ബമ്പർ കൈവിട്ട നിരാശയിൽ മീനാക്ഷി അനൂപും; 'മാളികയും നൂറേക്കർ തോട്ടവും ഒഴിയണം', കമന്റുകൾ ഏറ്റെടുത്ത് സോഷ്യൽ മീഡിയ

കൊച്ചി: (KVARTHA) കേരളക്കരയിൽ കഴിഞ്ഞ ദിവസങ്ങളിലെ പ്രധാന ചർച്ചാവിഷയം 25 കോടി രൂപയുടെ തിരുവോണം ബമ്പർ ലോട്ടറിയെക്കുറിച്ചുള്ളതായിരുന്നു. സംസ്ഥാനത്തിന്റെ ചരിത്രത്തിലെ ഏറ്റവും വലിയ ലോട്ടറി സമ്മാനത്തുകയായതിനാൽ, ആർക്കാണ് ഭാഗ്യം ലഭിച്ചതെന്നറിയാനുള്ള ആകാംക്ഷ ഒരു വശത്തും, ബമ്പർ ടിക്കറ്റ് എടുത്ത പലരുടെയും നിരാശ മറുവശത്തും സജീവമായി നിൽക്കുകയാണ്. 

ഈ കൂട്ടത്തിൽ മലയാളികളുടെ ഇഷ്ടതാരമായ മീനാക്ഷി അനൂപും ബമ്പർ ലഭിക്കാത്തതിലുള്ള തന്റെ നിരാശ സോഷ്യൽ മീഡിയ വഴി രസകരമായി പങ്കുവെച്ചിരിക്കുകയാണ്. പതിവ് പോലെ കുറുമ്പു നിറഞ്ഞതും എന്നാൽ രസകരവുമായ ഒരു കുറിപ്പോടെയാണ് മീനാക്ഷി തന്റെ സങ്കടം ആരാധകരുമായി പങ്കുവെച്ചത്. 

‘ബമ്പറിൽ '.. 'നമ്പറില്ല'..നമ്പറു..കൊറെയെറക്കാനിരുന്നതാ..’ എന്നതായിരുന്നു താരത്തിന്റെ ഫേസ്ബുക്ക് ക്യാപ്ഷൻ. ഒരു കൈയ്യിൽ ഓണം ബമ്പർ ലോട്ടറി ടിക്കറ്റ് വെച്ച്, മറ്റേ കൈത്താടിയിൽ ഊന്നി നിരാശയോടെ ഇരിക്കുന്ന ഒരു ചിത്രവും മീനാക്ഷി ഇതിനൊപ്പം പങ്കുവെച്ചിരുന്നു.

കമന്റ് ബോക്സിൽ ചിരി പടർത്തി താരം

മീനാക്ഷിയുടെ ഈ പോസ്റ്റ് വന്നതിന് പിന്നാലെ പതിവ് പോലെ നിരവധി രസകരമായ കമന്റുകൾ കൊണ്ട് പോസ്റ്റിന്റെ കമന്റ് ബോക്സ് (അഭിപ്രായപ്പെട്ടി) നിറഞ്ഞു. താരത്തിന്റെ നിരാശയെ നർമ്മത്തിൽ ചാലിച്ച് ആശ്വസിപ്പിച്ചും കളിയാക്കിയുമുള്ള കമന്റുകൾക്ക് മീനാക്ഷിയും അതേ നാണയത്തിൽ മറുപടി നൽകിയതോടെ ചർച്ചകൾ കൊഴുക്കുകയായിരുന്നു.

ഇത്തരത്തിൽ വന്ന ഒരു കമന്റിന് മീനാക്ഷി നൽകിയ മറുപടിയാണ് ഇപ്പോൾ ആരാധകർക്കിടയിൽ ചിരി പടർത്തുന്നത്. 'സ്വപ്നത്തി മേടിച്ച മണി മാളികേം നൂറേക്കർ തോട്ടോം..ഇന്നൊഴിയണം’ എന്നായിരുന്നു താരത്തിന്റെ മറുപടി. ഭാഗ്യം ലഭിക്കാത്തതിനാൽ, ലോട്ടറിയടിച്ചാൽ വാങ്ങാൻ സ്വപ്നം കണ്ട മാളികയിൽ നിന്നും എസ്റ്റേറ്റിൽ നിന്നും ഇന്ന് തന്നെ ഇറങ്ങേണ്ടി വരുമെന്നാണ് മീനാക്ഷി ഈ കമന്റിലൂടെ സൂചിപ്പിച്ചത്.

