കൊച്ചി: (KVARTHA) സുരേഷ് ഗോപിയെ നായകനാക്കി ശ്രീ ഗോകുലം മൂവീസിൻ്റെ ബാനറിൽ ശ്രീഗോകുലം ഗോപാലൻ നിർമ്മിച്ച് മാത്യൂസ് തോമസ് സംവിധാനം ചെയ്യുന്ന 'ഒറ്റക്കൊമ്പൻ' എന്ന ചിത്രത്തിൻ്റെ രണ്ടാം ഘട്ട ചിത്രീകരണം വിഷുവിന് ശേഷം ആരംഭിക്കും. ചിത്രം ഏപ്രിൽ അഞ്ചിന് ആരംഭിക്കാനും ഏഴിന് സുരേഷ് ഗോപി ജോയിൻ ചെയ്യാനുമായിരുന്നു നേരത്തെ തീരുമാനിച്ചിരുന്നത്. എന്നാൽ കേന്ദ്രമന്ത്രിയായ സുരേഷ് ഗോപിയുടെ തിരക്കിട്ട ഔദ്യോഗിക പരിപാടികൾ കാരണം ഷെഡ്യൂളിൽ മാറ്റം വരുത്തുകയായിരുന്നു.

പ്രധാനമന്ത്രി നരേന്ദ്ര മോദി സുരേഷ് ഗോപിക്ക് അപ്രതീക്ഷിതമായ ചില പ്രധാന ചുമതലകൾ നൽകിയതാണ് ചിത്രീകരണം വൈകാൻ കാരണം. ഏപ്രിൽ എട്ടിന് ദുബായ് കിരീടാവകാശിയെ സ്വീകരിക്കുന്ന ചടങ്ങിൽ അദ്ദേഹത്തിന് പങ്കെടുക്കേണ്ടി വരും. തുടർന്ന് ഏപ്രിൽ ഒമ്പതിന് പ്രധാനമന്ത്രിയുടെ ഡോണർ പരിപാടിയിൽ പങ്കെടുക്കാനായി നാഗാലാൻഡിലേക്കും അദ്ദേഹം നിയോഗിക്കപ്പെട്ടു. പത്ത്, പതിനൊന്ന് തീയതികളിൽ ഋഷികേശിൽ വെച്ച് നടക്കുന്ന പെട്രോളിയം മന്ത്രാലയത്തിൻ്റെ ബ്രെയിൻ സ്റ്റോർമിംഗ് സെഷനിൽ വകുപ്പ് മന്ത്രിയുടെ സാന്നിധ്യം അത്യാവശ്യമായതിനാൽ സുരേഷ് ഗോപിക്ക് അവിടെയും പോകേണ്ടതായുണ്ട്.

ഈ ഔദ്യോഗിക തിരക്കുകൾക്ക് ശേഷമാണ് മലയാളികളുടെ പ്രധാന ആഘോഷങ്ങളായ വിഷുവും ഈസ്റ്ററും കടന്നുവരുന്നത്. ഇത് പരിഗണിച്ച്, രണ്ടാം ഘട്ട ചിത്രീകരണം ഏപ്രിൽ പതിനഞ്ചിന് ആരംഭിക്കാൻ ഇപ്പോൾ തീരുമാനിച്ചിരിക്കുകയാണെന്ന് അണിയറ പ്രവർത്തകർ അറിയിച്ചു. ക്രൈസ്തവ ഭൂരിപക്ഷ മേഖലകളായ കോട്ടയം, പാലാ, ഭരണങ്ങാനം, തൊടുപുഴ, ഈരാറ്റുപേട്ട എന്നിവിടങ്ങളിലാണ് രണ്ടാം ഘട്ട ചിത്രീകരണം പ്രധാനമായും നടക്കുന്നത്. വിശുദ്ധവാര ചടങ്ങുകൾ നടക്കുന്ന സമയമായതിനാൽ വീടുകൾ, പള്ളികൾ തുടങ്ങിയ ലൊക്കേഷനുകൾ ലഭ്യമല്ലാത്തതും ചിത്രീകരണം നീണ്ടുപോകാൻ ഒരു കാരണമാണെന്ന് എക്സിക്യൂട്ടീവ് പ്രൊഡ്യൂസർ കൃഷ്ണമൂർത്തി വ്യക്തമാക്കി.

മധ്യതിരുവിതാംകൂറിൻ്റെ പശ്ചാത്തലത്തിൽ, പ്രത്യേകിച്ച് പാലായും പരിസരങ്ങളിലും നിറഞ്ഞുനിന്ന കടുവാക്കുന്നേൽ കുറുവച്ചൻ എന്ന ശക്തമായ കഥാപാത്രത്തെയാണ് സുരേഷ് ഗോപി ഈ ചിത്രത്തിൽ അവതരിപ്പിക്കുന്നത്. നാട്ടുകാരുടെ ഇടയിൽ ഉറച്ച മനസ്സും, ആജ്ഞാശക്തിയും, സമ്പത്തും, പ്രതാപവും കൊണ്ട് ഒരു ഹീറോ പരിവേഷം നേടിയ ഈ കഥാപാത്രത്തെ പ്രേക്ഷകർ പ്രതീക്ഷിക്കുന്ന തലത്തിലേക്ക് തന്നെ എത്തിക്കുക എന്നതാണ് ഗോകുലം മൂവീസിൻ്റെ ലക്ഷ്യം. പ്രേക്ഷകർ ഈ കഥാപാത്രത്തെക്കുറിച്ച് എന്ത് പ്രതീക്ഷിക്കുന്നുവോ അത് സുരേഷ് ഗോപി എന്ന നടനിൽ നിന്ന് ലഭിക്കുമെന്നും അണിയറ പ്രവർത്തകർ ഉറപ്പ് നൽകുന്നു. രണ്ടാം ഘട്ട ചിത്രീകരണം ഏകദേശം രണ്ടു മാസത്തോളം നീണ്ടുനിൽക്കും, ഇത് ജൂൺ അവസാനത്തോടെ പൂർത്തിയാകും. വലിയ മുതൽമുടക്കിലും വലിയ താരനിരയിലും ജനപങ്കാളിത്തത്തിലുമാണ് ഈ ചിത്രം ഒരുങ്ങുന്നത്.

