തലശ്ശേരി അന്താരാഷ്ട്ര ചലച്ചിത്രമേളയ്ക്ക് വ്യാഴാഴ്ച തിരി തെളിയും

തലശ്ശേരി: (KVARTHA) കേരള സംസ്ഥാന ചലച്ചിത്ര അക്കാദമി ഒക്ടോബർ 16 വ്യാഴാഴ്ച മുതൽ 19 വരെ ലിബർട്ടി തിയേറ്റർ സമുച്ചയത്തിൽ സംഘടിപ്പിക്കുന്ന തലശ്ശേരി രാജ്യാന്തര ചലച്ചിത്രമേളയ്ക്ക് വ്യാഴാഴ്ച തിരിതെളിയുമെന്ന് സ്പീക്കർ അഡ്വ. എ എൻ ഷംസീർ തലശ്ശേരിയിൽ വാർത്താസമ്മേളനത്തിൽ അറിയിച്ചു.

വ്യവസായ വകുപ്പ് മന്ത്രി പി രാജീവ് ഉദ്ഘാടനം നിർവഹിക്കും. സ്പീക്കർ എ എൻ ഷംസീർ അധ്യക്ഷത വഹിക്കും. ഉദ്ഘാടനച്ചടങ്ങിനുശേഷം കാൻ മേളയിൽ ഗ്രാൻഡ് പ്രി പുരസ്‌കാരം നേടിയ 'ഓൾ വി ഇമാജിൻ ഏസ് ലൈറ്റ്' പ്രദർശിപ്പിക്കും.

ലിബർട്ടി ലിറ്റിൽ പാരഡൈസിൽ വൈകിട്ട് ആറു മണിക്ക് നടക്കുന്ന ഉദ്ഘാടനച്ചടങ്ങിൽ മുനിസിപ്പൽ ചെയർപേഴ്സൺ കെ എം ജമുനാ റാണി, ചലച്ചിത്ര അക്കാദമി ചെയർപേഴ്സൺ പ്രേംകുമാർ, ചലച്ചിത്ര വികസന കോർപ്പറേഷൻ ചെയർപേഴ്സണും സംവിധായകനുമായ കെ മധു, നടനും സംവിധായകനുമായ ശങ്കർ രാമകൃഷ്ണൻ, സംസ്ഥാന ചലച്ചിത്ര അവാർഡ് ജേതാവായ ഡബ്ബിംഗ് ആർട്ടിസ്റ്റ് സ്നേഹ എം, ചലച്ചിത്ര അക്കാദമി സെക്രട്ടറി സി അജോയ്, നിർമ്മാതാവ് ലിബർട്ടി ബഷീർ തുടങ്ങിയവർ പങ്കെടുക്കും.

ഉദ്ഘാടന ചിത്രം

ഉദ്ഘാടന ചിത്രമായ 'ഓൾ വി ഇമാജിൻ ഏസ് ലൈറ്റ്') പ്രധാനമായും മലയാളത്തിലാണ് ഒരുക്കിയിരിക്കുന്നത്. മുംബൈയിൽ ജോലി ചെയ്യുന്ന രണ്ട് മലയാളി നഴ്സുമാരുടെ വൈകാരികപ്രശ്നങ്ങളാണ് സിനിമ അവതരിപ്പിക്കുന്നത്. 

കനി കുസൃതി, ദിവ്യപ്രഭ, ഹൃദു ഹാറൂൺ, അസീസ് നെടുമങ്ങാട് എന്നീ മലയാളി താരങ്ങളാണ് ഇതിൽ വേഷമിടുന്നത്. 29-ാമത് ഐ എഫ് എഫ് കെയിൽ സ്പിരിറ്റ് ഓഫ് സിനിമ അവാർഡ് പായൽ കപാഡിയയ്ക്ക് സമ്മാനിക്കുന്നതിന്റെ ഭാഗമായി ഈ ചിത്രം പ്രദർശിപ്പിച്ചിരുന്നു. 

മുപ്പത് വർഷങ്ങൾക്കു മുമ്പ്, 1994-ലെ സ്വം എന്ന ചിത്രത്തിനുശേഷം കാൻ ചലച്ചിത്രമേളയുടെ മത്സരവിഭാഗത്തിൽ ഇടം നേടിയ ഇന്ത്യൻ സിനിമയാണ് 'ഓൾ വി ഇമാജിൻ ഏസ് ലൈറ്റ്'. ഷിക്കാഗോ, സാൻ സെബാസ്റ്റ്യൻ ചലച്ചിത്രമേളകളിലും ഈ സിനിമ പുരസ്കാരങ്ങൾ നേടിയിരുന്നു. 115 മിനിറ്റാണ് ചിത്രത്തിന്റെ ദൈർഘ്യം.

