തിരുവനന്തപുരം: (KVARTHA) നടൻ പൃഥ്വിരാജ് ആരെയും വഞ്ചിച്ചിട്ടില്ലെന്നും, അങ്ങനെ മോഹൻലാൽ പറഞ്ഞിട്ടില്ലെന്നും അമ്മയും നടിയുമായ മല്ലിക സുകുമാരൻ വ്യക്തമാക്കി. എന്നാൽ, വിവാദ വിഷയത്തിൽ മോഹൻലാലിന് കുറച്ചുകൂടി നേരത്തെ പ്രതികരിക്കാമായിരുന്നു എന്ന് അവർക്ക് അഭിപ്രായമുണ്ട്.

'എമ്പുരാൻ' സിനിമയുമായി ബന്ധപ്പെട്ട വിവാദങ്ങളുടെ പശ്ചാത്തലത്തിൽ സംസാരിക്കുകയായിരുന്നു മല്ലിക സുകുമാരൻ. ‘എൻ്റെ മകൻ ചതിച്ചു എന്ന് മേജർ രവിയുടെ ഒരു പോസ്റ്റ് കണ്ടു. അത് കണ്ടപ്പോൾ വലിയ വിഷമം തോന്നി. ശുദ്ധ നുണയാണ് അദ്ദേഹം എഴുതിയത്,’ മല്ലിക പറഞ്ഞു. സിനിമയുടെ പ്രിവ്യൂ ആർക്കും കാണാൻ സാധിച്ചിരുന്നില്ലെന്നും, എന്നാൽ ഷൂട്ടിംഗ് സമയത്ത് മോഹൻലാലും ആന്റണി പെരുമ്പാവൂരും എല്ലാം കണ്ടിട്ടുള്ളവരാണെന്നും അവർ ചൂണ്ടിക്കാട്ടി.

മോഹൻലാലിൻ്റെ പ്രതികരണത്തെക്കുറിച്ച് മല്ലിക ഇങ്ങനെ പറഞ്ഞു: ‘മോഹൻലാലിൻ്റെ ആത്മാർത്ഥ സുഹൃത്തായതുകൊണ്ട് ഒരു രക്ഷകനായി മാറാൻ ചമഞ്ഞതാണോ? എന്ന് എനിക്ക് അറിയില്ല. മോഹൻലാൽ പറഞ്ഞിട്ടുണ്ട് അതിന് എല്ലാവർക്കും കൂട്ടുത്തരവാദിത്തമാണെന്ന്. ഇന്നൊരു പോസ്റ്റ് ഇട്ടിട്ടുണ്ട്. അത് അൽപം നേരത്തെയാവാമായിരുന്നു എന്നൊരു വിഷമമുണ്ട്.’

തൻ്റെ മക്കളുടെ കാര്യത്തിൽ തനിക്കുള്ള ഉറച്ച നിലപാട് മല്ലിക വ്യക്തമാക്കി. ‘ആരുടെയും മുന്നിൽ ഒരു അടിമയായിട്ട് നിന്നുകൊണ്ട്, എന്തെങ്കിലും കാട്ടിക്കൂട്ടി, എന്തെങ്കിലും ഒരു സ്വാർത്ഥ ലാഭത്തിന് വേണ്ടി ഒരു ജോലിസ്ഥലത്തും എന്റെ കുഞ്ഞുങ്ങളെ ഞാൻ വിടില്ല.’ പൃഥ്വിരാജിന് സിനിമയിൽ സ്വന്തമായി നിലപാടുള്ള വ്യക്തിത്വമാണെന്നും, പലപ്പോഴും സിനിമയിലുള്ളവർ പോലും അവനെ പല തരത്തിൽ ആക്രമിക്കാൻ ശ്രമിക്കാറുണ്ടെന്നും അവർ കൂട്ടിച്ചേർത്തു.

പൃഥ്വിരാജിൻ്റെ രാഷ്ട്രീയ നിലപാടിനെക്കുറിച്ചും മല്ലിക സംസാരിച്ചു. ‘പൃഥ്വിരാജ് ഒരു രാഷ്ട്രീയ പാർട്ടിയുടേയും കൊടി പിടിച്ച് നടക്കുന്ന ആളല്ല. നടക്കത്തുമില്ല. പൃഥ്വിരാജ് നല്ലത് കണ്ടാൽ നല്ലത് പറയും. അത് ഏത് പാർട്ടിക്കാര് ചെയ്താലും. തെറ്റ് കണ്ടാൽ തെറ്റെന്ന് പറയും. ശരി കണ്ടാൽ ശരിയെന്ന് പറയും അത് ഞാനും പറയും.’ ഒരു വിഭാഗത്തിൻ്റെയും ചട്ടുകമാകാൻ പൃഥ്വിരാജിനെ കിട്ടില്ലെന്നും മല്ലിക സുകുമാരൻ ഉറപ്പിച്ചു പറഞ്ഞു. 'എമ്പുരാൻ' വിവാദങ്ങൾക്കിടയിൽ മല്ലിക സുകുമാരൻ്റെ ഈ പ്രതികരണം സിനിമാലോകത്ത് ശ്രദ്ധേയമാകുകയാണ്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Mallika Sukumaran clarified that Prithviraj has not cheated anyone and criticized Mohanlal for responding late to the 'Empuran' controversy.

#Prithviraj #Mohanlal #MallikaSukumaran #EmpuranControversy #KeralaCinema #Controversy