'നേഷൻസ് ആക്ടർ' എന്നറിയപ്പെട്ടിരുന്ന പ്രിയ താരം ആൻ സങ്-കി ഇനി ഓർമ്മ

സിയോൾ: (KVARTHA) ദക്ഷിണ കൊറിയൻ ചലച്ചിത്ര ലോകത്തെ ഇതിഹാസ താരം ആൻ സങ്-കി (74) അന്തരിച്ചു. രക്താർബുദ ബാധിതനായി വർഷങ്ങളായി ചികിത്സയിലായിരുന്നു അദ്ദേഹം. സിയോൾ ആസ്ഥാനമായുള്ള സുൺകുൻഹ്യാങ് യുണിവേഴ്‌സിറ്റി ആശുപത്രി അധികൃതരാണ് മരണവാർത്ത സ്ഥിരീകരിച്ചത്. 

ഡിസംബർ 30-ന് വൈകുന്നേരം വീട്ടിൽ വെച്ച് പെട്ടെന്ന് കുഴഞ്ഞുവീണതിനെത്തുടർന്ന് അദ്ദേഹത്തെ ആശുപത്രിയിൽ പ്രവേശിപ്പിക്കുകയായിരുന്നു. അന്നുമുതൽ തീവ്രപരിചരണ വിഭാഗത്തിൽ ചികിത്സയിലായിരുന്ന അദ്ദേഹം മരണത്തിന് കീഴടങ്ങുകയായിരുന്നു.

ആറ് പതിറ്റാണ്ടോളം ദക്ഷിണ കൊറിയൻ ചലച്ചിത്ര രംഗത്ത് നിറഞ്ഞുനിന്ന ആൻ സങ്-കി രാജ്യത്തെ 'നേഷൻസ് ആക്ടർ' എന്നാണ് വിശേഷിപ്പിക്കപ്പെട്ടിരുന്നത്. അഞ്ച് തവണ മികച്ച നടനുള്ള പ്രശസ്തമായ ഗ്രാൻഡ് ബെൽ അവാർഡ് നേടിയ അദ്ദേഹം ദക്ഷിണ കൊറിയയിലെ 20-ലധികം പ്രധാന സിനിമാ പുരസ്‌കാരങ്ങൾക്കും അർഹനായിട്ടുണ്ട്. അഭിനയ ജീവിതത്തിൽ അദ്ദേഹം പുലർത്തിയ വൈവിധ്യമാർന്ന ശൈലിയും ആഴത്തിലുള്ള പ്രകടനങ്ങളും പ്രേക്ഷകരുടെയും നിരൂപകരുടെയും പ്രശംസ ഒരുപോലെ പിടിച്ചുപറ്റിയിരുന്നു.

1952-ൽ തെക്കുകിഴക്കൻ നഗരമായ ഡേഗുവിൽ ഒരു ചലച്ചിത്ര നിർമ്മാതാവിൻ്റെ മകനായാണ് ആൻ ജനിച്ചത്. 1957-ൽ പുറത്തിറങ്ങിയ 'ദി ട്വിലൈറ്റ് ട്രെയിൻ' എന്ന ചിത്രത്തിലൂടെ തന്റെ അഞ്ചാം വയസ്സിൽ ബാലതാരമായാണ് അദ്ദേഹം അഭിനയരംഗത്തേക്ക് പ്രവേശിച്ചത്. 

തുടർന്ന് പഠനത്തിനായി ഇടവേളയെടുക്കുന്നതുവരെ എഴുപതോളം ചിത്രങ്ങളിൽ അദ്ദേഹം വേഷമിട്ടു. പഠനത്തിന് ശേഷം സിയോളിലെ ഹാൻകുക്ക് യുണിവേഴ്‌സിറ്റി ഓഫ് ഫോറിൻ സ്റ്റഡീസിൽ നിന്നും വിയറ്റ്നാമീസ് ഭാഷയിൽ അദ്ദേഹം ബിരുദം നേടി.

തിരികെ അഭിനയരംഗത്തേക്ക് എത്തിയ ആൻ സങ്-കി അവിസ്മരണീയമായ നിരവധി വേഷങ്ങളിലൂടെ കൊറിയൻ സിനിമയുടെ മുഖമായി മാറി. 2019 മുതൽ താൻ രക്താർബുദത്തിനെതിരെ പോരാടുകയാണെന്ന് 2022-ൽ നൽകിയ ഒരു അഭിമുഖത്തിൽ അദ്ദേഹം വെളിപ്പെടുത്തിയിരുന്നു. രോഗാവസ്ഥയിലും തന്റെ സിനിമകളോടുള്ള അഭിനിവേശം അദ്ദേഹം കാത്തുസൂക്ഷിച്ചിരുന്നു.

ഡെഫിയൻസ് ഓഫ് എ ടീനേജർ (1959), ദ ഹൗസ് മെയ്‌ഡ് (1960), വില്ലേജ് ഇൻ ദ മിസ്റ്റ് (1981), ദ ഏജ് ഓഫ് സക്‌സസ് (1988), ടു കോപ്‌സ് (1993), സ്ലീപ്പിങ് മാൻ (1996), ദ ലാസ്റ്റ് വിറ്റ്നസ് (2001), സിൽമിഡോ (2003), ഡ്യൂലിസ്റ്റ് (2005), ഹാൻബാൻഡോ (2006), 3 ഡിവൈൻ വെപ്പൺ (2008), അൺബോവ്‌ഡ് (2011), ദ ഡിവൈൻ മൂവി (2014), ദ ഹണ്ട് (2016) എന്നിവ അദ്ദേഹത്തിന്റെ ശ്രദ്ധേയമായ ചിത്രങ്ങളാണ്. 2022-ൽ പുറത്തിറങ്ങിയ 'ഹൻസാൻ: റൈസിംഗ് ഡ്രാഗൺ' ആണ് അദ്ദേഹത്തിന്റെ ഒടുവിൽ ശ്രദ്ധിക്കപ്പെട്ട സിനിമകളിൽ ഒന്ന്. അദ്ദേഹത്തിന്റെ വിയോഗത്തിൽ ലോകമെമ്പാടുമുള്ള സിനിമാ പ്രവർത്തകരും ആരാധകരും അനുശോചനം രേഖപ്പെടുത്തി.

ഈ വാർത്ത ഷെയർ ചെയ്യുക.

Article Summary: Legendary South Korean actor Ahn Sung-ki passed away at 74 due to blood cancer.

#AhnSungKi #SouthKorea #KoreanCinema #NationsActor #RIP #CinemaLegend