മുഖ്യ ആകർഷണങ്ങൾ

കഴിഞ്ഞ ഡിസംബറിൽ തിരുവനന്തപുരത്ത് നടന്ന 29-ാമത് ഐ എഫ് എഫ് കെയിൽ പ്രദർശിപ്പിച്ച 177 സിനിമകളിൽനിന്ന് തിരഞ്ഞെടുത്ത 55 ചിത്രങ്ങളാണ് മേളയിൽ പ്രദർശിപ്പിക്കുക.

അന്താരാഷ്ട്ര മത്സരവിഭാഗത്തിൽനിന്നുള്ള 14 ചിത്രങ്ങൾ, ലോകസിനിമാ വിഭാഗത്തിൽനിന്നുള്ള 12 ചിത്രങ്ങൾ, ഫെസ്റ്റിവൽ ഫേവറിറ്റ്‌സ് വിഭാഗത്തിൽനിന്നുള്ള 5 ചിത്രങ്ങൾ, 12 മലയാള ചിത്രങ്ങൾ, 7 ഇന്ത്യൻ സിനിമകൾ, കലൈഡോസ്‌കോപ്പ്, ഫിമേയ്ല്‍ ഗേസ്, ലൈഫ്‌ടൈം അച്ചീവ്‌മെന്റ് അവാർഡ്, അർമീനിയൻ ഫോക്കസ് എന്നീ വിഭാഗങ്ങളിൽനിന്നുള്ള ഓരോ ചിത്രങ്ങൾ എന്നിവയാണ് മേളയിൽ ഉൾപ്പെടുത്തിയിരിക്കുന്നത്.

കാന്‍ ഫെസ്റ്റിവലിൽ പാം ദോർ ലഭിച്ച 'അനോറ', കാൻ മേളയിൽ മികച്ച നടിക്കുള്ള പുരസ്‌കാരവും രണ്ട് ഓസ്‌കർ പുരസ്‌കാരങ്ങളും ലഭിച്ച 'എമിലിയ പെരസ്', വെനീസ് ഫെസ്റ്റിവലിൽ ഗോൾഡൻ ലയൺ ലഭിച്ച 'ദ റൂം നെക്സ്റ്റ്‌ഡോർ', കാനിൽ മികച്ച തിരക്കഥയ്ക്കുള്ള അവാർഡ് നേടിയ 'ദ സബ്സ്റ്റൻസ്', വെനീസ് മേളയിൽ മികച്ച സംവിധായകനുള്ള പുരസ്‌കാരം നേടിയ വാൾട്ടർ സാലസിന്റെ 'ഐ ആം സ്റ്റിൽ ഹിയർ', ഐ എഫ് എഫ് കെയിൽ സുവർണ ചകോരം ലഭിച്ച ബ്രസീലിയൻ ചിത്രമായ 'മാലു', രജതചകോരം ലഭിച്ച 'മി മറിയം ദ ചിൽഡ്രൻ ആന്റ് 26 അദേഴ്‌സ്', നവാഗത സംവിധായകനുള്ള രജതചകോരം ലഭിച്ച 'ഹൈപ്പർബോറിയൻസ്', പ്രേക്ഷക പുരസ്‌കാരം, നെറ്റ്പാക് പുരസ്‌കാരം, ജൂറി പ്രൈസ് എന്നിവ നേടിയ 'ഫെമിനിച്ചി ഫാത്തിമ', മികച്ച നവാഗത സംവിധായകപ്രതിഭയ്ക്കുള്ള എഫ് എഫ് എസ് ഐ അവാർഡ് ഇന്ദുലക്ഷ്മിക്ക് നേടിക്കൊടുത്ത 'അപ്പുറം' തുടങ്ങിയ ചിത്രങ്ങൾ ഇതിൽ ഉൾപ്പെടുന്നു.

മൂന്ന് തിയേറ്ററുകളിലായി ദിവസവും അഞ്ച് പ്രദർശനങ്ങൾ ഉണ്ടായിരിക്കും. 1500 ഓളം ഡെലിഗേറ്റുകളാണ് മേളയിൽ പങ്കെടുക്കുന്നത്.

