'എന്റെ കലയും എഴുത്തുമെല്ലാം ജനിച്ചത് ഇവിടെ നിന്ന്'; മോഹൻലാൽ-തരുൺ മൂർത്തി ചിത്രത്തിന് വൈക്കത്തപ്പന്റെ സന്നിധിയിൽ തുടക്കം

വൈക്കം: (KVARTHA) പ്രേക്ഷകർ ആകാംക്ഷയോടെ കാത്തിരിക്കുന്ന മോഹൻലാൽ-തരുൺ മൂർത്തി ചിത്രത്തിന് (#L365) ഭക്തിസാന്ദ്രമായ തുടക്കം. ചിത്രത്തിന്റെ തിരക്കഥാ പൂജ വൈക്കം മഹാദേവ ക്ഷേത്രത്തിൽ വെച്ച് സംവിധായകൻ തരുൺ മൂർത്തി നിർവ്വഹിച്ചു. 'തുടരും' എന്ന ബ്ലോക്ക്ബസ്റ്റർ ചിത്രത്തിന് ശേഷം തരുൺ മൂർത്തി സംവിധാനം ചെയ്യുന്ന ഈ ബിഗ് ബജറ്റ് ചിത്രത്തിന്റെ ചിത്രീകരണം ജനുവരി 23-ന് ആരംഭിക്കും. തന്റെ കലാജീവിതത്തിൽ വൈക്കം ക്ഷേത്രത്തിനുള്ള പ്രാധാന്യം എടുത്തുപറഞ്ഞുകൊണ്ടാണ് തരുൺ മൂർത്തി തിരക്കഥാ പൂജയുടെ ചിത്രം പങ്കുവെച്ചത്. ‘എന്റെ എല്ലാ സിനിമകളും ആരംഭിക്കുന്നത് വൈക്കം മഹാദേവ ക്ഷേത്രത്തിൽ നിന്നാണ്. എന്റെ കല, എഴുത്ത് എല്ലാം ജനിച്ചത് ഇവിടെയാണ്. ഈ പുണ്യസ്ഥലത്ത് നിന്ന് വീണ്ടും ആരംഭിക്കുന്നതിനേക്കാൾ വലിയ ആനന്ദം മറ്റൊന്നില്ല,’ എന്ന് അദ്ദേഹം കുറിച്ചു.

ആഷിഖ് ഉസ്മാൻ പ്രൊഡക്ഷൻസിന്റെ ആദ്യ മോഹൻലാൽ ചിത്രം

ആഷിഖ് ഉസ്മാൻ പ്രൊഡക്ഷൻസിന്റെ ബാനറിലാണ് ചിത്രം ഒരുങ്ങുന്നത്. ഈ ബാനറിൽ മോഹൻലാൽ അഭിനയിക്കുന്ന ആദ്യ ചിത്രമാണിത് എന്ന പ്രത്യേകതയുമുണ്ട്. നേരത്തെ മോഹൻലാലിനെ നായകനാക്കി നവാഗതനായ ഓസ്റ്റിൻ ഡാൻ തോമസ് സംവിധാനം ചെയ്യാനിരുന്ന ഒരു ചിത്രം ഇതേ ബാനറിൽ പ്രഖ്യാപിച്ചിരുന്നു. എന്നാൽ ആ പ്രോജക്ട് ഡ്രോപ്പ് ആയതിന് ശേഷമാണ് തരുൺ മൂർത്തിയുടെ സിനിമ പ്രഖ്യാപിച്ചത്.

ദൃശ്യം 3-ന് ശേഷം

മോഹൻലാലിന്റെ കരിയറിലെ 365-ാം ചിത്രമാണിത്. ദൃശ്യം 3-ന് ശേഷം മോഹൻലാൽ നായകനായി എത്തുന്ന ചിത്രമെന്ന പ്രത്യേകതയും ഇതിനുണ്ട്. രതീഷ് രവിയാണ് ചിത്രത്തിന്റെ കഥ ഒരുക്കിയിരിക്കുന്നത്.  ചിത്രത്തിനായുള്ള ലൊക്കേഷൻ ഹണ്ടിംഗിനിടെ തരുൺ മൂർത്തി കഴിഞ്ഞ ദിവസം പങ്കുവെച്ച ഇൻസ്റ്റഗ്രാം സ്റ്റോറി സോഷ്യൽ മീഡിയയിൽ വലിയ ചർച്ചയായിരുന്നു. ചിത്രത്തിന്റെ കൂടുതൽ അപ്‌ഡേറ്റുകൾ വരും ദിവസങ്ങളിൽ പുറത്തുവിടുമെന്ന് അണിയറ പ്രവർത്തകർ അറിയിച്ചു.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക.

Article Summary: Script puja for the upcoming Mohanlal movie directed by Tharun Moorthy was held at Vaikom Mahadeva Temple. Produced by Ashiq Usman, filming starts on Jan 23.

#Mohanlal #TharunMoorthy #L365 #MalayalamCinema #Vaikom #AshiqUsman #Mollywood