ഭൈരവിയായി മാളവിക മോഹനൻ; പ്രഭാസ് ചിത്രം 'രാജാസാബ്' ക്യാരക്ടർ പോസ്റ്റർ പുറത്തിറങ്ങി

കൊച്ചി: (KVARTHA) കോരിത്തരിപ്പിക്കുന്ന ബ്രഹ്മാണ്ഡ ദൃശ്യ വിരുന്നായി പ്രഭാസ് നായകനാകുന്ന ഹൊറർ-ഫാൻ്റസി ചിത്രം 'രാജാസാബ്' തിയേറ്ററുകളിലേക്ക് എത്താൻ തയ്യാറെടുക്കുന്നു. സിനിമയിലെ നായികമാരിൽ ഒരാളായ മാളവിക മോഹനന്റെ കഥാപാത്രത്തെ പരിചയപ്പെടുത്തുന്ന പുതിയ ക്യാരക്ടർ പോസ്റ്റർ അണിയറപ്രവർത്തകർ പുറത്തുവിട്ടു. 

ഭൈരവി എന്ന കഥാപാത്രമായാണ് ചിത്രത്തിൽ താരം വേഷമിടുന്നത്. മലയാളം, തമിഴ്, തെലുങ്ക് ഭാഷകളിൽ ഇതിനോടകം ശ്രദ്ധേയമായ വേഷങ്ങൾ കൈകാര്യം ചെയ്ത മാളവികയുടെ തെലുങ്കിലെ സുപ്രധാന ചുവടുവെപ്പായാണ് ഈ ചിത്രം കണക്കാക്കപ്പെടുന്നത്.

വരുന്ന 2026 ജനുവരി 9 വ്യാഴാഴ്ചയാണ് 'രാജാസാബ്' ലോകമെമ്പാടും റിലീസ് ചെയ്യുന്നത്. ചിത്രത്തിലെ 'റിബൽ സാബ്' എന്ന ഗാനവും സഹാന എന്ന ഗാനവും നേരത്തെ തന്നെ തരംഗമായിരുന്നു. കൂടാതെ സിനിമയുടെ ടീസറും പ്രൊമോ വീഡിയോകളും പ്രേക്ഷകർക്കിടയിൽ വലിയ ആവേശമാണ് സൃഷ്ടിച്ചിരിക്കുന്നത്. 

ഐതിഹ്യങ്ങളും മിത്തുകളും എഡ്ജ് ഓഫ് ദ സീറ്റ് ത്രില്ലിംഗ് നിമിഷങ്ങളും കോർത്തിണക്കിയാണ് സംവിധായകൻ മാരുതി ഈ പാൻ-ഇന്ത്യൻ ചിത്രം ഒരുക്കിയിരിക്കുന്നത്. പ്രഭാസ് ഇരട്ടവേഷത്തിലാണ് ചിത്രത്തിൽ എത്തുന്നതെന്ന് ട്രെയിലറിൽ നിന്നുള്ള സൂചനകൾ വ്യക്തമാക്കുന്നു. ബോളിവുഡ് താരം സഞ്ജയ് ദത്തിന്റെ വേറിട്ട വേഷപ്പകർച്ചയും സിനിമയുടെ മറ്റൊരു ആകർഷണമാണ്. 

പീപ്പിൾ മീഡിയ ഫാക്ടറിയുടെ ബാനറിൽ ടി.ജി. വിശ്വപ്രസാദ് നിർമ്മിക്കുന്ന ഈ ബിഗ് ബജറ്റ് ചിത്രം ഹൊറർ, ഫാൻ്റസി, റൊമാൻസ്, കോമഡി എന്നീ ഘടകങ്ങൾ സമന്വയിപ്പിച്ചാണ് പ്രേക്ഷകരിലേക്ക് എത്തുന്നത്. അത്യാധുനിക വിഎഫ്എക്സ് ദൃശ്യങ്ങൾ സിനിമയുടെ ദൃശ്യാനുഭവം വർദ്ധിപ്പിക്കുമെന്നാണ് കരുതുന്നത്.

