കളങ്കാവൽ സ്വീകരിച്ച പ്രേക്ഷകർക്ക് ഹൃദയം നിറഞ്ഞ നന്ദിയെന്ന് മമ്മൂട്ടിയും വിനായകനും

കൊച്ചി: (KVARTHA) മമ്മൂട്ടി, വിനായകൻ എന്നിവരെ കേന്ദ്ര കഥാപാത്രങ്ങളാക്കി ജിതിൻ കെ. ജോസ് സംവിധാനം നിർവഹിച്ച കളങ്കാവൽ തിയറ്ററുകളിൽ മെഗാ ബ്ലോക്ക്ബസ്റ്റർ വിജയം നേടി മുന്നോട്ട് കുതിക്കുകയാണ്. ചിത്രം വലിയ വിജയമായതിൽ, അതിനെ ഇരു കയ്യും നീട്ടി സ്വീകരിച്ച പ്രേക്ഷകർക്ക് നന്ദിയറിയിച്ച് മമ്മൂട്ടിയും വിനായകനും രംഗത്തെത്തി. കഴിഞ്ഞ രണ്ട് ദിവസങ്ങളിലായി ചിത്രത്തിന് ലഭിക്കുന്ന പ്രേക്ഷക പ്രശംസയിൽ തനിക്ക് വളരെയധികം സന്തോഷമുണ്ടെന്ന് മമ്മൂട്ടി അറിയിച്ചു.

തന്റെ സിനിമ തിരഞ്ഞെടുപ്പുകളെ വിശ്വസിച്ചു കൊണ്ട് എന്നും തന്നോടൊപ്പം നിൽക്കുന്ന പ്രേക്ഷകരോട് അദ്ദേഹം പ്രത്യേകമായി നന്ദി പറയുകയും ചെയ്തു. 'കഴിഞ്ഞ രണ്ട് ദിവസങ്ങൾ വളരെ ആവേശകരമായിരുന്നു. റിലീസ് ചെയ്തതിന് ശേഷം കളങ്കാവലിന് ലഭിക്കുന്ന സ്നേഹത്തിൽ ഞാൻ ശരിക്കും അത്ഭുതപ്പെട്ടു പോയി. എൻ്റെ തിരഞ്ഞെടുപ്പുകളിൽ നിങ്ങൾ വിശ്വസിച്ചതിന് നന്ദി,' മമ്മൂട്ടി സോഷ്യൽ മീഡിയയിലൂടെ കുറിച്ചു. ചിത്രത്തിനും തന്റെ പ്രകടനത്തിനും ലഭിക്കുന്ന മികച്ച പ്രതികരണത്തിന് വിനായകനും പ്രേക്ഷകരോടുള്ള നന്ദി അറിയിച്ചു.

ബോക്സ് ഓഫീസിലും തരംഗം

ഡിസംബർ അഞ്ചിന് തിയറ്ററുകളിലെത്തിയ കളങ്കാവലിന് മികച്ച പ്രതികരണമാണ് പ്രേക്ഷകരുടെ ഭാഗത്തുനിന്നും ലഭിച്ചുകൊണ്ടിരിക്കുന്നത്. ചിത്രത്തിന്റെ ആദ്യ ദിന ആഗോള ഗ്രോസ് കളക്ഷൻ 15 കോടി 70 ലക്ഷം രൂപയാണ്. ട്രേഡ് അനലിസ്റ്റ് വെബ് സൈറ്റായ സാക്നിൽക്കിന്റെ ആദ്യകാല കണക്കുകൾ പ്രകാരം, ചിത്രം 5.25 കോടി രൂപയിലധികം കളക്ഷൻ നേടി. ബോക്സ് ഓഫീസിൽ തരംഗം സൃഷ്ടിച്ചു കൊണ്ട് ജൈത്രയാത്ര തുടരുന്ന ഈ ചിത്രം കേരളത്തിലെ 260 സ്‌ക്രീനുകളിൽ നിന്ന് 365 സ്‌ക്രീനുകളിലേക്ക് വർധിപ്പിച്ചതായി അണിയറപ്രവർത്തകർ അറിയിച്ചു.

