സംഗീതത്തിന്റെ കടലാഴം നീന്തിക്കടന്ന എം എസ് വി; ഓർമ്മകൾക്ക് 10 വർഷം

കണ്ണൂർ: (KVARTHA) തമിഴ്, മലയാളം, തെലുങ്ക് ഭാഷകളിലായി ആയിരത്തിലധികം ഗാനങ്ങൾക്ക് ശ്രുതിമധുരമായ ഈണം പകരുകയും അഞ്ഞൂറിലേറെ ഗാനങ്ങൾ ആലപിക്കുകയും ഏതാനും സിനിമകളിൽ അഭിനയിക്കുകയും ചെയ്ത മെല്ലിസൈ മന്നർ (ലളിത സംഗീതത്തിന്റെ രാജാവ്) എന്ന് ആരാധകർ വിശേഷിപ്പിക്കുന്ന പ്രശസ്ത സംഗീത സംവിധായകൻ മനയങ്കത്ത് സുബ്രഹ്മണ്യൻ വിശ്വനാഥൻ എന്ന എം.എസ്. വിശ്വനാഥൻ ഈ ലോകത്തോട് വിടവാങ്ങിയിട്ട് ഇന്ന് പത്ത് വർഷം പൂർത്തിയാവുന്നു.

‘കണ്ണുനീർത്തുള്ളിയെ സ്ത്രീയോടുപമിച്ച’ എന്ന ഒറ്റ ഗാനം മതി മലയാള സിനിമ സംഗീതം നിലനിൽക്കുന്നിടത്തോളം കാലം എം.എസ്. വിശ്വനാഥൻ എന്ന പ്രതിഭയെ ഓർമ്മിക്കാൻ. ‘നീലഗിരിയുടെ സഖികളെ’ (പണിതീരാത്ത വീട്), ‘ഹൃദയവാഹിനി ഒഴുകുന്നു നീ’ (ചന്ദ്രകാന്തം), ‘അഷ്ടപദിയിലെ ഗായികേ’ (ജീവിക്കാൻ മറന്നുപോയ സ്ത്രീ) തുടങ്ങി നിരവധി ഹിറ്റ് ഗാനങ്ങൾ മലയാള സിനിമാ സംഗീത പ്രേമികൾക്ക് എം.എസ്. സമ്മാനിച്ചിട്ടുണ്ട്. കവിതയിലെ വികാരപ്രപഞ്ചത്തെ ഈണങ്ങളിലൂടെ ലോകത്തോട് പങ്കുവെച്ച അപൂർവ പ്രതിഭാശാലിയാണ് എം.എസ്. സംഗീതത്തിന്റെ ആഴം നീന്തിക്കടന്ന അസാമാന്യ പ്രതിഭയായിരുന്നു അദ്ദേഹം.

ദാരിദ്ര്യത്തിന്റെ പാരമ്യത്തിൽ, ജീവിതം ദുരന്തങ്ങൾ നിറഞ്ഞപ്പോൾ കൂട്ട ആത്മഹത്യക്ക് ശ്രമിച്ച ഒരു കുടുംബത്തിന്റെ കഥ കൂടിയാണ് എം.എസിന്റെ ജീവചരിത്രം. എന്നാൽ, ആ കഥയിലെ വഴിത്തിരിവായി പലർക്കും അറിയാത്ത അപൂർവമായ ഒരു കണ്ണൂർ ബന്ധവും അദ്ദേഹത്തിനുണ്ട്. 1928 ജൂൺ 24-ന് പാലക്കാട് എലപ്പുള്ളിയിൽ ജനിച്ച വിശ്വനാഥന് നാല് വയസ്സുള്ളപ്പോൾ പിതാവ് മരിച്ചു. ഇതേത്തുടർന്ന് ജീവിതം വഴിമുട്ടിയപ്പോൾ ആത്മഹത്യ ചെയ്യാൻ പുറപ്പെട്ട അമ്മയെയും മകനെയും ജയിൽ വാർഡനായി കണ്ണൂരിൽ ജോലി ചെയ്തിരുന്ന മുത്തച്ഛൻ കൃഷ്ണൻ നായർ കണ്ണൂരിലേക്ക് കൂട്ടിക്കൊണ്ടുവന്നു. മുത്തച്ഛന്റെ കൂടെയാണ് അദ്ദേഹം കുട്ടിക്കാലം പള്ളിക്കുന്നിൽ ചെലവഴിച്ചത്. കണ്ണൂരിലെ സിനിമാ തിയേറ്ററുകളിൽ കടല വിറ്റ് നടന്നായിരുന്നു ആ ബാല്യം.

