സോണി കല്ലറയ്ക്കൽ

(KVARTHA) മോഹൻലാലും ശോഭനയും പ്രധാന കഥാപാത്രങ്ങളെ അവതരിപ്പിക്കുന്ന 'തുടരും' സിനിമ തീയേറ്ററുകളിൽ വിജയകരമായി പ്രദർശനം തുടരുകയാണ്. വർഷങ്ങൾക്ക് ശേഷം ഇരുവരും ഒന്നിക്കുന്നു എന്നത് ഈ സിനിമയുടെ പ്രധാന ആകർഷണമാണ്. ഒരുകാലത്ത് മലയാളി പ്രേക്ഷകരുടെ ഇഷ്ട ജോഡികളായിരുന്ന ഇവർ വീണ്ടും ഒന്നിക്കുന്നു എന്ന വാർത്ത വന്നതു മുതൽ ആരാധകർ വലിയ പ്രതീക്ഷയോടെയാണ് ഈ സിനിമയെ ഉറ്റുനോക്കിയത്. 

ഈ സിനിമയെക്കുറിച്ച് പറയുകയാണെങ്കിൽ, മോഹൻലാലിന്റെ തകർപ്പൻ പ്രകടനമാണ് സിനിമയിലുടനീളം കാണാൻ സാധിക്കുന്നത്. ഒരു ഇടവേളയ്ക്ക് ശേഷം, പഴയ ലാലേട്ടൻ തിരിച്ചുവന്നത് പോലെ അദ്ദേഹത്തിന്റെ അഭിനയം അതിഗംഭീരമായിരുന്നു. ശരീരത്തിന്റെ ഓരോ അണുവിലും കഥാപാത്രത്തെ ആവാഹിച്ച് ലാലേട്ടൻ സ്ക്രീനിൽ നിറഞ്ഞുനിൽക്കുന്നു. 

അദ്ദേഹത്തിന്റെ ആക്ഷൻ രംഗങ്ങൾ രോമാഞ്ചമുണ്ടാക്കുന്നതായിരുന്നു എന്ന് നിസ്സംശയം പറയാം. അത്ര മികച്ച പ്രകടനമാണ് അദ്ദേഹം കാഴ്ചവെച്ചത്. അദ്ദേഹത്തിന് അഭിനയിക്കാനുള്ള എല്ലാ സാധ്യതകളും തിരക്കഥയിൽ ഉണ്ടായിരുന്നു. ഒപ്പം ശക്തനായ ഒരു വില്ലനും സിനിമയിലുണ്ട്. വില്ലൻ കഥാപാത്രത്തെ അവതരിപ്പിക്കുന്നത് ഒരു പുതുമുഖ നടനാണ് എന്നതും ശ്രദ്ധേയമാണ്.

‘മോഹൻലാൽ തുടരും’ എന്ന ഒരു പ്രസ്താവന സിനിമയുടെ അവസാനത്തിൽ നൽകണമെങ്കിൽ, ഒരു സംവിധായകന് തന്റെ സിനിമയിൽ എത്രത്തോളം ആത്മവിശ്വാസം ഉണ്ടായിരിക്കണം എന്ന് ഊഹിക്കാവുന്നതാണ്. അത്തരമൊരു ആത്മവിശ്വാസത്തോടെയാണ് തരുൺ മൂർത്തി 'തുടരും' ഒരുക്കിയിരിക്കുന്നത്. ദി ആക്ടർ മോഹൻലാൽ വിൽ റിമൈൻ എന്ന് അന്വർത്ഥമാക്കുന്ന തരത്തിൽ ബെൻസ് ഷൺമുഖം എന്ന കഥാപാത്രത്തെയും സിനിമയെയും തരുൺ മനോഹരമായി രൂപപ്പെടുത്തിയിരിക്കുന്നു. 

ബെൻസിന്റെ കഥാപാത്രം പതിഞ്ഞ താളത്തിൽ തുടങ്ങി പിന്നീട് കത്തിക്കയറുന്ന രീതിയിൽ മോഹൻലാൽ എന്ന നടന്റെയും താരത്തിന്റെയും ആരാധകരെയും സാധാരണ പ്രേക്ഷകരെയും ഒരുപോലെ തൃപ്തിപ്പെടുത്തുന്ന മികച്ചൊരു സൃഷ്ടിയാണ് ഈ സിനിമ. ഒരു സാധാരണക്കാരനായ ബെൻസ് ഷൺമുഖത്തിലൂടെ മോഹൻലാലിന്റെ അഭിനയത്തെ ഇഷ്ടപ്പെടുന്നവരെപ്പോലും തൃപ്തിപ്പെടുത്താൻ സംവിധായകന് കഴിഞ്ഞിരിക്കുന്നു. 