എം ടി എക്സിബിഷൻ

മേളയുടെ ഭാഗമായി എം ടി വാസുദേവൻ നായർക്ക് ആദരമർപ്പിച്ചുകൊണ്ടുള്ള 'കാലം: മായാചിത്രങ്ങൾ' എന്ന ഫോട്ടോ എക്സിബിഷൻ ലിബർട്ടി തിയേറ്റർ പരിസരത്ത് ഒരുക്കിയ പവലിയനിൽ സംഘടിപ്പിക്കും. 

എക്സിബിഷനിൽ എം ടിയുടെ ചലച്ചിത്രജീവിതവുമായി ബന്ധപ്പെട്ട 100 ഓളം ചിത്രങ്ങളാണ് ഉൾപ്പെടുത്തിയിരിക്കുന്നത്. ചലച്ചിത്ര ചരിത്രകാരനും ഫോട്ടോഗ്രാഫറുമായ ആർ ഗോപാലകൃഷ്ണനാണ് ക്യുറേറ്റർ.

'മഞ്ഞ്', 'താഴ്വാരം', 'ദയ', 'വാരിക്കുഴി', 'പെരുന്തച്ചൻ', 'പരിണയം', 'വിൽക്കാനുണ്ട് സ്വപ്നങ്ങൾ', 'വൈശാലി' തുടങ്ങിയ ചിത്രങ്ങളുടെ ലൊക്കേഷനിൽ അണിയറപ്രവർത്തകർക്കൊപ്പമുള്ള എം ടിയുടെ ചിത്രങ്ങൾ, 'ഇരുട്ടിന്റെ ആത്മാവ്', 'നഗരമേ നന്ദി', 'അസുരവിത്ത്', 'കടവ്', 'പഞ്ചാഗ്‌നി', 'ആരണ്യകം', 'ഉത്തരം', 'തൃഷ്ണ', 'വിത്തുകൾ' തുടങ്ങിയ എം ടിച്ചിത്രങ്ങളിൽനിന്നുള്ള ദൃശ്യങ്ങൾ എന്നിവ എക്സിബിഷനിൽ ഉണ്ടായിരിക്കും.

ഓപ്പൺ ഫോറം, കലാപരിപാടികൾ

ലിബർട്ടി തിയേറ്റർ പരിസരത്ത് ഒരുക്കിയ പവലിയനിൽ ഒക്ടോബർ 17, 18 തീയതികളിൽ ഓപ്പൺ ഫോറം ഉണ്ടായിരിക്കും. ചലച്ചിത്രപ്രവർത്തകരും ഡെലിഗേറ്റുകളും സിനിമയിലെ സമകാലിക പ്രവണതകളെക്കുറിച്ചുള്ള ആശയസംവാദങ്ങളിൽ പങ്കെടുക്കും.

ഒക്ടോബർ 17, 18 തീയതികളിൽ തലശ്ശേരി ജവഹർഘട്ടിൽ കലാസാംസ്‌കാരിക പരിപാടികൾ സംഘടിപ്പിക്കും. 17-ന് വൈകിട്ട് 6.30-ന് രാഗവല്ലി ബാൻഡും 18-ന് വൈകിട്ട് മദ്രാസ് മെയിൽ ബാൻഡും സംഗീതപരിപാടികൾ അവതരിപ്പിക്കും.

തലശ്ശേരി പേൾ വ്യൂ റീജൻസിയിൽ നടന്ന വാർത്താസമ്മേളനത്തിൽ ചലച്ചിത്ര അക്കാദമി ചെയർപേഴ്സൺ പ്രേംകുമാർ, സെക്രട്ടറി സി അജോയ്, ഡെപ്യൂട്ടി ഡയറക്ടർ ഫെസ്റ്റിവൽ എച്ച് ഷാജി, പ്രദീപ് ചൊക്ലി, അർജുൻ എസ് കെ, സുരാജ് ചിറക്കര എന്നിവർ പങ്കെടുത്തു.

തലശ്ശേരി രാജ്യാന്തര ചലച്ചിത്രമേളയെക്കുറിച്ചുള്ള വിവരങ്ങൾ സിനിമാ പ്രേമികളിലേക്ക് എത്തിക്കാൻ സഹായിക്കാമോ? നിങ്ങളുടെ സുഹൃത്തുക്കളുമായി പങ്കുവെക്കുക.

Article Summary: Thalassery International Film Festival (TIFF) begins on Thursday, featuring 55 films, an MT exhibition, and an open forum.

#TIFF #ThalasseryFilmFestival #IFFK #AllWeImagineAsLight #MTVasudevanNair #KeralaFilm