ക്രിസ്മസ് ഗാനങ്ങളുടെ രചനാ ശൈലിയിൽ നിന്നും വേറിട്ടുനിൽക്കുന്ന വരികളാണ് പ്രശസ്ത ഗാനരചയിതാവ് രാജീവ് ആലുങ്കൽ ഇതിനായി ഒരുക്കിയിരിക്കുന്നത്. 

സംഗീത സംവിധായകൻ സൽജിൻ കളപ്പുരയുടെ വൈവിധ്യമാർന്ന ഈണവും ഗാനത്തിന് പുതുമ നൽകുന്നു. ബിജു പൗലോസിൻ്റെ മികവാർന്ന ഓർക്കസ്‌ട്രേഷനിൽ ഇന്ത്യയിലെ ശ്രദ്ധേയരായ സംഗീതജ്ഞരാണ് ഗാനത്തിൻ്റെ പിന്നണിയിൽ പ്രവർത്തിച്ചിട്ടുള്ളത്.

മലയാള സംഗീത രംഗത്ത് ചരിത്രം കുറിച്ചുകൊണ്ട് ഒരു ഹോളിവുഡ് താരം ഈ ഗാനത്തിൽ അണിചേരുന്നു എന്ന പ്രത്യേകതയുമുണ്ട്. ഹോളിവുഡിലെ പ്രശസ്ത ഒപ്പേറ സിംഗറായ ബ്രിജിറ്റി ഹൂളാണ് ഈ പാട്ടിലെ ഒപ്പേറ ഭാഗങ്ങൾക്ക് ശബ്ദം നൽകിയിരിക്കുന്നത്. 

വിജയ് യേശുദാസിൻ്റെ ആലാപനത്തിനൊപ്പം ബ്രിജിറ്റി ഹൂളിൻ്റെ ശബ്ദം കൂടിയായപ്പോൾ അന്താരാഷ്ട്ര നിലവാരമുള്ള ഒരു ദൃശ്യ-ശ്രാവ്യ അനുഭവമായി ആൽബം മാറിയിരിക്കുകയാണ്.

പൂർണ്ണമായും വിദേശ രാജ്യങ്ങളിൽ വെച്ചാണ് 'ഈ രാത്രിയിൽ' എന്ന ആൽബത്തിൻ്റെ ചിത്രീകരണം പൂർത്തിയാക്കിയത്. ഗാനം റിലീസ് ചെയ്ത് ദിവസങ്ങൾക്കുള്ളിൽ തന്നെ കേരളത്തിലെയും വിദേശത്തെയും നിരവധി ആരാധനാലയങ്ങളിലെ ഗായകസംഘങ്ങൾ ഈ ഗാനം ഏറ്റുപാടാൻ തുടങ്ങിയത് ഇതിൻ്റെ ജനപ്രീതി വർദ്ധിപ്പിക്കുന്നു. 

സമൂഹത്തിൻ്റെ വിവിധ മേഖലകളിൽ നിന്നുള്ള ആളുകളിൽ നിന്നും വലിയ തോതിലുള്ള അനുമോദനങ്ങളാണ് തങ്ങൾക്ക് ലഭിക്കുന്നതെന്ന് ഗാനത്തിൻ്റെ അണിയറ പ്രവർത്തകർ പ്രതികരിച്ചു.

സംഗീത സംവിധായകൻ സൽജിൻ കളപ്പുര നേരത്തെ ഒരുക്കിയ ഗാനങ്ങൾ കെ ജെ യേശുദാസ്, കെ എസ് ചിത്ര, എം ജി ശ്രീകുമാർ, സുജാത മോഹൻ, മധു ബാലകൃഷ്ണൻ, ശ്വേത മോഹൻ, കെസ്സർ തുടങ്ങി ദക്ഷിണേന്ത്യയിലെ പ്രമുഖ ഗായകർ പാടിയിട്ടുണ്ട്. 

ഈ ആൽബത്തിൻ്റെ വൻ വിജയത്തിന് പിന്നാലെ സൽജിൻ കളപ്പുര മലയാള ചലച്ചിത്ര ലോകത്തേക്ക് അരങ്ങേറ്റം കുറിക്കാനുള്ള ഒരുക്കത്തിലുമാണ്. വിജയ് യേശുദാസിൻ്റെ ഉടമസ്ഥതയിലുള്ള 'വി കമ്പനി' വഴിയാണ് ആൽബം പ്രേക്ഷകരിലേക്ക് എത്തിയത്.

ഈ വാർത്ത സുഹൃത്തുക്കൾക്കായി ഷെയർ ചെയ്യൂ. 

Article Summary: Vijay Yesudas's new Christmas album 'Ee Rathriyil' featuring Hollywood singer Brigitte Heulan goes viral on social media.

#VijayYesudas #ChristmasSong #EeRathriyil #MalayalamMusic #HollywoodSinger #ViralSong