അനുസരണ പ്രണയമല്ല, അത് അധികാരവും നിയന്ത്രണവുമാണ്; ടോക്സിക് ബന്ധങ്ങൾക്കെതിരെ തുറന്നടിച്ച് രാധിക ആപ്‌തെ

മുംബൈ: (KVARTHA) ഇന്ത്യൻ സിനിമയിൽ തന്റെ അഭിനയപാടവം കൊണ്ട് ശ്രദ്ധേയയായ രാധിക ആപ്‌തെ സിനിമാരംഗത്തെ വയലൻസ് രംഗങ്ങളെയും ടോക്സിക് റിലേഷൻഷിപ്പുകളെയും കുറിച്ച് തുറന്നു സംസാരിക്കുന്നു. തന്റെ പുതിയ സിനിമയായ സാലി മൊഹബത്ത് എന്ന ചിത്രത്തിന്റെ പ്രചാരണത്തിന്റെ ഭാഗമായി നടന്ന അഭിമുഖത്തിലായിരുന്നു താരത്തിന്റെ നിർണ്ണായകമായ വെളിപ്പെടുത്തലുകൾ. 

ഭർത്താവ് പറയുന്നതെന്തും അനുസരിക്കുന്നത് സ്നേഹമല്ലെന്നും, അനുസരണ എന്നത് അധികാരവും നിയന്ത്രണവുമാണെന്നും അത് പ്രണയമാണെന്ന് ആരും തെറ്റിദ്ധരിക്കരുതെന്നും രാധിക ആപ്‌തെ വ്യക്തമാക്കി. പങ്കാളിക്കോ മറ്റാർക്കെങ്കിലുമോ വേണ്ടി ചെയ്യുന്ന കുറ്റകൃത്യങ്ങളെ മഹത്വവൽക്കരിക്കുന്നതിനോട് തനിക്ക് ഒട്ടും താല്പര്യമില്ലെന്ന് താരം പറഞ്ഞു. 

ഇവിടെയാണ് നമ്മുടെ കാഴ്ചപ്പാടുകൾക്ക് തെറ്റുപറ്റുന്നത്. ഒരാളോട് തുടർച്ചയായി മോശമായി പെരുമാറുന്നയിടത്തു നിന്നാണ് ഇത്തരത്തിലുള്ള കുറ്റകൃത്യങ്ങൾ ഉണ്ടാകുന്നത്. നമ്മുടെ സംസ്‌കാരത്തിൽ ഇത്തരം പ്രവർത്തികളെല്ലാം വലിയ സ്നേഹപ്രകടനമായിട്ടാണ് പലപ്പോഴും കണക്കാക്കുന്നത്. നമ്മൾ അതിനെ പ്രണയം എന്ന് വിളിക്കുമെങ്കിലും മറ്റൊരാളെ സന്തോഷിപ്പിക്കാനായി സ്വന്തം സന്തോഷത്തെ മാറ്റി വെക്കുന്നത് യഥാർത്ഥ സ്നേഹമല്ലെന്ന് രാധിക ആപ്‌തെ വിശദീകരിച്ചു.

ഭർത്താവായാലും ഭർത്താവിന്റെ കുടുംബമായാലും മാതാപിതാക്കളായാലും അവർ പറയുന്നതെന്തും കണ്ണടച്ച് അനുസരിക്കുന്നതും ചെയ്യുന്നതും സ്നേഹത്തിന്റെ അടയാളമല്ല. തനിക്ക് വേണ്ടി മറ്റൊരാൾ അവരുടെ സന്തോഷത്തെ പൂർണ്ണമായും മാറ്റി വെക്കുമെന്ന് ആരെങ്കിലും പ്രതീക്ഷിച്ചാൽ അതിനെ സ്നേഹമെന്ന് വിളിക്കാൻ സാധിക്കില്ല. 

യഥാർത്ഥ സ്നേഹം എന്നത് മറ്റുള്ളവർ സന്തോഷിക്കുന്നത് കാണുന്നതിലാണ്. അനുസരണ പ്രണയമല്ലെന്നും അത് വെറും അധികാരവും നിയന്ത്രണവുമാണെന്നും രാധിക ആപ്‌തെ പറഞ്ഞു. ഇത്തരം പ്രവണതകളെ പ്രണയമെന്നും ബഹുമാനമെന്നുമൊക്കെ വിളിക്കുന്നത് കേട്ട് തനിക്ക് മടുത്തതായും അവർ കൂട്ടിച്ചേർത്തു.

സമൂഹത്തിൽ നിലനിൽക്കുന്ന ഇത്തരം ഭയാനകമായ ചിന്താഗതികൾ മാറണമെങ്കിൽ ഒബ്സെഷനെയും നിയന്ത്രണത്തെയും അധികാരത്തെയുമൊക്കെ പാഷൻ ആയി ഗ്ലോറിഫൈ ചെയ്യുന്ന രീതിയിലുള്ള സിനിമകൾ നിർമ്മിക്കുന്നത് അവസാനിപ്പിക്കണമെന്ന് താരം ആവശ്യപ്പെട്ടു. 

ഇത്തരം കഥകൾ പറയുന്നത് തുടരുന്നത് വലിയ തെറ്റാണെന്നും രാധിക ആപ്‌തെ വ്യക്തമാക്കി. ടോക്സിക് ബന്ധങ്ങളെയും അനാവശ്യ നിയന്ത്രണങ്ങളെയും സിനിമയിലൂടെ ആഘോഷിക്കുന്നത് നിർത്തേണ്ട സമയം അതിക്രമിച്ചുവെന്ന രാധികയുടെ നിലപാട് ഇപ്പോൾ സിനിമാ മേഖലയിലും സമൂഹമാധ്യമങ്ങളിലും വലിയ ചർച്ചകൾക്ക് വഴിതുറന്നിരിക്കുകയാണ്.

രാധിക ആപ്‌തെയുടെ ഈ വാക്കുകളോട് നിങ്ങൾ യോജിക്കുന്നുണ്ടോ? നിങ്ങളുടെ അഭിപ്രായം താഴെ കമന്റ് ചെയ്യുക.

Article Summary: Actress Radhika Apte speaks out against glorifying toxic relationships and obsession in movies and society.

#RadhikaApte #ToxicRelationships #Bollywood #SaliMohabbat #GenderEquality #CinemaTalks