Song | ടിബറ്റൻ വരികളിൽ ഒരു ഗാനം! ജനമനസ് കീഴടക്കി 'കിഷ്കിന്ധാ കാണ്ഡ'ത്തിലെ പാട്ട്; ലിറിക്കൽ വീഡിയോ ഹിറ്റ്
* ചിത്രം സെപ്റ്റംബർ 12ന് റിലീസ് ചെയ്യും.
കൊച്ചി: (KVARTHA) ആസിഫ് അലിയെ നായകനാക്കി ദിൻജിത്ത് അയ്യത്താൻ സംവിധാനം ചെയ്യുന്ന ‘കിഷ്കിന്ധാ കാണ്ഡം’ എന്ന ചിത്രത്തിന്റെ ഗാനം പുറത്തിറങ്ങി. ‘വാനര ലോകം’ എന്ന ഗാനത്തിന് ശ്യാം മുരളീധരനാണ് വരികളെഴുതിയിരിക്കുകയാണ്. മുജീബ് മജീദ് സംഗീതം പകർന്ന ഗാനം ജോബ് കുര്യനും ജെ’മൈമയും ചേർന്നാണ് ആലപിച്ചിരിക്കുന്നത്.
ഗാനത്തിന്റെ പ്രത്യേകത ടിബറ്റൻ വരികളാണ്. ആദ്യമായാണ് ഒരു മലയാള ഗാനത്തിൽ ടിബറ്റൻ വരികൾ ഉപയോഗിക്കുന്നത്. ഗാനത്തിന്റെ ലിറിക്കൽ വീഡിയോ കഴിഞ്ഞ ദിവസം പുറത്തിറങ്ങിയതിന് പിന്നാലെ വലിയ സ്വീകാര്യതയാണ് നേടിയിരിക്കുന്നത്. സെപ്റ്റംബർ 12നാണ് ചിത്രം റിലീസ് ചെയ്യുന്നത്. ഓണം റിലീസായി എത്തുന്ന ചിത്രത്തിനായുള്ള പ്രേക്ഷക പ്രതീക്ഷ വളരെ കൂടുതലാണ്.
കിഷ്കിന്ധാ കാണ്ഡത്തിന്റെ നേരത്തെ പുറത്തിറങ്ങിയ ടീസറും ശ്രദ്ധേയമായിരുന്നു. ഗാനത്തിലെ വരികളും പുറത്തിറങ്ങിയതോടെ ആവേശം ഇരട്ടിച്ചിരിക്കുകയാണ്. സോഷ്യൽ മീഡിയയിൽ ഗാനം വൈറലായി മാറിയിരിക്കുകയാണ്. 'സംഗീതത്തിന് ഭാഷ ഇല്ല, പക്ഷെ ഈ പാട്ട് വേറെ ലോകത്തു എത്തിക്കും', എന്നൊക്കെയാണ് സാമൂഹ്യ മാധ്യമങ്ങളിൽ വരുന്ന പ്രതികരണം.
ടിബറ്റൻ വരികളുടെ ഉൾപ്പെടുത്തൽ മലയാള സിനിമയിൽ ഒരു പുത്തൻ അധ്യായം തുറന്നിരിക്കുകയാണ്. ആസിഫ് അലിയുടെ കരിയറിലെ ഒരു വഴിത്തിരിവായി ഈ ചിത്രം മാറുമെന്നും പ്രതീക്ഷിക്കപ്പെടുന്നു. ടിബറ്റൻ വരികളുടെ ഉപയോഗം, സംഗീത ശൈലി, മനോഹരമായ ദൃശ്യഭാഷ, തുടങ്ങിയവ ലിറിക്കൽ വീഡിയോയെ വ്യത്യസ്തമാക്കുന്നു. സിനിമയിലെ പ്രകൃതി ദൃശ്യങ്ങൾ പ്രേക്ഷകരിൽ അതിശയിപ്പിക്കുന്ന ഒരു അനുഭവം സൃഷ്ടിക്കുമെന്നാണ് പ്രതീക്ഷിക്കുന്നത്.
ആസിഫ് അലിയും അപർണ ബാലമുരളിയും പ്രധാന വേഷങ്ങളിൽ എത്തുന്ന ചിത്രത്തിൽ വിജയരാഘവൻ, ജഗദീഷ്, അശോകൻ, നിഷാൻ, വൈഷ്ണവി രാജ്, മേജർ രവി, നിഴൽകൾ രവി, ഷെബിൻ ബെൻസൺ, കോട്ടയം രമേഷ്, ബിലാസ് ചന്ദ്രഹാസൻ, മാസ്റ്റർ ആരവ്, ജിബിൻ ഗോപിനാഥ്‌ തുടങ്ങിയവരും പ്രധാന വേഷങ്ങളിൽ എത്തുന്നു. ബാഹുൽ രമേഷ് കഥ, തിരക്കഥ, സംഭാഷണം, ഛായാഗ്രഹണം എന്നിവ നിർവഹിക്കുന്ന ചിത്രം ഗുഡ്‌വിൽ എന്റർടെയ്ൻമെൻ്റ്സിൻ്റെ ബാനറിൽ ജോബി ജോർജാണ് നിർമിക്കുന്നത്.
എഡിറ്റര്‍ - സൂരജ് ഇ.എസ്, ആര്‍ട്ട്‌ - സജീഷ് താമരശ്ശേരി, കോസ്റ്റ്യൂംസ് - സമീറ സനീഷ്, മേക്കപ്പ് - റഷീദ് അഹമ്മദ്, സൗണ്ട് ഡിസൈന്‍ - രഞ്ജു രാജ് മാത്യു, പ്രൊഡക്ഷന്‍ കണ്‍ട്രോളര്‍ - രാജേഷ്‌ മേനോന്‍, ചീഫ് അസോസിയേറ്റ് - ബോബി സത്യശീലന്‍, സ്റ്റില്‍സ് - ബിജിത്ത് ധര്‍മ്മടം, പിആര്‍ഒ - വാഴൂര്‍ ജോസ്& ആതിരാ ദില്‍ജിത്ത്, ഡിജിറ്റല്‍ മാര്‍ക്കറ്റിംഗ് - അരുണ്‍ പൂക്കാടന്‍& പ്രവീണ്‍ പൂക്കാടന്‍ എന്നിവരാണ് ചിത്രത്തിന്റെ മറ്റ് അണിയറ പ്രവർത്തകർ.
