കാത്തിരിപ്പിന് വിരാമം; 9 ദേശങ്ങളിൽ നിന്നായി നാനൂറോളം പുലികൾ സ്വരാജ് റൗണ്ട് കീഴടക്കും; പുലിക്കളിക്കായി ഒരുങ്ങി തൃശൂർ

തൃശൂർ: (KVARTHA) ചെണ്ടമേളത്തിനൊപ്പം അരമണികിലുക്കി ആർപ്പുവിളികളുമായി നാനൂറോളം പുലികൾ ശനിയാഴ്ച (ഓഗസ്റ്റ് 28) സ്വരാജ് റൗണ്ടും നഗരവും കീഴടക്കും. തൃശൂരിന്റെ ഓണാഘോഷത്തിന്റെ ഭാഗമായുള്ള പ്രസിദ്ധമായ പുലിക്കളി ആഘോഷത്തിന് ശനിയാഴ്ച വൈകിട്ട് 4-ന് തുടക്കമാകും. വിവാദങ്ങളെ അതിജീവിച്ച്, തനതു നാടൻ കലാരൂപത്തിന്റെ തനിമയും കൂട്ടായ്‌മയുടെ കരുത്തും ചോരാതെയാണ് ഇത്തവണ പുലിക്കളി അരങ്ങേറുന്നത്.

പങ്കെടുക്കുന്ന ദേശങ്ങളും സമയക്രമവും

ഇത്തവണ 9 പുലിക്കളി സംഘങ്ങളാണ് പങ്കെടുക്കുന്നത്. ഇതിൽ ഒളരിക്കര ദേശം ഇതാദ്യമായാണ് ചുവടുവയ്ക്കുന്നത്. വിയ്യൂർ യുവജനസംഘം, കുട്ടൻകുളങ്ങര ദേശം, പാട്ടുരായ്ക്കൽ ദേശം, പൂങ്കുന്നം സീതാറാം മിൽ ദേശം, ചക്കാമുക്ക് ദേശം, കാനാട്ടുകര ദേശം, ഒളരിക്കര, ശങ്കരംകുളങ്ങര ദേശം, അയ്യന്തോൾ ദേശം എന്നിവയാണ് ഇത്തവണത്തെ പുലിമടകൾ. ഓരോ സംഘങ്ങളിലും 35 മുതൽ 51 വരെ പുലിക്കളി കലാകാരന്മാരും വാദ്യ സംഘത്തിൽ 25 മുതൽ 35 വരെ അംഗങ്ങളുമുണ്ടാകും.

● ശനിയാഴ്ച ഉച്ചയ്ക്ക് രണ്ടോടെ ദേശങ്ങളിൽ നിന്നുള്ള പുലിക്കളി യാത്ര ആരംഭിക്കും.
● വൈകിട്ട് 4-ന് സ്വരാജ് റൗണ്ടിലെ ബിനി ജങ്ഷനിൽ മന്ത്രി ഒ.ജെ. ജനീഷ് ഫ്ലാഗ് ഓഫ് നിർവഹിക്കും.
● വൈകിട്ട് 4-ന് വിയ്യൂർ യുവജനസംഘം ആദ്യം സ്വരാജ് റൗണ്ടിലെത്തും. ഏറ്റവും ഒടുവിലായി രാത്രി 7.20-ന് അയ്യന്തോൾ ദേശവും പ്രവേശിക്കും.
● രാത്രി 10 ഓടെ ആഘോഷവും വിധിനിർണയവും പൂർത്തിയാകും.

അടുത്ത വർഷം കൂടുതൽ സംഘങ്ങളെ പങ്കെടുപ്പിച്ച് ഗിന്നസ് ലോക റെക്കോർഡ് ലക്ഷ്യമിട്ട് പ്രവർത്തിക്കുമെന്ന് മേയർ നിജി ജസ്‌റ്റിൻ വ്യക്തമാക്കി.