പ്രതിനായകനായി മമ്മൂട്ടി, നായകനായി വിനായകൻ

സ്റ്റാൻലി ദാസ് എന്ന കൊടും വില്ലനായി മമ്മൂട്ടിയെത്തിയപ്പോൾ, ജയകൃഷ്ണൻ എന്ന പോലീസ് ഓഫീസറുടെ പ്രധാന വേഷമാണ് വിനായകൻ കൈകാര്യം ചെയ്തത്. ജിബിൻ ​ഗോപിനാഥ് ചിത്രത്തിൽ മറ്റൊരു പ്രധാന കഥാപാത്രത്തെ അവതരിപ്പിച്ചു. മമ്മൂട്ടിയുടെ പ്രതിനായക വേഷത്തിന് അഭൂതപൂർവമായ പ്രേക്ഷക - നിരൂപക പ്രശംസയാണ് ലഭിക്കുന്നത്. ഇന്ത്യൻ സിനിമയിൽ തന്നെ ഇതുപോലൊരു വേഷം ചെയ്യാനുള്ള ധൈര്യം സൂപ്പർതാരം മമ്മൂട്ടിക്കല്ലാതെ മറ്റാർക്കും ഉണ്ടാവില്ല എന്ന് ആരാധകർ അഭിപ്രായപ്പെടുന്നു.

അമ്പരപ്പിക്കുന്ന വില്ലനിസം കാഴ്ചവെക്കുന്ന മമ്മൂട്ടിയോടൊപ്പം കട്ടക്ക് നിൽക്കുന്ന പ്രകടനമാണ് പോലീസ് ഓഫീസറായി വിനായകനും നൽകിയത്. അദ്ദേഹത്തിൻ്റെ കരിയറിലെ തന്നെ ഏറ്റവും വ്യത്യസ്തമായ ഒരു ശരീര ഭാഷയും സംസാര രീതിയും ആണ് ഈ ചിത്രത്തിലൂടെ പ്രേക്ഷകരുടെ മുന്നിലെത്തിച്ചത്. പ്രേക്ഷകർ ഇന്നേ വരെ കാണാത്ത മമ്മൂട്ടിയെയാണ് സംവിധായകൻ ജിതിൻ കെ ജോസ് ഈ സിനിമയിലൂടെ സമ്മാനിച്ചത്. അടുത്തകാലത്തായി ഇമേജ് പോലും നോക്കാതെ കഥാപാത്രങ്ങളിലെ വ്യത്യസ്ത തേടി അലയുകയാണ് മമ്മൂട്ടിയെന്നാണ് ആരാധകർ പറയുന്നത്.

ജിതിൻ കെ ജോസിന്റെ ആദ്യ സംവിധാനം

ജിഷ‌ ശ്രീകുമാറും ജിതിൻ കെ ജോസും ചേർന്ന് തിരക്കഥ രചിച്ച കളങ്കാവൽ, മമ്മൂട്ടി കമ്പനിയുടെ ബാനറിൽ നിർമ്മിച്ച ഏഴാമത്തെ ചിത്രം കൂടിയാണ്. ദുൽഖർ സൽമാൻ നായകനായെത്തിയ സൂപ്പർഹിറ്റ് ചിത്രം 'കുറുപ്പ്'ൻ്റെ കഥ ഒരുക്കി ശ്രദ്ധ നേടിയ ജിതിൻ കെ ജോസ് ആദ്യമായി സംവിധാനം ചെയ്ത ചിത്രം കൂടിയാണ് കളങ്കാവൽ. ഒരിക്കൽ കൂടി കാമ്പുള്ള കഥയും അതിശയിപ്പിക്കുന്ന പ്രകടനവും കൊണ്ട് മഹാവിജയം സമ്മാനിക്കുന്ന മമ്മൂട്ടി മാജിക് ആണ് ഈ ചിത്രം കാണിച്ചു തരുന്നത്.

മമ്മൂട്ടിയുടെ പ്രതിനായക പ്രകടനത്തെക്കുറിച്ചുള്ള നിങ്ങളുടെ അഭിപ്രായം കമൻ്റ് ചെയ്യുക.

Article Summary: Mammootty and Vinayakan express gratitude as Kalamkaval becomes a mega hit grossing ₹15.70 Cr.

#Mammootty #Vinayakan #Kalamkaval #Blockbuster #MalayalamMovie #BoxOffice