പ്രതാപ് പോത്തൻ ഓർമ്മയായിട്ട് മൂന്ന് വർഷം: യാത്രാമൊഴികളില്ലാത്ത സിനിമാരവം

(KVARTHA) ജനപ്രിയ സിനിമയുടെ നവോത്ഥാന കാലഘട്ടത്തിലെ വേറിട്ട പ്രണയ നായകനും അഭിനേതാവുമായിരുന്ന പ്രതാപ് പോത്തൻ വിടവാങ്ങിയിട്ട് മൂന്ന് വർഷം. മലയാളം, തമിഴ്, കന്നട, തെലുങ്ക്, ഹിന്ദി ഭാഷകളിലായി നൂറിലേറെ ചിത്രങ്ങളിൽ അദ്ദേഹം അഭിനയിച്ചിട്ടുണ്ട്. വിവിധ ദക്ഷിണേന്ത്യൻ ഭാഷകളിലായി 12 ചിത്രങ്ങൾ സംവിധാനം ചെയ്യുകയും ചെയ്തു. 1983-ൽ സംവിധാനം ചെയ്ത ആദ്യ ചിത്രമായ 'മിണ്ടും ഒരു കാതൽ കതൈക്ക്' മികച്ച നവാഗത സംവിധായകനുള്ള ഇന്ദിരാഗാന്ധി പുരസ്കാരം ലഭിച്ചിട്ടുണ്ട്.

'ഋതുഭേദം', 'ഡെയ്സി', 'ഒരു യാത്രാമൊഴി' എന്നിവയാണ് മലയാളത്തിൽ അദ്ദേഹം സംവിധാനം ചെയ്ത ചിത്രങ്ങൾ. നിർമ്മാതാവ്, തിരക്കഥാകൃത്ത് എന്നീ നിലകളിലും പ്രതാപ് പോത്തൻ അറിയപ്പെട്ടിരുന്നു. സിനിമയിൽ നിരവധി പതിറ്റാണ്ടുകൾ സജീവമായിരുന്നിട്ടും വളരെ കുറച്ച് ചിത്രങ്ങളിൽ മാത്രമേ അദ്ദേഹം അഭിനയിച്ചുള്ളൂ. തനിക്കൊപ്പം അരങ്ങേറിയ നെടുമുടി വേണു 500-ലേറെ ചിത്രങ്ങളിൽ അഭിനയിച്ചപ്പോൾ അതിന്റെ അഞ്ചിൽ ഒന്നു മാത്രമായിരുന്നു പ്രതാപ് പോത്തന്റെ ചലച്ചിത്ര ഗ്രാഫിൽ ഉണ്ടായിരുന്നത്.

1952 ഫെബ്രുവരി 15ന് ചങ്ങനാശ്ശേരി സ്വദേശികളായ മാതാപിതാക്കൾക്ക് തിരുവനന്തപുരത്താണ് പ്രതാപ് ജനിച്ചത്. മദ്രാസ് പ്ലേയേഴ്സ് എന്ന നാടക ഗ്രൂപ്പിലെ അഭിനയ മികവ് കണ്ടറിഞ്ഞാണ് 1978-ൽ ഭരതൻ തന്റെ 'ആരവം' എന്ന ചിത്രത്തിലേക്ക് പ്രതാപ് പോത്തനെ ക്ഷണിക്കുന്നത്. തുടർന്ന് 'പൊട്ടൻ തകര' എന്ന കഥാപാത്രത്തെ അനശ്വരമാക്കിയ 'തകര', 'ലോറി' എന്നിവയും, കോളേജ് വിദ്യാർത്ഥിയായി പഠിപ്പിക്കുന്ന അധ്യാപികയോട് 'ടീച്ചർ ഐ ലവ് യൂ' എന്ന് പറഞ്ഞ് വിനോദിനെ അവിസ്മരണീയമാക്കിയ 'ചാമരം' തുടങ്ങിയ ചിത്രങ്ങളിലൂടെ യുവമനസ്സുകളിൽ പ്രണയ നായകനായി പ്രതാപ് പോത്തൻ അരങ്ങു ഭരിച്ചു.

ആദ്യ ചിത്രത്തിലെ നായിക രാധികയെ വിവാഹം കഴിച്ചെങ്കിലും ആ ദാമ്പത്യം ഏറെക്കാലം നീണ്ടുനിന്നില്ല. നടൻ ഹരി പോത്തൻ അദ്ദേഹത്തിന്റെ മൂത്ത സഹോദരനാണ്. മമ്മൂട്ടിയുടെ സി.ബി.ഐ. സീരീസിലെ അഞ്ചാം ഭാഗമായ 'സി.ബി.ഐ. 5 ദി ബ്രെയിൻ' ആണ് അദ്ദേഹം അഭിനയിച്ച അവസാന ചിത്രം.

ഉറക്കത്തിനിടയിലുണ്ടായ ഹൃദയാഘാതത്തെ തുടർന്ന് 2022 ജൂലൈ 15ന് രാത്രി ചെന്നൈയിലെ ഫ്ലാറ്റിൽ വെച്ചായിരുന്നു ഈ പ്രണയ നായകന്റെ അന്ത്യം. ആൾക്കൂട്ട ബഹളങ്ങൾ ഇഷ്ടപ്പെടാതിരുന്ന അദ്ദേഹം ആരവങ്ങളൊന്നുമില്ലാതെ, ചെന്നൈ ന്യൂ ആവടി റോഡിലെ വൈദ്യുതി ശ്മശാനത്തിൽ 2022 ജൂലൈ 17ന് രാവിലെ എരിഞ്ഞടങ്ങി.

പ്രതാപ് പോത്തനെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Three years since the passing of actor and director Pratap Pothen.

#PratapPothen #MalayalamCinema #Tribute #SouthIndianCinema #FilmActor #Director