ഒരു മാസം നീണ്ടുനിന്ന ചിത്രത്തിൻ്റെ ആദ്യ ഘട്ടം തിരുവനന്തപുരത്താണ് പൂർത്തിയായത്. 'ഒറ്റക്കൊമ്പനോടൊപ്പം' വലിയ സസ്പെൻസുകളുമായി 'ഭ. ഭ. ബ..' എന്ന മറ്റൊരു ചിത്രവും ഗോകുലം മൂവീസിൻ്റെതായി അണിയറയിൽ ഒരുങ്ങുന്നുണ്ട്. കൂടാതെ വലിയ മുതൽമുടക്കുള്ള അന്യഭാഷാ ചിത്രങ്ങളും വൻ താരങ്ങളുള്ള മലയാള ചിത്രങ്ങളുടെ പ്രവർത്തനങ്ങളും ഗോകുലം മൂവീസ് തുടർച്ചയായി പ്രേക്ഷകർക്ക് മുന്നിൽ എത്തിക്കുന്നുണ്ട്.

പ്രശസ്ത ബോളിവുഡ് താരം കബീർ ദുഹാൻ സിംഗ്, ഇന്ദ്രജിത്ത് സുകുമാരൻ, വിജയരാഘവൻ, ലാലു അലക്സ്, ചെമ്പൻ വിനോദ്, ജോണി ആൻ്റെണി, ബിജു പപ്പൻ, മേഘന രാജ്, സുചിത്ര നായർ എന്നിവരാണ് ചിത്രത്തിലെ മറ്റ് പ്രധാന താരങ്ങൾ. നായികയെ ഇതുവരെ തീരുമാനിച്ചിട്ടില്ല. ഇവരെ കൂടാതെ നിരവധി പ്രമുഖ താരങ്ങളും എഴുപതിലധികം പുതുമുഖങ്ങളും ഈ ചിത്രത്തിൽ വേഷമിടുന്നുണ്ട്.

ചിത്രത്തിൻ്റെ കോ-പ്രൊഡ്യൂസർമാർ വി.സി. പ്രവീൺ, ബൈജു ഗോപാലൻ, എക്സിക്യൂട്ടീവ് പ്രൊഡ്യൂസർ കൃഷ്ണമൂർത്തി, ഛായാഗ്രഹണം ഷാജികുമാർ, സംഗീതം ഹർഷവർദ്ധൻ രമേശ്വർ, എഡിറ്റിംഗ് വിവേക് ഹർഷൻ, ഗാനങ്ങൾ വയലാർ ശരത്ച്ചന്ദ്ര വർമ്മ, കലാസംവിധാനം ഗോകുൽ ദാസ്, മേക്കപ്പ് റോണക്സ് സേവ്യർ, കോസ്റ്റ്യൂം ഡിസൈൻ അനീഷ് തൊടുപുഴ, ക്രിയേറ്റീവ് ഡയറക്ടർ സുധി മാഡിസൺ, പ്രൊഡക്ഷൻ കൺട്രോളർ സിദ്ദു പനയ്ക്കൽ, കാസ്റ്റിംഗ് ഡയറക്ടർ ബിനോയ് നമ്പാല, ചീഫ് അസ്സോസ്സിയേറ്റ് ഡയറക്ടേർസ് കെ.ജെ. വിനയൻ, ദീപക് നാരായൺ, പ്രൊഡക്ഷൻ മാനേജേർ പ്രഭാകരൻ കാസർകോഡ്, പ്രൊഡക്ഷൻ എക്സിക്യൂട്ടീവ്സ് നന്ദു പൊതുവാൾ, ബാബുരാജ് മനിശ്ശേരി എന്നിവരാണ്. പാലാ, ഈരാറ്റുപേട്ട, തൊടുപുഴ, കോട്ടയം, തിരുവനന്തപുരം, കൊച്ചി, ഹോങ്കോങ് എന്നിവിടങ്ങളിലായാണ് ചിത്രീകരണം പൂർത്തിയാകുന്നത്.

റിപ്പോർട്ട്: വാഴൂർ ജോസ്.

The second schedule of Suresh Gopi's 'Ottakkomban' will commence after Vishu, on April 15th, due to the actor's official commitments as a Union Minister. Directed by Mathews Thomas and produced by Sree Gokulam Movies, the film's next phase of shooting will primarily take place in Kottayam, Pala, and surrounding regions, focusing on the character Kaduvakunnel Kuruachan.

#Ottakkomban #SureshGopi #MalayalamMovie #GokulamMovies #FilmingUpdate #KaduvakunnelKuruachan