സസ്‌പെൻസ് ത്രില്ലർ 'പീറ്റർ': വൈകാരിക രംഗങ്ങളുമായി രണ്ടാമത്തെ ഗാനം 'തായേ തായേ' ശ്രദ്ധേയമാകുന്നു

(KVARTHA) 'ദൂരദർശന' എന്ന ശ്രദ്ധേയ ചിത്രത്തിന് ശേഷം സുകേഷ് ഷെട്ടി സംവിധാനം ചെയ്യുന്ന ഏറ്റവും പുതിയ ചിത്രമായ 'പീറ്ററി'ലെ രണ്ടാമത്തെ ഗാനം പുറത്തിറങ്ങി. വൃദ്ധി സ്റ്റുഡിയോസിന്റെ ബാനറിൽ രവി ഹീരേമത്തും രാകേഷ് ഹെഗ്ഗഡെയും ചേർന്ന് നിർമ്മിക്കുന്ന 'പീറ്റർ' ഒരു സസ്‌പെൻസ് ത്രില്ലർ ആയാണ് അണിയറയിൽ ഒരുങ്ങുന്നത്. ‘തായേ തായേ’ എന്ന വരികളോടെ ആരംഭിക്കുന്ന പുതിയ ഗാനമാണ് പ്രേക്ഷകരിലേക്ക് എത്തിയത്.

ഒരമ്മയും മകനും തമ്മിലുള്ള പറഞ്ഞറിയിക്കാനാവാത്ത ബന്ധത്തിൻ്റെ ആഴത്തിലുള്ള ഇമോഷനാണ് ഈ ഗാനത്തിലൂടെ അവതരിപ്പിക്കുന്നത്. പ്രശസ്ത സംഗീത സംവിധായകൻ ഋത്വിക് മുരളീധർ സംഗീതം നൽകിയ ഈ ഗാനത്തിൻ്റെ മലയാളം പതിപ്പ് ആലപിച്ചിരിക്കുന്നത് 'കഥ തുടരും' എന്ന ഗാനത്തിലൂടെ ശ്രദ്ധേയനായ ഗോകുൽ ഗോപകുമാറാണ്. 

വരികൾ രചിച്ചത് സിജു തുറവൂരാണ്. അതേസമയം, ചിത്രത്തിൻ്റെ തെലുങ്ക് പതിപ്പ് ആലപിച്ചിരിക്കുന്നത് സംഗീത സംവിധായകൻ ഋത്വിക് മുരളീധർ തന്നെയാണ്. തിങ്ക് മ്യൂസിക് ഇന്ത്യയുടെ യൂട്യൂബ് ചാനൽ വഴി റിലീസ് ചെയ്‌ത ഈ ഗാനം, മറ്റു പ്രധാന സംഗീത പ്ലാറ്റ്‌ഫോമുകളിലും ഇപ്പോൾ ലഭ്യമാണ്.

നേരത്തെ പുറത്തിറങ്ങിയ 'സുന്ദരി സുന്ദരി' എന്ന ഗാനം, ചിത്രത്തിലെ നായകനായ രാജേഷ് ധ്രുവയും നായിക രവിക്ഷയും അവതരിപ്പിക്കുന്ന കേന്ദ്ര കഥാപാത്രങ്ങളുടെ പ്രണയ നിമിഷങ്ങളാണ് പ്രേക്ഷകരിലേക്ക് എത്തിച്ചത്. ടീസർ നൽകുന്ന സൂചനകൾ അനുസരിച്ച്, ആക്ഷനും ശക്തമായ ഇമോഷനും മിസ്റ്ററിയും കോർത്തിണക്കിയാണ് ചിത്രം ഒരുക്കിയിരിക്കുന്നത്.

കന്നഡ, തമിഴ്, മലയാളം ഭാഷകളിൽ ഒരേ സമയം റിലീസിന് ഒരുങ്ങുന്ന ഈ ബഹുഭാഷാ ചിത്രത്തിൻ്റെ കഥയും തിരക്കഥയും സംവിധായകൻ സുകേഷ് ഷെട്ടിയാണ് നിർവ്വഹിച്ചിരിക്കുന്നത്. 30 ദിവസങ്ങൾ കൊണ്ട് മടിക്കേരിയിലും അതിൻ്റെ ചുറ്റുപാടുകളിലുമാണ് ചിത്രീകരണം പൂർത്തിയാക്കിയത്. 