ബോക്സോഫീസിൽ തരംഗമായ 'കൽക്കി 2898 എ.ഡി' എന്ന ചിത്രത്തിന് ശേഷം പ്രഭാസിന്റേതായി പുറത്തിറങ്ങുന്ന സിനിമയാണിത്. ഇന്ത്യൻ സിനിമയിൽ ഇതുവരെ കണ്ടിട്ടില്ലാത്ത വിധത്തിലുള്ള സൂപ്പർ നാച്ചുറൽ ദൃശ്യങ്ങൾ രാജാസാബിലുണ്ടാകുമെന്ന് അണിയറപ്രവർത്തകർ അവകാശപ്പെടുന്നു. പ്രഭാസ്, മാളവിക മോഹനൻ എന്നിവർക്ക് പുറമെ സഞ്ജയ് ദത്ത്, ബൊമൻ ഇറാനി, സെറീന വഹാബ്, നിധി അഗർവാൾ, റിദ്ധി കുമാർ തുടങ്ങിയ വമ്പൻ താരനിര തന്നെ ചിത്രത്തിലുണ്ട്.

ഹൊറർ ഈസ് ദ ന്യൂ ഹ്യൂമർ' എന്ന രസകരമായ ടാഗ് ലൈനുമായാണ് ചിത്രം എത്തുന്നത്. കുടുംബ പ്രേക്ഷകർക്ക് പ്രിയപ്പെട്ട ചിത്രങ്ങളായ 'പ്രതി റോജു പാണ്ഡഗെ', 'മഹാനുഭാവുഡു' എന്നിവയ്ക്ക് ശേഷം മാരുതി സംവിധാനം ചെയ്യുന്ന ബിഗ് ബജറ്റ് ചിത്രമെന്ന നിലയിലും ഇതിന് വലിയ പ്രതീക്ഷയുണ്ട്. തെലുങ്ക്, തമിഴ്, മലയാളം, കന്നഡ, ഹിന്ദി എന്നീ അഞ്ച് ഭാഷകളിലായി പാൻ ഇന്ത്യൻ റിലീസായാണ് ചിത്രം പ്രദർശനത്തിന് എത്തുന്നത്.

ഇന്ത്യൻ സിനിമയിൽ ഒരു ഹൊറർ ചിത്രത്തിന് വേണ്ടി ഒരുക്കിയിട്ടുള്ളതിൽ വെച്ച് ഏറ്റവും വലിയ സെറ്റുകളാണ് ഈ സിനിമയ്ക്കായി സജ്ജമാക്കിയിരിക്കുന്നത്. വിവേക് കുച്ചിബോട്ല സഹനിർമ്മാതാവായ ചിത്രത്തിന്റെ സംഗീത സംവിധാനം തമൻ എസ്. ആണ് നിർവ്വഹിക്കുന്നത്. 

കാർത്തിക് പളനി ഛായാഗ്രഹണവും കോത്തഗിരി വെങ്കിടേശ്വര റാവു ചിത്രസംയോജനവും നിർവ്വഹിക്കുന്നു. ബാഹുബലിയിലൂടെ ശ്രദ്ധേയനായ ആർ.സി. കമൽ കണ്ണനാണ് വിഎഫ്എക്സ് വിഭാഗം കൈകാര്യം ചെയ്യുന്നത്. രാജീവൻ പ്രൊഡക്ഷൻ ഡിസൈനറും എസ് എൻ കെ ക്രിയേറ്റീവ് പ്രൊഡ്യൂസറുമാണ്. ആതിര ദിൽജിത്താണ് പി.ആർ.ഒ.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക.

Article Summary: Character poster of Malavika Mohanan as Bhairavi from Prabhas starrer The Raja Saab released. Movie release on Jan 9, 2026.

#TheRajaSaab #Prabhas #MalavikaMohanan #Bhairavi #Maruthi #PanIndianFilm