വളരെ നാളുകൾക്ക് ശേഷമാണ് പ്രായമായവർ വരെ അടങ്ങുന്ന കുടുംബങ്ങൾ തീയേറ്ററുകളിലേക്ക് ഒഴുകിയെത്തുന്നത് കാണുന്നത്. മോഹൻലാൽ എന്ന നടന്റെ താരപ്രഭാവം എത്രത്തോളമുണ്ടെന്ന് ഇത് വ്യക്തമാക്കുന്നു. മോഹൻലാലിന്റെ അഭിനയത്തെ പ്രശംസിക്കുമ്പോൾ, സിഐ ജോർജ്ജ് എന്ന കഥാപാത്രത്തെ അവതരിപ്പിച്ച പ്രകാശ് വർമ്മ എന്ന നടനെയും ഓർക്കേണ്ടതുണ്ട്. 

അസാധാരണമായ സ്വഭാവമുള്ള ഈ കഥാപാത്രത്തെ ഒരു പുതുമുഖ നടനെ ഏൽപ്പിക്കാൻ തരുൺ മൂർത്തി കാണിച്ച ധൈര്യം അദ്ദേഹത്തിന്റെ കഴിവിലുള്ള വിശ്വാസം കൊണ്ടാകണം. ബിനു പപ്പു അവതരിപ്പിച്ച എസ്ഐ ബെന്നി എന്ന കഥാപാത്രത്തോട് പ്രേക്ഷകർക്ക് ദേഷ്യം തോന്നിയെങ്കിൽ അത് അദ്ദേഹത്തിന്റെ അഭിനയമികവ് ഒന്നു കൊണ്ടു മാത്രമാണ്. 

ശോഭനയുടെ ലളിത എന്ന കഥാപാത്രത്തിന് സിനിമയിൽ കാര്യമായൊന്നും ചെയ്യാനില്ലെങ്കിലും, വർഷങ്ങൾക്ക് ശേഷം ലാലേട്ടന്റെ നായികയായി ശോഭനയെ കാണുന്നത് തന്നെ സന്തോഷം നൽകുന്ന ഒരനുഭവമായിരുന്നു. സിനിമയെ ഒറ്റവാക്കിൽ വിശേഷിപ്പിക്കുകയാണെങ്കിൽ, മികച്ച സംവിധാനം, മികച്ച തിരക്കഥ, മികച്ച പശ്ചാത്തല സംഗീതം തുടങ്ങി എല്ലാം ഒന്നൊന്നായി എടുത്തു പറയേണ്ടതാണ്. കൂടെ മോഹൻലാൽ എന്ന നടന്റെ ഗംഭീര പ്രകടനവും.

ചിത്രത്തിൽ സാധാരണക്കാരനായ ടാക്സി ഡ്രൈവർ ഷൺമുഖമായി മോഹൻലാൽ അഭിനയിക്കുന്നു. ശോഭനയാണ് നായിക. 15 വർഷങ്ങൾക്ക് ശേഷമാണ് മോഹൻലാലും ശോഭനയും ഒന്നിച്ച് അഭിനയിക്കുന്നത്. വർഷങ്ങളായി മോഹൻലാലിന്റെ മികച്ച പ്രകടനം കാണാൻ കാത്തിരുന്ന ഒരു സിനിമാ പ്രേക്ഷകന് തരുൺ മൂർത്തി നൽകിയ സമ്മാനമാണ് ഈ സിനിമയിലെ ബെൻസ് ഷൺമുഖൻ. 

ഒരു സാധാരണ കുടുംബം അവരുടെ ചെറിയ സന്തോഷങ്ങളും ദുഃഖങ്ങളുമായി മുന്നോട്ട് പോകുന്ന ആദ്യ പകുതിയിൽ, ഇടവേളയോടടുത്ത് ആ കുടുംബം നേരിടുന്ന ഒരു പ്രശ്നമാണ് സിനിമയുടെ ഇതിവൃത്തം. ആദ്യ പകുതിയിൽ കാര്യമായ സംഭവങ്ങളൊന്നുമില്ല, കുറച്ച് ലാഗ് അനുഭവപ്പെടുന്നുണ്ട്. എന്നാൽ ഇടവേളയ്ക്ക് തൊട്ടുമുൻപ് സിനിമയുടെ പ്രധാന വഴിത്തിരിവ് കാണിച്ചു തരുന്നു. 