സ്കൂളിൽ പോകാത്ത സമയത്ത്, കുട്ടികൾക്ക് സംഗീത പാഠങ്ങൾ പകർന്നു നൽകിയിരുന്ന കണ്ണൂരിലെ നീലകണ്ഠ ഭാഗവതരുടെ സംഗീത പാഠങ്ങൾ കേട്ടുകൊണ്ടാണ് എം.എസിന്റെ സംഗീത ജീവിതം ആരംഭിച്ചത്. ക്ലാസ്സിൽ വരാതെ ദൂരെ നിന്ന് സംഗീതം ശ്രവിച്ച കുട്ടിയുടെ താല്പര്യം ഗുരു മനസ്സിലാക്കുകയും അദ്ദേഹത്തെ തന്റെ ശിഷ്യനായി ചേർക്കുകയുമായിരുന്നു. പതിമൂന്നാം വയസ്സിൽ ആദ്യ കച്ചേരി നടത്തിയ എം.എസ്., 60-കളിലും 70-കളിലും തെന്നിന്ത്യൻ ചലച്ചിത്ര സംഗീത സംവിധാന രംഗത്ത് ഉജ്ജ്വല നക്ഷത്രമായി പ്രകാശിച്ചു.

ജന്മംകൊണ്ട് മലയാളിയാണെങ്കിലും കർമ്മംകൊണ്ട് പൂർണ്ണമായും തമിഴ്‌നാട്ടുകാരനായിരുന്നു എം.എസ്. സിനിമാ ലോകവും തമിഴ്‌നാട്ടിലെ ഭരണ ചക്രവും തമ്മിലുണ്ടായ അഭേദ്യമായ ബന്ധം അവിടെ മുഖ്യമന്ത്രി കസേരയിലിരുന്ന പലരുമായും എം.എസ്സിന് നല്ല ബന്ധമുണ്ടാക്കാൻ കാരണമായി. മൂന്ന് മുഖ്യമന്ത്രിമാരുടെ ഗാനങ്ങൾക്ക് എം.എസ്. സംഗീതം പകർന്നു എന്ന അപൂർവ പ്രത്യേകതയും അദ്ദേഹത്തിനുണ്ട്. എം.എസ്. മരണമടയുന്നതിന് മൂന്ന് വർഷം മുമ്പ്, തമിഴ് സംഗീത ലോകത്തിന്റെ പ്രതിനിധിയായി അന്നത്തെ മുഖ്യമന്ത്രി ജയലളിത അദ്ദേഹത്തിന് 'തിരൈ ഇസൈ ചക്രവർത്തി' എന്ന പദവി നൽകി ആദരിച്ചിരുന്നു. തമിഴ്നാടിന്റെ ഔദ്യോഗിക ഗാനമായ ‘നീരാരും കടലുടുത്ത’ (തമിഴ് തായ് വാഴ്ത്ത്) സംഗീതസംവിധാനം നിർവഹിച്ചതും മറ്റാരുമല്ല.

നാടൻ വഴികളിലെ നാട്ടു സംഗീതം വഴി ഇളയരാജയും ഓർക്കസ്ട്രേഷന്റെ അപാര സൗന്ദര്യം വഴി എ.ആർ. റഹ്മാനും തമിഴ് സംഗീത ലോകം അടക്കി ഭരിച്ചുവെങ്കിലും, ഇത് രണ്ടും ഒരേസമയം കൈകാര്യം ചെയ്ത് ചലച്ചിത്ര സംഗീത ലോകത്തെ അത്ഭുതപ്പെടുത്തിയ എം.എസ്. വിശ്വനാഥന്റെ പിൻമുറക്കാർ മാത്രമായിരുന്നു ഇവർ രണ്ടുപേരും എന്ന് സംഗീത വിദഗ്ധർ അഭിപ്രായപ്പെടുന്നു. എം.എസ്.വി. എന്ന മൂന്ന് അക്ഷരങ്ങൾ കൊണ്ട് തെന്നിന്ത്യൻ ചലച്ചിത്ര ലോകത്ത് ഇതിഹാസം രചിച്ച പ്രിയ സംഗീത സംവിധായകൻ 2015 ജൂലൈ 14-ന് ചെന്നൈയിൽ വെച്ച് ഈ ലോകത്തോട് വിട പറഞ്ഞു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Remembering legendary South Indian music composer MS Viswanathan.

#MSViswanathan #MalayalamCinema #TamilMusic #MusicLegend #SouthIndianMusic #Anniversary