ആരാധകരുടെ കമന്റുകളും ശ്രദ്ധേയമായിരുന്നു. ‘ഇത്തവണയും കിട്ടിയില്ല തിങ്കളാഴ്ച മുതൽ പണിക്കു പോണം’, ‘വിഷമിക്കേണ്ട അടുത്ത ബമ്പർ എടുത്താൽ മതി’, ‘നിന്റെ ഒരു നമ്പറും കേരള ലോട്ടറി വകുപ്പിനോട് നടക്കില്ല മോളെ’, ‘ബമ്പറിൽ നമ്പർ ഇല്ലെങ്കിലെന്താ, ബമ്പറിൽ കമ്പമുണ്ടല്ലോ’ എന്നിങ്ങനെ പോകുന്നു രസികൻ പ്രതികരണങ്ങൾ. 

എങ്കിലും, വിഷമിക്കേണ്ടെന്നും അടുത്ത പൂജാ ബമ്പർ എടുക്കാമെന്നും പറഞ്ഞ് താരത്തെ ആശ്വസിപ്പിക്കുന്നവരും കുറവല്ല. ലോട്ടറി സ്വപ്നങ്ങൾ പൊലിഞ്ഞതിന്റെ നിരാശ പങ്കുവെക്കുന്ന സാധാരണക്കാരായ മലയാളികളുടെയെല്ലാം പൊതുവികാരം മീനാക്ഷിയുടെ പോസ്റ്റിലൂടെ പ്രതിഫലിച്ചു എന്നാണ് സോഷ്യൽ മീഡിയയുടെ വിലയിരുത്തൽ.

ഭാഗ്യശാലി ഇനിയും രംഗത്തെത്തിയില്ല

അതേസമയം, തിരുവോണം ബമ്പർ നറുക്കെടുപ്പ് കഴിഞ്ഞ് മണിക്കൂറുകൾ പിന്നിട്ടിട്ടും 25 കോടിയുടെ ഭാഗ്യശാലി ഇതുവരെയും പൊതുസമൂഹത്തിന് മുന്നിൽ എത്തിയിട്ടില്ല. TH 577825 എന്ന ഭാഗ്യ ടിക്കറ്റാണ് ഒന്നാം സമ്മാനം നേടിയത്. എറണാകുളം നെട്ടൂരിലെ ലതീഷ് എന്ന ലോട്ടറി ഏജന്റിൽ നിന്നുമാണ് ഈ ടിക്കറ്റ് വിറ്റുപോയതെന്ന വിവരം ലോട്ടറി വകുപ്പ് അറിയിച്ചു. 

ഭാഗ്യശാലി നെട്ടൂരിൽ തന്നെയുള്ള ആളായിരിക്കാനാണ് സാധ്യതയെന്നും അദ്ദേഹം വെളിപ്പെടുത്തി. എന്തായാലും, ഈ ഭാഗ്യവാൻ അല്ലെങ്കിൽ ഭാഗ്യവതി ആരാണെന്നും അവർ എത്രയും പെട്ടെന്ന് ലോട്ടറി വകുപ്പിനെ സമീപിക്കുമോ എന്നുമുള്ള ആകാംഷയിലാണ് കേരളക്കര ഇപ്പോഴും.

ഈ വർത്തയെകുറിച്ചുള്ള നിങ്ങളുടെ അഭിപ്രായം പങ്കുവെക്കുക.

Article Summary: Actress Meenakshi Anoop shares funny disappointment over not winning the 25 crore Onam Bumper lottery.

#OnamBumper #MeenakshiAnoop #KeralaLottery #ViralPost #ThiruvonamBumper #SocialMedia