ശരാശരിയിൽ ഒതുങ്ങുന്ന ആദ്യ പകുതിയും, ആകർഷകമായ രണ്ടാം പകുതിയുമാണ് സിനിമയ്ക്കുള്ളത്. ആക്ഷനും ഡ്രാമയും സസ്പെൻസും സെൻ്റിമെൻസും എല്ലാം ആവശ്യത്തിന് രണ്ടാം പകുതിയിലുണ്ട്. ലാലേട്ടന്റെ തകർപ്പൻ പ്രകടനം എടുത്തു പറയേണ്ടതാണ്. ജനലിലൂടെയുള്ള അദ്ദേഹത്തിന്റെ ഒരു ചാട്ടം, ഈ പ്രായത്തിലും അവിശ്വസനീയമാണ്. ലാലേട്ടന്റെ അഭിനയം ദൃശ്യത്തിനും മുകളിൽ നിൽക്കുന്നു എന്ന് പറയാതെ വയ്യ. പക്ഷേ സിനിമകളുടെ താരതമ്യത്തിൽ ദൃശ്യം ഒരുപടി മുന്നിൽ നിൽക്കും.

തമിഴ് പശ്ചാത്തലമുള്ള രണ്ട്  കുട്ടികളുടെ അമ്മയായി ശോഭന അഭിനയിക്കുന്നു. ചില രംഗങ്ങളിൽ ബെൻസ് എന്ന കഥാപാത്രത്തേക്കാൾ പ്രായം തോന്നുന്നു എന്നത് ഒരു യാഥാർത്ഥ്യമാണ്. പക്ഷേ അത് സിനിമയെയോ അവരുടെ അഭിനയത്തെയോ ഒട്ടും ബാധിക്കുന്നില്ല. എന്തുതന്നെയായാലും അവരുടെ അഭിനയം മികച്ചതായിരുന്നു. 

ക്ലൈമാക്സ് സീനിന് തൊട്ടുമുൻപ് വില്ലന് ബെൻസിന്റെ കാൾ വരുമ്പോൾ ശോഭനയുടെ ലളിത എന്ന കഥാപാത്രം നൽകുന്ന ഒരു ഭാവമുണ്ട്. വില്ലനെ നോക്കിക്കൊണ്ട് വേദനയും ദേഷ്യവും വെറുപ്പും വിജയവും ആ നോട്ടത്തിൽ കാണാം. മീന പോയിട്ട് മഞ്ജു വാര്യർ വന്നാൽ പോലും അത്ര മികച്ച രീതിയിൽ അത് അവതരിപ്പിക്കാൻ ബുദ്ധിമുട്ടായിരിക്കും എന്ന് പറയേണ്ടിവരും.

മോഹൻലാൽ, ശോഭന എന്നിവരെ കൂടാതെ ബിനു പപ്പു, ഫർഹാൻ ഫാസിൽ, മണിയൻപിള്ള രാജു എന്നിവരും നിരവധി പുതുമുഖങ്ങളും ഈ സിനിമയിൽ അഭിനയിക്കുന്നുണ്ട്. രജപുത്രയുടെ ബാനറിൽ എം. രഞ്ജിത്താണ് സിനിമ നിർമ്മിച്ചിരിക്കുന്നത്. കെ.ആർ. സുനിലിന്റെ കഥയ്ക്ക് തരുൺ മൂർത്തിയും കെ.ആർ. സുനിലും ചേർന്നാണ് തിരക്കഥ എഴുതിയിരിക്കുന്നത്. ഷാജികുമാറാണ് ഛായാഗ്രഹണം നിർവ്വഹിച്ചിരിക്കുന്നത്. 

വലിയ പ്രതീക്ഷകളോടെ സിനിമ കാണാൻ പോകേണ്ടതില്ല. ഒരു സാധാരണ സിനിമ എന്ന ചിന്തയോടെ പോയാൽ മതി. ലാലേട്ടന്റെ പ്രകടനം ഗംഭീരമാണ്. കുടുംബത്തോടൊപ്പം പോയി കാണാൻ പറ്റിയ ഒരു സിനിമയാണിത്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

 Summary: The Malayalam movie 'Thudarum', starring Mohanlal and Shobhana, is receiving positive responses, especially from family audiences. Mohanlal's powerful performance and the reunion of the popular duo are major highlights.

#Thudarum, #Mohanlal, #Shobhana, #MalayalamMovie, #FamilyEntertainer, #MovieReview.