ഡബിൾ മോഹനൻ തിയേറ്ററുകളിൽ കൊളുത്തിടാൻ വരുന്നു! പൃഥ്വിരാജിൻ്റെ 'വിലായത്ത് ബുദ്ധ' ടിക്കറ്റ് ബുക്കിങ് തുടങ്ങി

കൊച്ചി: (KVARTHA) സിനിമാ പ്രേമികൾ ഏറെ ആകാംക്ഷയോടെ കാത്തിരിക്കുന്ന പൃഥ്വിരാജ് സുകുമാരൻ ചിത്രം 'വിലായത്ത് ബുദ്ധ'യുടെ അഡ്വാൻസ് ടിക്കറ്റ് ബുക്കിങ് ആരംഭിച്ചു. പ്രമുഖ ഓൺലൈൻ ടിക്കറ്റ് ബുക്കിങ് പ്ലാറ്റ്ഫോമുകളിലാണ് ഇപ്പോൾ ചിത്രത്തിനുള്ള ടിക്കറ്റുകൾ മുൻകൂട്ടി ബുക്ക് ചെയ്യാനുള്ള സൗകര്യം ഒരുക്കിയിട്ടുള്ളത്. വെള്ളിയാഴ്ച, നവംബർ 21-ന് ഈ ബിഗ് ബഡ്ജറ്റ് ചിത്രം വേൾഡ് വൈഡ് റിലീസായി തിയേറ്ററുകളിൽ എത്തും.

ചന്ദന മോഷ്ടാവായ 'ഡബിൾ മോഹനൻ' എന്ന ശക്തമായ കഥാപാത്രത്തെയാണ് ചിത്രത്തിൽ പൃഥ്വിരാജ് സുകുമാരൻ അവതരിപ്പിക്കുന്നത്. ഇതുവരെ കാണാത്ത തരത്തിലുള്ള ഒരു മേക്കോവറിലാണ് താരം ഈ ചിത്രത്തിനായി എത്തിയിരിക്കുന്നത് എന്നതും പ്രത്യേകതയാണ്. ഉർവ്വശി തിയേറ്റേഴ്സിൻ്റെ ബാനറിൽ സന്ദീപ് സേനൻ നിർമ്മിച്ച് ജയൻ നമ്പ്യാർ സംവിധാനം ചെയ്യുന്ന ഈ ചിത്രത്തിന് യുഎ സർട്ടിഫിക്കറ്റ് ആണ് ലഭിച്ചിട്ടുള്ളത്.

പ്രശസ്ത എഴുത്തുകാരനായ ജി. ആർ. ഇന്ദുഗോപൻ്റെ അതേ പേരിലുള്ള നോവലാണ് 'വിലായത്ത് ബുദ്ധ' എന്ന പേരിൽ ജയൻ നമ്പ്യാരുടെ സംവിധാനത്തിൽ ചലച്ചിത്ര രൂപം നൽകിയിരിക്കുന്നത്. പൊന്നുകായ്ക്കുന്ന മരമെന്ന് വിശേഷിപ്പിക്കാവുന്ന ചന്ദന മരങ്ങളുടെ കേന്ദ്രമായ മറയൂരിലെ ചന്ദനക്കാടുകളാണ് ചിത്രത്തിൻ്റെ പ്രധാന പശ്ചാത്തലം. പകയും പ്രതികാരവും പ്രണയവും കെട്ടുപിണഞ്ഞ ഒരു ത്രില്ലർ ആയാണ് ഈ സിനിമ ഒരുക്കിയിരിക്കുന്നത്.

ശ്രദ്ധേയമായ ഒരു കഥാപാത്രമായി നടൻ ഷമ്മി തിലകനും ചിത്രത്തിലെത്തുന്നുണ്ട്. പ്രിയംവദ കൃഷ്ണനാണ് ചിത്രത്തിലെ നായിക. നോവലിസ്റ്റ് ജി. ആർ. ഇന്ദുഗോപനും രാജേഷ് പിന്നാടനും ചേർന്നാണ് ചിത്രത്തിന് വേണ്ടി തിരക്കഥ ഒരുക്കിയിരിക്കുന്നത്.