പരമ്പരാഗത കലാരൂപമായ സിംഗാരി മേളയെ ചുറ്റിപ്പറ്റിയാണ് 'പീറ്ററി'ന്റെ കഥാ പശ്ചാത്തലം ഒരുക്കിയിരിക്കുന്നത്. പ്രേക്ഷകരെ മുൾമുനയിൽ നിർത്തുന്ന ഒരു സെൻസിറ്റീവ് ക്രൈം ത്രില്ലർ ആണിത്. ഒപ്പം, വിനോദ ഘടകങ്ങളും വൈകാരികമായ ആഴമുള്ള കഥാ സന്ദർഭങ്ങളും ചിത്രത്തിൽ ഉൾപ്പെടുത്തിയിട്ടുണ്ട്.

മടിക്കേരിയുടെയും ഭാഗമണ്ഡലത്തിന്റെയും നാടൻ സൗന്ദര്യത്തിൽ ചിത്രീകരിച്ച 'പീറ്റർ', പീറ്റർ എന്ന കഥാപാത്രത്തിൻ്റെ വൈകാരികമായ യാത്രയാണ്. പ്രണയം, പ്രതികാരം, വഞ്ചന, അതിജീവനം, അപ്രതീക്ഷിത ബന്ധങ്ങൾ തുടങ്ങിയ വിഷയങ്ങളാൽ ഈ കഥാപാത്രത്തിൻ്റെ ജീവിതം രൂപപ്പെടുന്നു. 

രവിക്ഷ, ജാൻവി റായല എന്നിവരാണ് ചിത്രത്തിലെ പ്രധാന സ്ത്രീ കഥാപാത്രങ്ങളെ അവതരിപ്പിച്ചിരിക്കുന്നത്. പ്രതിമ നായക്, റാം നാദഗൗഡ്, വരുൺ പട്ടേൽ, രഘു പാണ്ഡേശ്വർ തുടങ്ങി നിരവധി താരങ്ങൾ ചിത്രത്തിൽ മറ്റ് പ്രധാന വേഷങ്ങളിലെത്തുന്നുണ്ട്.

ഛായാഗ്രഹണം ഗുരുപ്രസാദ് നർനാഡും എഡിറ്റിങ് നവീൻ ഷെട്ടിയും നിർവ്വഹിച്ചു. സംഗീതം ഋത്വിക് മുരളീധർ, കല ഡി കെ നായക്, ഡബ്ബിംഗ് ആനന്ദ് വി. എസ്. എന്നിവരാണ്. വരികൾ തിലക്‌രാജ് ത്രിവിക്രമ, നാഗാർജുൻ ശർമ്മ, സുകീർത്ത് ഷെട്ടി എന്നിവരും ഡയലോഗ് രാജശേഖറും കൈകാര്യം ചെയ്തു. വസ്ത്രങ്ങൾ ദയാനന്ദ ഭദ്രവതിയും മേക്കപ്പ് ചന്ദ്രുവും ആണ്. 

കളർ പ്ലാനറ്റ് വിഎഫ്എക്‌സ് ഡിഐ ജോലികളും പോപ്‌കോൺ വിഎഫ്എക്‌സ്, വിഎഫ്എക്‌സും നിർവ്വഹിച്ചു. സാജിദ് വജീർ, വിനീഷ് എന്നിവരാണ് സ്റ്റണ്ട് കോറിയോഗ്രാഫി. നവീൻ കാഞ്ചൻ എക്‌സിക്യൂട്ടീവ് പ്രൊഡ്യൂസറും രാം നടഗൗഡ് ലൈൻ പ്രൊഡ്യൂസറുമാണ്. ചിത്രത്തിൻ്റെ പബ്ലിസിറ്റി ഡിസൈൻ അഭിഷേകും പിആർഒ ശബരിയുമാണ്.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക.

Article Summary: Peter, a multilingual suspense thriller, released its second song 'Thaaye Thaaye,' focusing on the emotional mother-son bond.

#PeterMovie #ThaayeThaaye #RajeshDhruva #SuspenseThriller #MalayalamCinema #NewSong