ഗതാഗത നിയന്ത്രണങ്ങൾ

ചതയം ദിനാഘോഷങ്ങൾ നടക്കുന്നതിനാൽ വെള്ളിയാഴ്ച വൈകിട്ട് 3 മുതൽ തൃശൂർ നഗരത്തിലെ സ്വരാജ് റൗണ്ടിലും പരിസരപ്രദേശങ്ങളിലും പൊലീസ് ഭാഗിക ഗതാഗത നിയന്ത്രണം ഏർപ്പെടുത്തിയിട്ടുണ്ട്. കെ.എസ്.ആർ.ടി.സി. സ്‌റ്റാൻഡിൽ നിന്നു ചാലക്കുടി, എറണാകുളം ഭാഗത്തേക്കുള്ള എല്ലാ ബസുകളും ശക്തൻ സ്റ്റ‌ാൻഡിൽ നിന്നാകും സർവീസ് നടത്തുക. അങ്കമാലി, ചാലക്കുടി, പുതുക്കാട്, ഇരിങ്ങാലക്കുട പ്രദേശങ്ങളിൽ നിന്നുള്ള ഓർഡിനറി ബസുകൾ ശക്തൻ സ്റ്റാൻഡിൽ സർവീസ് അവസാനിപ്പിച്ച് തിരികെ സർവീസ് നടത്തും.

നിശ്ചലദൃശ്യങ്ങളും സമ്മാനങ്ങളും

ഓരോ പുലിക്കളി സംഘത്തിലും പുരാണം, സമകാലികം എന്നീ ആശയങ്ങളിൽ രണ്ട് നിശ്ചല ദൃശ്യങ്ങളുണ്ടാകും. ലഹരി വിരുദ്ധ പ്രവർത്തനങ്ങളുടെ ഭാഗമായി പൊലീസും കോർപറേഷനുമായി ചേർന്ന് 'ഓപ്പറേഷൻ തൂഫാൻ' എന്ന പ്രത്യേക നിശ്ചല ദൃശ്യവുമുണ്ടാകുമെന്ന് ഡെപ്യൂട്ടി മേയർ എ. പ്രസാദ് പറഞ്ഞു. പാറമേക്കാവ് ക്ഷേത്രത്തിനു സമീപം, എം.ഒ. റോഡ്, നടുവിലാൽ ജങ്ഷൻ എന്നിവിടങ്ങളിലാണ് വിധിനിർണയം നടക്കുക.

മികച്ച പുലിക്കളി സംഘം ഉൾപ്പെടെ ആകെ 9 ഇനങ്ങളിലാണ് കാഷ് പ്രൈസും ട്രോഫിയുമടങ്ങുന്ന സമ്മാനങ്ങൾ നൽകുന്നത്. മുൻപ് 3.12 ലക്ഷം രൂപയായിരുന്ന സമ്മാനത്തുക ഇത്തവണ 3.50 ലക്ഷമാക്കി വർധിപ്പിച്ചിട്ടുണ്ട്.

മികച്ച ടീമിന് 70,000 രൂപ, രണ്ടാം സ്ഥാനക്കാർക്ക് 60,000 രൂപ, മൂന്നാം സ്ഥാനത്തിന് 50,000 രൂപ, മികച്ച അച്ചടക്കം പാലിക്കുന്ന ടീമിന് 20,000 രൂപ എന്നിങ്ങനെയാണ് സമ്മാനത്തുക. പുലിക്കളി ടീമുകൾക്ക് 250 ലിറ്റർ കുടിവെള്ളവും ദേഹത്തെ ചായം കളയാൻ 120 ലിറ്റർ മണ്ണെണ്ണയും നൽകുമെന്ന് പുലിക്കളി കൺവീനർ ടി.ആർ. സന്തോഷ് അറിയിച്ചു.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താനും മറക്കരുത്. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക് പേജും ഫോളോ ചെയ്യുക. 

Article Summary: Thrissur Pulikkali 2026 to feature 400 tigers from 9 desams.

#ThrissurPulikkali #Onam2026 #KeralaTourism #ThrissurNews #KeralaFestivals #Pulikkali #SwarajRound