പ്രമുഖരായ സാങ്കേതിക വിദഗ്ദ്ധരാണ് ചിത്രത്തിൻ്റെ അണിയറയിൽ പ്രവർത്തിച്ചിരിക്കുന്നത്. ജേക്‌സ് ബിജോയിയാണ് സംഗീത സംവിധാനം നിർവ്വഹിച്ചിരിക്കുന്നത്. അരവിന്ദ് കശ്യപ്, രെണദേവ് എന്നിവരാണ് ഛായാഗ്രഹണം. ശ്രീജിത്ത് സാരംഗ് എഡിറ്ററും ബംഗ്ലാൻ പ്രൊഡക്ഷൻ ഡിസൈനറുമാണ്. സംഗീത് സേനൻ എക്സ‌സിക്യുട്ടീവ് പ്രൊഡ്യൂസറായും രഘു സുഭാഷ് ചന്ദ്രൻ ലൈൻ പ്രൊഡ്യൂസറായും പ്രവർത്തിച്ചിരിക്കുന്നു. ജിത്തു സെബാസ്റ്റ്യനാണ് ആർട്ട് ഡയറക്ടർ.

മനു മോഹൻ മേക്കപ്പും, അലക്‌സ് ഇ കുര്യൻ പ്രൊഡക്‌ഷൻ കൺട്രോളറും, മനു ആലുക്കൽ പ്രൊജക്ട് ഡിസൈനറും ആണ്. അജയൻ അടാട്ട്, പയസ്മോൻ സണ്ണി എന്നിവർ സൗണ്ട് ഡിസൈനും, എം. ആർ. രാജാകൃഷ്ണൻ സൗണ്ട് മിക്സും നിർവ്വഹിച്ചു. കിരൺ റാഫേലാണ് ചീഫ് അസോസിയേറ്റ് ഡയറക്ടർ.

കൂടാതെ, രാജശേഖർ, കലൈ കിങ്സൺ, സുപ്രിം സുന്ദർ, മഹേഷ് മാത്യു എന്നിവർ സ്റ്റണ്ട്സ് വിഭാഗം കൈകാര്യം ചെയ്യുമ്പോൾ, വിനോദ് ഗംഗ ഫസ്റ്റ് അസോസിയേറ്റ് ഡയറക്ടറായി പ്രവർത്തിച്ചു. വിഎഫ്എക്‌സ് ഡയറക്ടർ രാജേഷ് നായരും കളറിസ്റ്റ് ലിജു പ്രഭാകറുമാണ്. ഡിഐ സ്റ്റുഡിയോ രംഗ്‍റെയ്‌സ് മീഡിയയാണ്. 

വിഎഫ്എക്സ് ജോലികൾ ബ്ലാക്ക് മരിയ സ്റ്റുഡിയോ, എക്‌സൽ മീഡിയ, എ2കെ24 കമ്പനി, സ്പെക്ട്ര പോസ്റ്റ് പ്രൈ ലിമിറ്റഡ് എന്നിവരാണ് ചെയ്തത്. ശരത് വിനു ടൈറ്റിൽ ആനിമേഷനും സിനറ്റ് സേവ്യർ സ്റ്റിൽസും നിർവ്വഹിച്ചു. പൊഫാക്റ്റിയോ പ്രൊമോഷൻസും ഓൾഡ് മോങ്ക്‌സ് ടൈറ്റിൽ ഡിസൈനും യെല്ലോ ടൂത്ത്‌സ് പബ്ലിസിറ്റി ഡിസൈൻസും നിർവ്വഹിച്ചു. ഫാർസ് ഫിലിംസാണ് ഓവർസീസ് ഡിസ്ട്രിബ്യൂഷൻ. 10 ജി മീഡിയ പ്രൊമോഷൻസ് വിഭാഗത്തിലും ആതിര ദിൽജിത്ത് പിആർഒ വിഭാഗത്തിലും പ്രവർത്തിക്കുന്നു.

ചിത്രത്തിനായി നിങ്ങൾ ആകാംഷയോടെ കാത്തിരിക്കുകയാണോ? അഭിപ്രായം കമൻ്റ് ചെയ്യുക. 

Article Summary: Prithviraj Sukumaran's Vilaayath Buddha advance booking starts; the film releases worldwide on November 21.

#VilaayathBuddha #PrithvirajSukumaran #DoubleMohanan #MalayalamMovie #JayanNambiar #AdvanceBooking