ചലച്ചിത്ര പുരസ്‌കാര ദാന ചടങ്ങില്‍ മുഖ്യാതിഥിയായി മോഹന്‍ലാലിനെ തന്നെ ക്ഷണിക്കും; പക തീര്‍ക്കേണ്ടത് സര്‍ക്കാരിന്റെ പരിപാടിയിലല്ല; മന്ത്രി എ കെ ബാലന്‍

തിരുവനന്തപുരം: (www.kvartha.com 24.07.2018) സംസ്ഥാന ചലച്ചിത്ര പുരസ്‌കാര ദാന ചടങ്ങില്‍ മുഖ്യാതിഥിയായി മോഹന്‍ലാലിനെ തന്നെ ക്ഷണിക്കുമെന്ന് സാംസ്‌കാരിക വകുപ്പ് മന്ത്രി എ കെ ബാലന്‍. ബുധനാഴ്ച മോഹന്‍ലാലിന് ക്ഷണക്കത്ത് നല്‍കുമെന്നും അദ്ദേഹം അറിയിച്ചു.

മോഹന്‍ലാല്‍ പങ്കെടുത്താല്‍ ചടങ്ങിന്റെ ക്ഷോഭ നഷ്ടപ്പെടുമെന്ന വാദത്തിന് യുക്തിയില്ല. ആര്‍ക്കെങ്കിലും ആരോടെങ്കിലും പക തീര്‍ക്കാനുള്ളതല്ല സിനിമാ സാംസ്‌ക്കാരിക വേദികള്‍. സംസ്ഥാന സര്‍ക്കാരിന്റെ ചലച്ചിത്ര പുരസ്‌കാര വേദിയില്‍ എല്ലാവരും പങ്കെടുക്കും. മന്ത്രി കൂട്ടിച്ചേര്‍ത്തു.


അവാര്‍ഡ് ദാന ചടങ്ങില്‍ മോഹന്‍ലാലിനെ പങ്കെടുപ്പിക്കരുതെന്നാവശ്യപ്പെട്ട് സിനിമ സാംസ്‌കാരിക കൂട്ടായ്മ എന്ന പേരില്‍ നൂറിലേറെ പേര്‍ ഒപ്പിട്ട ഭീമന്‍ ഹര്‍ജി മുഖ്യമന്ത്രിക്ക് നല്‍കിയിരുന്നു. എന്നാല്‍ ഇതില്‍ ഒന്നാമതായി പേരും ഒപ്പുമുള്ള നടന്‍ പ്രകാശ് രാജ് താന്‍ മോഹന്‍ലാലിനെതിരെയുള്ള പ്രസ്താവനയില്‍ ഒപ്പ് വെച്ചിട്ടില്ലെന്നും ഇതിനെ കുറിച്ച് തനിക്ക് ഒന്നും അറിയില്ലെന്നും ട്വിറ്ററില്‍ പോസ്റ്റ് ചെയ്ത വീഡിയോയിലൂടെ വ്യക്തമാക്കിയിരുന്നു.